心的距離: 27. 聽別人故事

吃過晚飯，在睡房躺著滑手機，剛好看見阿諾在 instagram 發文。
說是發文，是因為內容真的很長，是名符其實的千字文，並配上一幅全黑的圖片。
我還沒有看過內容，就匆匆撥一通電話給他。
「喂阿諾，你喺邊？」
他欲言又止，只說道：「唉，尖咀海傍。」
「得，我即刻嚟。」
然後趕忙通知肥仔然。

星期日的海傍人山人海，不少愛侶和遊客在路上拍照，出海遊船河的人亦不少，使我跟肥仔然更難找到阿諾。
我跟他到處張望，終於看見一個孤獨的身影坐在文化中心外的階梯，在週邊萬千對伴侶中份外顯眼。




我們隨即跑到他身旁，他一抬頭，是一副落寞的臉容。
他喝過兩口酒後，就逕自說起來。

「我同佢嗌交，今次仲話要分手。」

說實在的，我頗為意外的。從肥仔然的表情看來，他想法跟我一樣。
阿諾的女友溫文有禮，他們在一起這麼久亦甚少聽聞過吵架，怎麼今天卻吵起來了，還說要分手？

他繼續說著：「佢話我唔勤力啲賺錢，結婚又拖拖拉拉，話浪費佢時間喎......」
「......咁我都係一個編輯仔啫，賺得幾多錢？我係無佢咁叻，一畢業就搵到好工，一路扶搖直上，咁唔代表我唔努力啫。」




他喝下一口酒。
「唉，都去到談婚論嫁啦，即係話我哋打破咗現實嘅距離，去拉近大家之間嘅距離啦，點解佢嚟到呢刻都唔體諒我？」

想不到阿諾原來受到這番委屈。
但撇開這事，還想不到他能夠跟女友開花結果。

他放下酒瓶，微微抬起頭，說著從前：「以前讀大學嗰時，就算無錢要食頹 can，佢都會同我一齊食。到出嚟做嘢，佢都無嫌棄我只係個寫稿仔，一樣照介紹我畀佢啲朋友識......」
「......只係一講到將來，講到錢，就咁。」他聳肩。

「我都諗緊好唔好繼續咁拖落去，我唔想佢鬧我，我都唔想佢繼續將青春押喺我身上。」




他看著我跟肥仔然，似是在詢問我們的意見。

我望著他，只問道一句：「咁你仲鐘唔鐘意佢先？」
他似乎被我銳利的問題有點嚇倒，遲疑了一秒才答道：「鐘意！梗係鐘意啦，如果唔係點會同佢講結婚？」
「咁就得啦，」我喝了一口啤酒。「咁你就畀啲決心出嚟去說服佢，你真係會做到。」
「有拖拍，有婚結，總好過一個人，我諗肥仔然都認同。」肥仔然立即點頭。
阿諾不作聲，我於是繼續。
「你唔同嗰時我同阿澄咁呀，佢係用有無錢嚟拒絕我，但係既然人哋都接受咗，肯同你一齊，你無啦啦放棄咪好可惜？」

我不斷說服阿諾去跟女朋友繼續關係，除了是不願看到兄弟失戀，更重要是，我希望看見一對能跨越界限﹑距離和現實的情侶可以白頭到老。
我這孤家寡人，從前因阿澄而對前兩者懷疑，現在卻因為 Kathy，對全部都懷疑。
若他們真能渡過這一關，於我而言，絕對是一枝強心針。

「我唔想兄弟嘅大好姻緣因為呢啲小問題而告終。」我拿起酒瓶，對住阿諾說，然後又喝一口。
「阿基就講得啱啦，你哋咁辛苦先行到呢步，而家先嚟分手？你自己都唔甘心啦。」這時肥仔然終於插口。




阿諾低下頭默默聽著，喝著酒，然後說道：「好，我知點做。」

看到這樣，我滿意地點一點頭。

常言道「能醫不自醫」，我說得再好，都未必做得到。
至少對著 Kathy，我除了混亂跟茫然外，想不到任何形容詞。
甚至乎，我跟她是甚麼關係亦無從談起。

所以我不禁問了一句：「不過我想問吓，點解會搵一個 A0 嘅人去解答你嘅感情疑難嘅？」
阿諾只笑道：「問咁多，飲啦！」
看到阿諾這樣暢懷就放心了。
我們三人隨即碰杯，把酒咕嚕咕嚕的喝著。