「高登情緣」「港產片Feel」有一種愛叫做純愛。: 第十七章

「安仔，你唔好喊啦，你搞到我都想喊埋一份啦！」
 
曼喬喺身旁安慰我，輕輕拍我背脊，遞紙巾俾我，但我停唔到，將壓抑多年嘅苦悶一次過喊曬出嚟。
 
「乖啦，唔好喊啦陣間林小姐出嚟搵你咖啦，見到你咁佢都唔開心啦，你唔係諗住要佢結婚都結得唔開心呀？乖啦，唔好喊啦。」
 
「本來我真係以為自己好豁達，但我唔得呀！」我喊住講。
 
「林小姐見你出嚟咁耐，佢嚟搵你咖啦，唔好喊啦，我哋返去啦。」
 




之後我同曼喬返去繼續婚宴，之後同林佳君兩公婆合照。影相嗰陣，由於我哋企埋一齊，我企喺林佳君隔離，佢細細聲同我講：「肥仔，成皮嘢咁多！發咗呀？呵呵。」
 
「影相啦。」
 
「1,2,3，笑！」
 
婚宴後同林佳君兩公婆道別，我冇再喊啦，反而係曼喬好關心我之後有冇喊，幾番試探性望埋嚟。
 
「唔準再喊呀！」
 




「得啦，冇喊啦。」
 
 
大喊完之後應該重新上路，聽講將感情注資落第二個女仔嘅身上，咁就唔會再記得苦嘅滋味。我發覺我同曼喬之間嘅關係產生了微妙嘅變化。
 
表白容易，收尾難。好似我呢啲孤兒仔，渴望愛又唔敢愛，怕失去所以唔敢爭取。享受同曼喬相處嘅每一分每一秒，因為我知道佢心入面只得Wing一個，佢男朋友都冇辦法擊破佢心中嘅呢座大山，我呢啲角色，又如何闖進曼喬心入面最在意嘅頭三位？如果連頭三位都未必有，更加唔會奢想曼喬會鐘意我。
反正我單身，反正我一無所有，唔會介意離別嘅嗰一日有幾靠近，盡情投入落每一日。
 
曼喬要減肥，報名做Gym，我跟住報名做Gym，明明曼喬就唔算肥，係有啲肉地，佢就成日話影相唔靚。
曼喬話要住得舒服啲，我同佢夾錢租咗元朗錦繡花園獨立屋住。




曼喬要攬住訓，冇問題，晚晚攬住訓。
曼喬話要遊玩香港，我陪佢行均全香港。
 
而我哋行IPHONE，越搵越多錢。高峰期一日試過行二十一次，因為行得太多，我哋每行幾轉都會特登換下衫或者戴下帽等等，費事俾海關認出一日行咁多次。海關分三更，早上一班到中午一點一班人，下午一點到五點第二班人，五點後第三班人，所以我哋會每行幾轉會整色整水換下look，而我亦從短髮佬，聽從曼喬嘅意見開始留頭髮，佢幫我買衫幫我gel頭，將我從一個世界大毒男，變成一個正常男仔。兒走IPHONE令我第一次揸住五萬蚊現金，到第一次揸住十萬蚊現金，嗰陣咁啱爹地媽咪返咗嚟香港，帶埋曼喬一齊去食飯，又係可以製造假像，好似自己拍緊拖咁，
 
趁曼喬去洗手間，我拎咗三萬蚊俾佢哋，佢哋話唔駛，但我夾硬塞落去佢哋嘅行李度。
 
 
「家安，係咪你女朋友？」媽咪即刻捉住我問。
 
「係……掛。」
 
「幾時結婚？」媽咪問。
 
「嘩乜你咁狼死咖？你陣間唔好嚇親人呀講呢啲。」




 
「家安，我見呢個女仔幾好呀，啱咪行埋一齊，結婚啦。」爹地補充。
 
「係呢，你哋返曬大陸，咁香港呢邊，層樓點算？」
 
「我同媽咪會返鄉下住，香港呢邊你好好照顧自己啦如果你幾時想返嚟鄉下探我哋，同我哋講聲，爺爺嫲嫲都想見下你，你唔駛擔心我哋，你俾心機去做嘢，最好就同個呢個女仔結婚啦。你結咗婚我哋就安樂曬啦。」
 
 
「係呀，呢個女仔好呀，好純好乖，娶得過。」媽咪好滿意咁補充。
 
「如果你哋想喺香港住，我家陣都租屋住，有房間留俾你哋。」
 
「鄉下間屋不知幾大幾自在，又大有舒服，有塊田可以種菜，有池塘養魚，之後可以養下雞，總之你唔需要擔心我哋啦。」
 
 飯後，我哋同爹地媽咪道別，之後去行VCD鋪，搵下滄海遺，最後我哋索性買咗一部電視，拎部Notebook駁落去電視，然後晚晚上網喺度煲TVB舊劇集或者亞視舊劇集，如果嗰日大家有咩突然想法就會睇下港產片。日子過得好充實。返工傾港產片，放工睇港產片，得閒去搵港產片VCD，兩個港產片死忠，志同道合想推廣港產片，最後開咗一個page： 




【舊的港產片新的影評】

「香港喜劇電影唔淨只睇周星馳一個，仲有好多好正嘅喜劇值得大家睇返。」本來page用呢一句作為主旨，但曼喬畫唔好啦，等我嚟寫。
 
「人生太短，冇時間俾我哋去睇啲曳嘅電影。80-90年代嘅港產片先係最正。

只要肯用嗰心去感受部電影，每一個人都可以係最佳影評人。睇返以前啲港產片，發掘當中被淡忘嘅亮點。」