心的距離: Behind the Scene - 13

「Kathy，有啲嘢想同你傾，樓下公園等。」
在心裡鬱悶幾天後，終於按捺不住。

不久後就看見穿著居家服和外套的她，緩緩走來。
她一坐下，我就立即問道：「其實我有一個問題想問你：你同阿基係咩關係。」
她眼神有點閃縮，吞吐地答道：「吓......咪......咪中學同學，同埋朋友囉。」
我繼續追問：「你同佢以前係咪發生過一啲事？」
她不敢直視我，緩緩說道：「吓，發生過咩事，我唔明你講乜。」
她還是打算隱瞞。
「呢到得我哋兩個人，你就老老實實答我啦。」




她不作聲。
我再說道：「如果我哋唔搞清楚呢個問題，我哋好難行落去。所以我希望，我哋一齊面對呢個問題，因為......我唔想冇咗你。」
她深呼吸，嘆過一口氣。
「你記唔記得有次你問我最難忘嘅人，我答你係中學時暗戀嘅對象。」
「我記得，你仲話你哋做過好多情侶會做嘅事，仲去過——」
我想到「台北」這二字，卻沒有說出口。
他跟阿基去過台北，又是中學同學，難道......
我此刻詫異非常，定神地看著她。

「無錯，阿基就係我中學時嘅暗戀對象。」





「中學畢業後咁多年，我以為我已經唔記得佢，直至幾個月前，我喺小巴上面再見返佢。同中學嗰時相比，佢變咗好多。佢以前好活躍，但再見返佢，佢變到唔想同人有接觸。」
「我想佢可以變返以前咁，但我更想贖罪。」
「吓？」我不明白她「贖罪」的意思。
「中五嗰時，阿基鐘意同班另一個女仔——阿澄。佢同阿澄好 close，成日去街﹑睇戲﹑食飯，但係我知道阿澄其實對佢冇感覺。」
「而我見到阿基同佢行得咁埋，心有不甘，就希望做啲嘢去令阿基唔再重視阿澄，之後我就可以同佢一齊。」
「於是，我向阿澄講咗個大話，話阿基同其他人講，話阿澄你鐘意佢。」
「於是阿澄就大發雷霆，鬧阿基自作多情，話唔會鐘意佢呢啲咁度縮嘅人。」
「結果因為呢件事，阿基就唔敢同其他人有來往，尤其係同佢唔同階層嘅人。」
「佢一直以為阿澄係元兇，但其實我先係主謀。」





「於是我希望可以盡我最大嘅能力，去令佢開心，令佢去相信其他人。」
「咁點解你唔同佢一齊？」
「因為我知道我犯嘅過錯太大，我冇辦法去彌補......同埋我怕如果同佢一齊，當佢知道真相後會更加難受，我唔想再傷害佢，所以......」
「所以你就想疏遠佢，令佢唔記得你？」
「嗯。」
「所以你選擇同我一齊？」
「我......唔係純粹因為咁樣先同你一齊，我——」她急著解釋，卻一時語塞。

「你知唔知你咁樣做，係同時傷害咗兩個人？」我看著她，輕聲說道。
她似乎不明白，只抬頭望住我。
「對阿基嚟講，佢以為你會係唯一一個願意接受佢嘅人，結果你同阿澄一樣，離開咗佢。」
「對我嚟講，我就好似係阿基嘅替代品——你不斷將我當係阿基咁對待，但我叫 Joseph，唔係叫何永基呀！」

她聽見我如此控訴，頓時泣不成聲。




「對唔住呀......」她低頭哽咽著。
「對不起」總是傷人的。
「我唔想聽你講對唔住，我想你誠實咁面對自己嘅諗法。我亦都唔希望因為一己之欲而令我嘅朋友受傷。」

然後我們靜了下來，空氣中瀰漫著一股寒氣。

此時我打開手機，卻在 instagram 看見阿基貼出一幅照片。
是一個收拾中的行李箱。
我沒有說話，只是把手機遞向她。
雙眼通紅的她看見後，就拔腿跑回住所。

我就這樣看著她的背影從我而去，並漸漸從我視線中消失。
無助的我緩緩收起手機，就這樣坐在長椅上，雙眼漸失焦距。

一陣冬風吹過，只得我一人在這寂靜無聲的公園內。




說是不想失去她，但要離開的人，你總無法阻止。