心的距離: Behind the Scene - 01

那邊廂，正等待上客的發叔向門外的薛文穎說：「小姐，上車等呀，佢兩個字後就返到。」
薛文穎遂走上小巴，坐在發叔後的通道位。
發叔續說：「係呢，小姐，你係基仔嘅朋友？」薛文穎：「我係佢中學同學。」
發叔邊點頭邊說道：「哦，因為都好少聽見有朋友搵佢。」
薛文穎不解，問道：「係咩？」
「係呀，佢平時好少提及到朋友。大學嗰時，佢都係一放學就返屋企，都唔見佢出去同人玩。」
薛文穎此時心想：為何這個大叔會如此清楚阿基的生活？
見薛文穎一臉狐疑，發叔才想起未自我介紹：「呀係喎，都未自我介紹。我叫發叔，係基仔契爺。自從佢家中兩老去咗之後，我就睇住佢。」
「發叔你好。即係阿基大學開始就無咩朋友？」薛文穎續追問。
「無記錯係再早啲，大概中五到就無聽佢提起過。」發叔搔著頭，說道。




「中五...... 」薛文穎臉色一沉。
「係呀，以前佢成日同我講同邊個邊個去玩，去到中五就——」發叔聳肩，雙手攤開，一副「我不知道」的樣子。
發叔頓一頓，再說：「小姐，如果可以的話，你試吓開解吓佢，叫佢識多啲朋友，咁有咩事都多個人幫忙嘛。有時見佢咩都自己一腳踢，又無人同佢傾吓，都覺得佢幾辛苦。」
「好啦，我會試下，唔該晒發叔。」薛文穎低著頭說。