心的距離: 6. 褪色的瘡疤（下）

她一見我如此，即說道：「其實佢嗰時都係一時火遮眼啫，佢之後都同我講話唔應該咁講嘢。」

小巴就這樣停在街口，車廂內只傳來死火燈滴噠滴噠的響聲。

「人火遮眼嗰刻，可以話係最清醒，亦同時係最唔理性嘅一刻。」
我又把手放在司機位旁的欄杆上，並望著 Kathy。
「最清醒係，人會記得返晒所有唔好嘅嘢，講最真心嘅說話；最唔理性係，人唔會理後果，結果往往出口傷人。」
我雙目放空，說著：「我好記得嗰時佢講，『好心你唔好咁自作多情啦，睇戲食飯呢啲我同其他男仔都會做，又唔諗吓自己平時幾咁度縮，食嘢又頹，睇戲仲要問人借錢，我點會鐘意你呢啲咁嘅人，你就偏偏叫肥仔然呀，阿諾呀，周圍唱，仲要有人同我講我先知，你有無賤格啲呀。』

『何永基，我無鐘意過你，而且從而家起，我好憎你！』」





「我以為佢會係唯一一個體諒我窮，真係會願意入嚟我嘅世界嘅人，但係原來係幻覺。」我苦笑道。
「自此之後，唔單止全班，就連隔嚟幾班都知道呢件事。無咩人知道內情，佢地只會係咁話我不自量力呀，成日 ff 呀......我嗰吓真係無地自容，我驚我識嘅人都係咁諗我。
然後仲要拉埋肥仔然同阿諾落水，我就更加歉疚。
我心諗今次真係千年道行一朝喪，平時扶幾多阿婆過馬路，幫你地做幾多功課都無用。我唯有用工作去麻醉自己，於是搏命讀書，入港大。威一次畀其他人睇。
入到去，先發現個個都咁勢利眼，我就唯有同一班背景咁上下嘅同學熟落，互相取吓暖。嗰堆有錢嘅，我都唔敢攀談，最多做 hi bye friend，免得自己有幻想，更免得悲劇重演。

我真係怕咗呢啲人事上嘅嘢，所以我只係諗住做好自己，唔好衰畀人睇，尤其係阿澄。」

我從沒有這麼完整地說過這件事。




我把死火燈按熄，隨即左轉入昌華街。

「但係咁樣，你唔覺得好辛苦咩？」她問道。
「唔辛苦，我習慣咗一個人生活，一個人去做所有嘢。」我淡淡回道。
Kathy 續說：「你係一個人啫，唔代表咩都要一個人去承擔嘛。點解你發生咁多事都要一個人去支撐？
有好多同學其實都已經唔記得呢件事，只記得你成日教佢地 Econ。佢地好多都想知你去咗邊，同埋點解 grad 之後就無晒影——其實好多人都仲好關心你。」她的語氣就像向冥頑不靈的人說教。
我專注於眼前的道路，沒有回應。
「倒不如你問吓自己，你有幾耐無講過件事出嚟？」我繼續沒有回應。但我知道能講出鬱結的快感，就像把瓶頸擠爆一樣，傾巢而出。
Kathy 見不得要領，只說道：「你要知道，其實係有人願意去聽你訴苦，亦都唔介意你嘅家底。但前提係，你要畀人地去進入你嘅世界。如果有人幫到你，令你無咁辛苦嘅，何樂而不為呢？你讀過 Econ，應該明嘅。」
我不解，問道：「關 Econ 咩事呢？」




她支吾以對：「.......Division of labour 呀嘛。」
我說：「Division of labour 好似唔係咁用......」並隨即大笑起來。
她說：「見你笑返就得啦。一陣泊低架車係小巴站，帶你做啲嘢。」
「做啲咩？」我追問。
她露出一抹微笑，故作神秘的說：「嘻，唔講。」