「高登情緣」「港產片Feel」有一種愛叫做純愛。: 第十八章
諗住走IPHONE賺多少少就打本咗網上生意啦，點知突如其來嘅事情，令如意算盤冇辦法繼續打落去。
嗰日如常行IPHONE 拖住手扮情侶，正當我哋以為又輕鬆過關嘅時候，有個白衫職員，向左方嘅曼喬揮手。
「小姐，你過一過來。」
弊！行埋去一打開背包，就斷正咖啦，雖然唔會俾人拉去坐監，都就要扣留幾小時。素聞大陸海關都係畜生嚟，曼喬咁樣俾人拉入去，點Q知咩事？
輝哥喺背後望住我，打眼色我唔好理，照行啦。但係我實在好擔心曼喬，於是快步跟上，拖曼喬佢嘅手，示意佢唔好緊張，有我喺度。我假意話我哋趕時間，請問皇崗口岸點去，我諗住分散嘅職員注意力之後跑，點知個職員一手拉住曼喬個背包，再氣定神閒答我可以搭巴士去。
「IPHONE6S，原封，兩個包都是。」職員打開我哋兩個嘅背囊，搜到IPHONE。
「呵呵，還給我裝？問路呀？」頭先個職員得意地行過嚟邀功咁款。
就係咁，背包俾人沒收我同曼喬俾人扣留喺入面，而且要被逼交出身份證回鄉證同電話，我哋行到入邊，嗰班海關兇神惡煞咁望住我哋，我地以為入房間等候，點知就俾海關大聲喝停，原來只能夠企喺度，冇得坐。
「你做乜唔走呀？點解要跟埋我入嚟？」曼喬問。
「我想陪住你……我驚你驚呀嘛。」
咁係呀嘛，一個女仔俾人的入黎，點知班大陸佬係咪貪圖女仔嘅美色搞你咖，大佬呀，貨冇咗咪賠錢lor，你緊要啲！
「我冇你咁細膽啦，只不過……你喺我隔離我真係好淡定，呵呵，頭先俾人拉埋去check我都冇驚呀，因為你拖住我手。」
而我同曼喬就係咁俾人罰企三小時，期間越嚟越多其他水貨客俾人捉入嚟。之後就有個職員開始逐一盤我哋。係咪幫人走IPHONE
輝哥教落，一定係話自己買，唔好話幫人走，否則貨物會被沒收，冇得交返罰金。
我咪同曼喬再三吩咐，一定要話自己買。點知個職員就開始兇鳩我哋
「我們留意你們兩個很久了，是幫人帶貨的，你們不坦白我們就不讓你們回香港，這裡是內地！」
繼續兇，我同曼喬都係死口唔認帶IPHONE，就係咁，11點職員收工，其他水貨客都放走曬，偏偏唔放我哋走，上廁所都冇得去。
燈又熄曬，人又走曬，鎖住我哋兩個喺房間，冇凳冇剩，兩個人唯有坐喺地下。
「冇嘢嘅，佢啲都係想貪我哋批貨，聽日會冇事。」其實我不嬲怕黑，我係扮鎮定咋。
「嗯……」留意到大家冇乜力咁，因為大家都冇食野又冇飲水
大家坐喺地下，佢挨住我膊頭，訓咗一晚寒冷嘅地板。
點解大陸人咁鐘意嚟香港走水貨？除咗貨品品質有保證，最重要嘅原因都係因為香港嘅貨物唔駛俾稅，就舉個例子咁講，IPHONE6S，喺香港買平過喺大陸買幾百蚊，所以喺香港買再拎返大陸，至少都賺幾百蚊，扣除俾水貨客同意外俾海關沒收嘅風險，呢條水都係賺嘅。所以點解大陸有得買IPHONE，都會有咁多人嚟香港買IPHONE，就係咁解。而大陸海關本身就係一班貪污機構，沒收咗啲水貨再私下賣俾其他人，所以大陸好多WeChat號係賣正牌貨物但平好多。而海關最鐘意梗係沒收IPHONE，等貨主交罰款，即係如果批貨市值4萬，海關就罰你2萬，你俾錢就可以拎返啲貨。
