昨夜星辰恰似你: 6 .

可能因為尋晚打機打到太晏，今日變咗熊貓眼。

一翻到課室就見到枱上面有粒糖，仲有一張紙。

：唔好死頂啦白癡。

食完粒糖，唔知係咪因為心理因素 ， 真係好受咗好多。

「嘩咁快食咗粒糖嘅你。」鄭梓𤋮一臉嫌棄





「唔通幾時食？」我摺緊張糖紙

「咁⋯食完有冇好啲先」

我𥅈到佢筆袋入面有隻藍色嘅心，於是就用糖紙摺咗俾佢。

「你話呢？」我將隻心拎俾佢，入面寫咗句多謝。

「多謝喎，不過有啲樣衰」佢笑住咁拎咗隻心





「咁咪唔好要囉，橫掂你都有一隻」我準備搶翻隻心

佢沉默咗陣。

「喂隻心⋯」當我正想問隻心係邊隻兵仔送嘅時候，佢就一手搶咗我手上面嘅摺紙。

「咁又唔得喎」佢將隻心放咗入筆袋

「白癡。」





「你就白癡」佢講得好細聲，我幾乎聽唔到。

佢望住筆袋入面嘅心，偷偷地係到笑。

而我亦無再去問隻藍心嘅來由。

我望住佢，突然覺得佢都幾得意。然後個一刻，我淨係想一直望住佢。

-

當時嘅我唔知道，原來當你鍾意一個人，你見到佢笑，你自己都會無啦啦跟住笑。

-

終於放小息，肥東走過嚟拉咗我上天台。





佢拋咗罐可樂俾我。
「喂，尋日點啊，洗唔洗瞓街啊」
「多得你，我瞓公園」

見到佢有啲內疚個樣我忍唔住笑咗出嚟。

「尋日我啊媽返咗嚟我唔使瞓街」我開咗罐可樂喺度飲

「伯母十幾年冇返，一返嚟肯定有目的啦」佢拍拍我膊頭

「因為佢個女」我開咗罐可樂，準備一口氣飲曬佢

「帽事嘅」





肥東唔識安慰人，總係講埋曬啲唔好笑嘅笑話。

「錫翻啖先」我對佢做咗個極為誘人嘅動作，嘟起個死仔嘴準備錫過去。

「你咪搞啊死gay佬」

兩個麻甩佬嘻嘻哈哈，打打鬧鬧完就坐係地下係到笑。

「死肥仔，追到你女神未」我望住佢

「未啦，冇機架啦」佢嘆咗口氣

「張嘉茹有咁難溝咩，等兄弟幫下你」

「好似你同鄭梓𤋮咁咩」佢意味深長咁講





「下咩啊，我同佢做咩」

「係咪鍾意咗人地啊」佢笑淫淫咁望住我

「你都癡線，朋友咋」

肥東企咗起身伸個懶腰，突然好認真咁同我講

「陳永健，你成世仔都無認真做一樣野，真係鍾意人就去馬啦」


我都企咗起身， 搭住佢膊頭行翻落去上堂

「係啦係啦林志東」





.
當時嘅我地，往往都唔會承認自己鍾唔鍾意某個女仔，又或者，係仲未知點先算鍾意咗一個人。

-