昨夜星辰恰似你: 7.
上完PE,就到我最輕鬆嘅數學。
「就快UT,你地同我做曬呢課EX佢。」
講緊野嘅係周sir,人稱冷面殺手。
「又嚟⋯啊sir會做死人」
冷面殺手之所以叫殺手,就因為佢永遠都要學生瘋狂做Ex。
冷面殺手之所以冷面,因為佢漠視學生嘅哀號,任由佢地活係水深火熱嘅困境入面。
而我反而幾鍾意佢,係就係苛刻咗少少,但係佢教嘅方式同方法,又真係幾有用。
「喂陳永健」肥東遞咗枝可樂俾我
「邊到嚟嘅可樂」我9秒9放翻入櫃筒
無事獻殷勤?
「又有咩要幫手啊死肥仔」
「嘉茹有條數唔識,唔知大神你⋯」
我一手拎佢手上條數,不耗吹灰之力就解完,列埋條式出嚟。
我真係無科叻,唯獨數學由細到大都覺得好易,嚟嚟去去咪背下公式代翻入去,啲題目簡直係千篇一律。
佢一句多謝都唔講就過去教佢女神,呢個肥仔真係重色輕友到呢。
望住佢成功教到女神個滿足樣,我都不知覺咁笑咗。
「柒頭,拎住」黃思丟咗塊膠布俾我,然後就行翻埋位做數。
我本來仲係到諗緊佢無啦啦點解要俾膠布我。
「你右手手掌啊」佢傳咗張紙俾我
我望一望右手,原來整親我自己都唔知。
然後我就對佢做咗個心心嘅手勢,但係佢回報咗我一個作嘔嘅表情。
「多謝」
佢抬頭側面望咗我一眼,微微笑咗一笑。
突然覺得,黃思都幾細心。
-
鄭梓熙望咗望我,好似有啲內疚咁。
見我笨手笨腳,佢就拎起咗塊膠布幫我癡住個傷口。
「頭先⋯乜野好熟口面」
聽到呢句佢就好大力咁㩒落我隻手到,唔係講笑,真係有啲痛。
「關你咩事哼」佢拎翻起枝筆繼續做數
鄭梓𤋮啊鄭梓𤋮,點解你咁飄忽不定。
忽冷忽熱,一時我覺得自己好瞭解你,一時我覺得你好陌生。
-
2013
我一步一步行向你
你一步一步避開我
你同我之間,就好似隔咗一棟無形嘅牆。
「今次,由你擰轉頭走先。」佢話。
唔通咁樣
我真係會好過少少咩。
-
2011
佢越唔講,我越想知。
我擰轉頭望住隔一行最後一個位嘅唐誠。
佢係到摺紙。
枱上有幾隻心。
藍色嘅心。