曼喬俾人捉，貨主會俾錢，但係我主動走入去，我就要賠返一半錢俾貨主，咁第二朝職員的確放咗我哋走，我第一時間去搵輝哥，點知貨主都喺曬度，就咁望落去，真係成班內地古惑仔咁款。
「即係兩批貨都俾人截咗呀？」貨主皮笑肉唔笑。
「係。」
「咁賺埋都唔夠蝕啦，我啲0靚見到你係主動行埋去海關度wor。」
「Sorry！」我即刻扮死狗，班人真係好惡。
「我屌你老母啦，個個好似你咁撚on9，我唔撚使開Team啦！」
「咁……我賠返一半錢……」
「宜家唔係賠唔賠錢，係你搞撚到我批貨俾海關拖住呀，你麻煩到我呀屌你老母！你係咪傻咖？係人都拿拿臨走，你仲撞埋去海關度。拍拖拍撚到傻撚咗呀？喂阿輝，你食撚咗屎呀？請埋啲智障兒童返工。」貨主幾近咆哮咁制，
我望住輝哥，輝哥都係怒啤我，好嬲我琴日做埋啲咁嘅舉動。
「李生，安仔會賠返個三萬蚊，希望你唔好咁嬲啦，麻煩到你真係唔好意思。」輝幫口。
「仲有呀，條女點撚樣行貨咖，咁都俾人捉到？真係屌你老母冇啦啦跌咗三皮嘢。」
我心諗，行貨預咗有風險咖啦，咁都要屌？輸打贏要呀？我以為曼喬會驚到喊，點知佢仲鎮定過我，冷靜地講返成件事，最後貨主話我要分擔返三萬蚊罰款，就係咁。
等到貨主行開，輝哥即刻開我波。
「安仔我冇撚得罪你呀？」
「冇。」
「咁你咪撚害我呀嘛，自己衝埋去俾人收貨，喂，我以後喺呢行實，人哋笑我唔使教仔呀，仲有貨主搵我帶貨嘅？」
「Sorry呀，我驚曼喬俾人搞，我先陪入去，我都諗住自己賠錢咖，冇話唔認數。」
「有乜撚嘢好驚呀？最多咪扣留一晚，班海關擺明係想疲勞轟炸你等，恐嚇你等你哋認幫人走貨，咁佢哋就可以食曬你成批貨，我一早同你講清楚咖啦。」
「係，我知，但我唔想曼喬一個人面對啫。點知班大陸佬會點咖！」
點屌我都得，但係關乎曼喬安全我點可以唔理呀，我睇佢仲緊張過睇我自己，曼喬嘅安全係我最關心，錢wor，冇咪再搵過lor。
「咁仆街啦，你哋拍拖又好，乜撚都好，咪撚害我呀嘛！我喺呢行仲點撈落去。唔係賠錢咁簡單，係以後冇人搵我帶貨咖啦！安仔！」
我意識到我嘅所謂英雄護美，其實真係闖了大獲。但係我冇後悔過，雖然3萬蚊陪曼喬渡過一個黑夜，係好貴。但我覺得呢3萬蚊絕對抵俾，時光倒流嘅話我一樣會咁做。
返到香港關，我即刻排銀行拎返三萬蚊輝哥，之後輝哥就嬲爆爆走咗，而曼喬忽然攬住我，我有少少意外。
「Sorry呀安仔，累你賠錢又俾人鬧……我陣間俾返三萬你呀。」
「傻啦，最緊要你冇事。」。
自此之後，我同曼喬就冇再走IPHONE，塞翁失馬焉知非福，曼喬呢個淘寶專家開始帶我開啟網上生意，拎啲淘寶貨寄俾外國買家，例如電話配件電腦零件等等。
而曼喬本身有肉地都索，隨著佢日日做Gym減肥，面部越嚟越瘦，輪廓越嚟越精緻，望住曼喬，真係覺得佢成個藝術品咁
「KK可否不要瘦，陪我終老？」係我陪曼喬做Gym陪佢跑步嘅心聲。每次感覺Kiko又瘦咗啲，我開始有啲不安，因為佢距離回歸呀Wing嘅懷抱又近咗，到時候應該得返我獨守空房。
