心的距離: 5b. 褪色的瘡疤（上）

b

小巴回到觀塘站頭，發叔示意我駛前，讓我先上客。
薛文穎從發叔的小巴上走下，又急步上前。
我遂開門，說：「哈囉林嘉欣。」「唔好叫我林嘉欣啦，因住成街都擰轉頭望你呀！」
我大笑。
「叫我 Kathy 啦。」她繼續坐在我身後的通道位，說著。

 我倆都默不作聲。





 直至車程後段，車上只剩寥寥數人。
「阿基，你知唔知女神阿敏就嚟結婚啦，但佢老公好樣衰。」她無故說著。
我笑道：「係咩，呢啲八卦嘢我都無理好耐囉.......乜你仲有同佢地聯絡咩？」
「無呀，我都係睇佢 ig 先知......嗱，你睇......」她把手機遞上來，螢幕中是阿敏和未婚夫的婚紗照，又抱又親嘴的，狀甚甜蜜，羨煞旁人。但丈夫的確長相平平，還有點像百兩金。
我緩緩說道：「最重要係，佢鐘意就得啦。」
Kathy 見我反應一般，又說：「以後見你係中學都幾活躍，搞乜 grad 之後就銷聲匿跡？」
頓時我覺得她正在刺探我，又見車上有其他乘客，於是只敷衍說道：「哦，大學忙呀嘛，u life 嘛哈哈。」
似乎她對我的說話存疑。

此時小巴又一次來到昌華街，最後的乘客亦下了車。




Kathy 當然沒有下車，並輕聲說道：

「我覺得你嗰次同阿澄反咗面之後就有啲唔同咗。」

我臉色一沉。果然，她一路舖排的目的，就是為了問我這件事。
我不解她舊時事重提的原因，但她的問題就這樣擺在我面前，銳利而一針見血，使我避無可避。
幸好我背著她，她看不到我的臉容。

說實在，都已是多年前的事情，該放下的都已放下。





於是，我不慍不火的說道：「唉，都咁多年啦，仲未化咩。」
「我係要多謝佢，畀我知道呢個世上，有啲距離係跨唔過嘅。你以為可以，其實只係鏡花水月，係幻覺。你一心動，你就自陷深淵，走唔返出嚟。」我嘆道。