「高登情緣」「港產片Feel」有一種愛叫做純愛。: 第十六章
而1月10號，話都冇咁快就來臨。登登登登，我既緊張又興奮，三年嚟第一次可以見到林小姐個樣喇
「九龍灣煌府婚宴專門店」我望住張喜帖喃喃自語。
「安哥，家陣早上七點半，你著齊西裝去邊呀？」曼喬偷偷地笑。
「冇，諗住睇真啲今日個造型係咪冇咁毒。」
「本小姐擔任你造型師，你仲呀支呀佐？陣間去飲溝死女啦。」
「咁溝唔溝到你先？」
「你溝咗啦，今日我就係你嘅女朋友。」
「唔準錫我，唔準同我過份親密，低調啲。」
「下，我戰衣都出埋，deep V，順便幫你勾引埋君君嘅老公呀。」
「不如唔好著啦，低調啲。」
我將十張金牛分別擺落兩個大利是封入面，妥善哋袋好。換返一般裝扮，我同曼喬就去海洋公園玩。我全日嘅心思都不在玩樂，而係不停諗緊見到林佳君應該點樣表現得冇咁柒，點樣唔好出醜，我唔想第一次見面，我就俾佢覺得我成個乞衣咁，我還在意佢點睇我。
五點搭半，我同曼喬就到咗煌府，門口已經見到一張婚紗合照，我即刻拎電話出嚟影低，只見林佳君拖住佢老公，林佳君既唔似劉心悠亦唔似龔嘉欣，而係一個望落幾Young嘅靚女，唔似任何人，佢就似佢自己林佳君。我揸住個份精緻嘅利是封行入場，門口登記完就將封利是擺咗落箱。
「陳家安！」熟悉嘅聲音喺我身後傳來，我回頭一開，就係門口婚紗照嘅女主角，我以為佢會走嚟打柒我添，點知佢笑得好開心咁走過嚟。
「呀君。」唔知點解，見到林佳君，我冇想象中咁驚青，反而係有一種識咗好耐熟到冇得再熟嘅親切感。
「乜你認得我嗰樣？係咪破壞曬你心目中嘅幻想？」
「呵，門口有你嘅相嘛……你都幾靚呀。」
「Hi，我叫曼喬，安仔嘅女朋友」曼喬交戲交得好好，即刻補一句。
「咦，識揀wor，幾靚女。」曼喬笑住繼續講：「陳家安，你唔係搵PTGF下嘛？wakakakaka」福爾摩君又嚟啦，我俾佢識穿，當堂心虛，思路開始窒下窒下。
君君帶我哋入化妝房繼續傾計，但就仲未見到佢老公。
「唔係PTGF呀，真係我女朋友呀！」我俾君君凌厲嘅眼神望住 仲要面對佢蠱惑嘅笑容望住，搞到周身唔聚財。
「我哋拍咗三個月拖。」曼喬試圖幫我解圍。
「死人陳家安！我以後唔會再笑你咖啦，今日係我好日子，玩下唔得呀？你呀有女朋友啦，好心你啦就減下肥啦，仲成個阿旺咁。」君君微笑。
「見到你個高登post啦，林佳君！請ex呀拿，仲寄喜帖俾我……咁其他ex有冇收到你喜帖。」發覺自己同林佳君又好似變返以前咁friend，呵呵。
「講下咋嘛！同埋我只係寄俾你咋，因為我諗係得你先會咁傻走嚟飲咖咋，wakakakaka」
「仲有冇煲港產片呀？」
「冇乜啦，反而鐘意咗旅遊，四周圍去。咦你著呢套西裝幾順眼啵。」林佳君滿意地望住我嘅服飾。
「你唔嬲我啦？」
「嬲呀，咩唔嬲，如果你今日唔蒲頭我就嬲你一世，呵呵，不過見到你之後就冇嬲啦。係呢仲有冇玩鬥地主呀？」
有次佢話唔想同阿哥共用一部電腦，我咪送咗部IPHONE俾佢，自此佢就迷上打機，其中鬥地主就係佢最鐘意玩嘅一隻game。咁我咪開兩個account日日玩鬥地主，儲金幣然後同佢爆房（即係喺遊戲入面開個房間）特登輸金幣俾佢，每次佢收到金幣都好開心，成個細路女咁。我唔鐘意玩咖其實，有幾次特登課金買金幣，再輸俾林佳君。
「冇玩啦，係呢，你啲鼻敏感好啲未？係咪食多啲蟲草就冇事？」
「好啲啲啦，你呢，仲有冇夜晚大叫嘈到屋企人呀？傻仔！」
「冇啦，識咗女朋友之後冇乜啦」
「咁我就放心啦。我要準備化妝啦，你同女朋友仔出去坐下啦。」
「林佳君！」
「點嘛，肥仔！」
「可唔可以俾我對你做三件事情呀？咁多年黎一直想做呵呵。」
「喂，我人妻嚟咖啦，你唔係諗住同你打茄輪呀？青頭仔!」
「我想摸下你個頭，捏下你面豬登，同你握個手。」
林佳君同曼喬聽到我如此小朋友嘅要求，都笑咗。
而我，終於做齊曬三樣，而林佳君竟然俾我一個擁抱，我輕輕喺佢耳邊講：「林佳君，你真人真係好童顏，好有氣質，好索啵。」
「咁你真人都靚仔過相呀。呵呵。」林佳君拍拍我背脊。
「係啦，我同我女朋友俾你咖。」我喺西裝入面拎住兩個利是，交俾林佳君。
「多謝曬。」
我強忍淚水，行返出去，之後開席，林佳君老公現真身，肥肥地，斯斯文文，四眼仔。當我見到佢哋咀咀嘅時候，我戥佢哋開心，但更多係酸溜溜嘅感覺。如果唔係我出身唔好，如果唔係我傻甘甘諗埋一邊講分手。我諗今日個新郎可能係我啦，點會係個個巴打呢。
再傻嘅人都唔會百分百戥ex結婚而開心，點都會有啲失落啦。你估我真係聖人咩？
食過啲乜，我已經冇心機記，之後新人敬酒，我亦飲下我人生第一杯酒，好撚苦呀！
場內開始播放林佳君同佢老公嘅結婚影片，我就同曼喬講不如出去食支煙，其實我根本就唔食煙，但在場咁多人，我又諗唔到咩籍口起身。
「我可唔可以喺你面前喊呀？你唔好笑我冇用呀？我頂唔順啦。」
未等曼喬回應，我已經爆喊，邊有人咁撚柒走去飲ex喜酒咖！既尷尬又心酸。
但我知道，我係打算用呢一次眼淚，去放低對林佳君嘅感情，所以我不顧一切，盡情地喊出嚟。