個陣時TVB播緊套【EU超時任務】，我晚晚陪曼喬睇呢套不斷loop回到三日前改變歷史嘅電視劇。而我亦每晚FF 如果我係王浩信，如果曼喬係朱千雪，如果高登有【高登超時任務】，咁就好啦，我可以不斷穿越返去，一早應該喺高登瘋狂講港產片同放港產片vcd啦，我亦唔會on99返埋啲倉務工，人生有咗寄託之後就唔會再滿足皮幾嘢嘅人工，我可以去玩淘寶，可以一日返三份partitime，儲錢租錦繡花園獨立屋，唔需要再擔心家變同大耳窿。
可惜，我搵唔到穿越時空嘅機會呀，我個膽大咗好多，但已經來唔切啦，家陣曼喬每日都喺度講呀Wing點點點好，我唔想聽呀，但又冇辦法，我又要祝福佢，然後出力鼓勵佢。
呀Wing揸靚車，住靚屋，事業有成，靚仔，我？不了。
每晚陪曼喬跑步，我望住佢，我一度想同佢表白。
「不如唔好搵返呀Wing，俾個機會我啦，我鐘意你。」
但係，如果我明知道曼喬咁大決心，都拋出呢一句，呢啲唔係叫有勇氣，而係向絕交出發，盞以後friend都冇得做。
跑跑下步，曼喬都拎出電話入面嘅相比我睇，分享佢同呀Wing甜蜜嘅點滴。我心酸溜溜，但又要扮係興奮嘅心情，同佢講你哋好sweet呀。
每次提起呀Wing，曼喬都好似幸福小女人咁，笑得好甜。比起同我相處時候嘅開心，更加開心。我發覺我成身嘅皮膚都好似俾醋浸住，成陣酸味同腐蝕皮膚嘅酸痛。
我真係一啲機會都冇？Wing好過我一百倍？每晚攬住我訓都係當我替代品嗎？對我一啲感情都冇？
哈哈哈哈哈哈，係咁咖啦，唔係點呀？高級兵嘅福利咋，你陳家安呢個死傻佬，仲喺度FF 曼喬真係會俾你感動同你喺埋一齊，冇撚可能咖啦。全力協助曼喬追返呀wing啦。
於是我教曼喬煮嘢食，人哋話留住男人嘅胃等於留住男人嘅心，亦係冧仔必備嘅技能。曼喬學嘢好快，基本上佢煮嘢望完一次就識整，佢話common sense咋嘛，第一次就記得咖啦，仲有食過就估到點整咖啦。
原來我先係喺關公面前耍大刀嘅人，曼喬煮嘅嘢仲好食過我。
我哋會一齊上成人台入成人group，留意下啲人講性愛必殺技，人哋話維繫感情係需要性，咁技巧越好感情咪越好。所以我同曼喬一齊mon post，學嘢。
「安仔，你係咪鐘意咗我呀？」曼喬有日睇緊電視，忽然古古惑惑問我。
「冇wor，你唔好屈我呀，講清楚呀。」呢句開始變成我口頭禪，我知道曼喬又喺度玩弄毒男，呵呵。
「咁你做乜對我咁好呀？仲唔係暗戀我？」
「我不嬲都對朋友咁好咖啦。」
「係咩？呵呵。」
唔表白，係我唔想連friend都冇得咗，以後佢返到呀wing身邊，返工都可能同我WhatsApp同我傾下電話呢，好多人話愛情只得三個月熱戀期，愛情之後會變成感情，所以夫妻唔一定係天長地久，但摯友可以天長地久呀，我……想要天長地久呀。
「咁我搵返wing，你會唔會好sad咖？冇我陪你，嘻嘻。」曼喬問。
「唔好FF到自己咁大影響力啦，我呢啲正人君子嚟，唔會對人妻有非份之想。只不過冇人陪我訓，夜晚我要開燈訓啫，同埋可能又會大嗌啫。」車，明明心入面得呀Wing，但曼喬又成日撩我，搞到我真係差啲就表白，表白後關係係咪over，然後大家絕交，block我WhatsApp，byebye，呵呵，劇本應該就係咁，毒撚係追唔到公主，最後連朋友都冇得做。
「林小姐都結咗婚啦，你唔搵返嗰女朋友？定係鐘意咗第二個女仔呀？係咪我呀？」
「冇呀，早抖啦。」
曼喬日日做Gym，越嚟越瘦，Gym好多仔都撩佢。而我係呢啲陪練守護兵都好似瘦咗，咁有一日我鼓起勇氣照鏡，直視自己。須知道平時我照鏡時眼神總是閃閃縮縮，驚聚焦望到自己個七look，咁今次我就聚焦望一望自己，咦，真係塊面冇咁肥，輪廓返曬嚟。
我咪問曼喬幾時追返呀Wing，曼喬話等佢對腳都瘦埋，佢要有長腿童顏瘦身咁先去搵Wing。但明明就已經好多狂蜂浪蝶追住佢要電話，行行下街都俾人撩。但曼喬選擇攬住我手臂咁，扮我女朋友。我諗個每一條我哋經過嘅地方都好多人妒忌我，因為好多人唔抵得咁索嘅曼喬拖住我呢個七咕嚕。
但醜小鴨減肥後，艷遇來了。有日有個網上客親自拎我屋企攞貨，我都話擺低喺寄放店等佢拎，因為我不嬲唔鐘意見人，點知佢就話嚟我屋企拎，因為佢近我屋企。大家WhatsApp傾都以為係佢男人，點知一黎到我屋企門口，我見到有個大波低胸少女。
sorry冇辦法，唔係特登望，但視線直接落喺佢對波上，個下衝擊真係大。而我呢啲世外毒L品種，意外得到佢嘅獵奇心態，本來一單冇講冇笑既交易，短短十幾分鐘因為見到面之後而打開話題。其實我係租錦繡花園，唔係買錦繡花園，唔係諗住我有錢所以放電呀？我感覺佢眼神真係好鬼。唔直接望佢對眼，佢啲眼神都會追蹤地掃到我體無完膚，好似電流行過我，所以肯定佢係放電。
「蔡小姐，你點點佢，啲貨齊咖啦。」
「陳先生，你一個人住呀？」
「同女朋友住。」毒L梗係把握機會拎返啲自信啦。
「其實，我都係住呢頭，不過未見過你嘅？」
錦繡花園其實都爭係幾大下，大家同一個花園撞唔到都唔出奇，但係佢話佢都住錦繡花園，咦，咁做乜鳩電我？我誤會咗？
唔係wor，我有朋友話我，我呢個類別，蒲妹呀或者有錢女會對我有興趣，因為佢哋多數接觸公子哥們同青年才俊，好少接觸我呢類傳奇毒L，仲話如果我肯多啲去蒲，一定溝到女咁話wor。
但我嘅膽實在太細，點會去蒲呀。
「哦，唔知呢，咁多謝蔡小姐你，下次有機會再合作。」
咁我想送佢走費事夜長夢多，點知佢就撩我繼續吹水，咁啱曼喬又唔喺度，我當堂陷入思想的困局。
「做咩呀，趕我走呀？」呢個大波妹真係妖艷，舉手投足都散發一種妖味。
「唔係，費事阻你時間啦。」我都唔知自己講乜撚野好啦。
「唔阻呀，唔請我飲下嘢？」咁主動做乜，呢度我屋企wor，毒L俾人反客為主。我當下真係想WhatsApp 曼喬求教，但係佢出咗去送貨……
「可樂，橙汁，牛奶，你飲咩？我拎俾你。」
「牛奶。」
之後我Hea佢，佢答一句問一句，之後冇癮走咗。
我諗諗下，我成功擊退一個主動嘅女仔，證明我係有market咖，我唔要咋。
嘩，經此一役，信心又增強咗少少！曼喬返嚟我即刻同佢分享呢單嘢。
「毒L咪FF啦，人哋點會對你有興趣呀，你食飯流鼻涕，出街自拍都驚，媽咪救命呀好好笑呀！」