「高登情緣」「港產片Feel」有一種愛叫做純愛。: 第十五章
之後同曼喬去啲精品店，曼喬一次過就買15個水晶球。如果唔係我阻止佢，佢真係可能買曬鋪頭所有水晶球返屋企。之後我哋買咗個蛋糕，一齊去淺水灣沙灘。實不相瞞，係我第一次去沙灘，我哋去嘅時候已經係七點幾，沙灘已經冇乜人，我哋望咗個空曠啲嘅位置坐低。曼喬開始拎啲水晶球圍住我哋，配上點著嘅彩色蠟燭，圍成一個圈。
曼喬喺圈圈外圍用樹支響沙灘上劃上一段字：
「KK Love Wing，Wing Love KK.」然後畫多個心心符號。
自拍啦，up上Facebook同IG啦，我望住手機，佢up咗張水晶球圍圈圈嘅圖。
我成碌木咁坐喺度，唔知做乜好。而曼喬繼續好有心機地擺設地上嘅嘢。
「安仔，Wing一定好鐘意我呢個擺設。」曼喬笑住咁介紹佢整嘅傑作。
「一定啦，咁靚。」
咁擺曬啲蠟燭喺蛋糕度，唱生日歌，之後曼喬許願，切蛋糕，食蛋糕，我都覺得好正路。
咁所有嘢up上Facebook同IG，自然有好多人會送上祝福，而曼喬竟然喊咗。而佢隊部電話俾我睇
「阿wing Online緊……佢睇到我嘅圖，但佢都冇like post冇同我講生日快樂……我就成個傻婆咁set得咁靚……點解要咁絕wor……分咗手就唔可以關心下我同我講生日快樂？」
「唔好咁啦，最多我陪你減肥，我陪你遊玩香港，之後再陪你追返你個ex啦。」見到曼喬喊我又開始不知所措講嘢都變得無厘頭曼喬亦順住情感大爆發，繼續講佢同Wing嘅純愛故事，我唯有借個膊頭俾佢挨下，俾佢盡情發洩。呻完，喊完，我哋收拾沙灘上嘅嘢，之後就返咗我屋企。明明我係訓sofa，曼喬又拉咗我入房，仲攬住我訓。可能係熟咗，可能係我唔知點令女仔唔喊，我冇乜咁抗拒了，如果有人問我第一次攬住女仔係咪感覺，我會話，我隻手唔知擺邊度，我冇理由帶住感情地順住捉佢背脊掛，於是我嘅手就懸空咁款。同埋，曼喬塊面貼得我好近，我好驚自己塊面掂到佢，感覺會整污糟佢。
樹窿，水泡，好朋友，我應該做得好稱職嘅。之後我亦好快就訓著咗。
第二朝早我早起身，趁曼喬未訓，我伸手去拎電話上高登問下巴打，我想知道一個正常男人遇到我呢個情況應該點做？推開曼喬自己躝返去sofa訓，定係陪佢訓？佢對我冇男女感情wor，但我又俾佢攬，我咪好似個枕頭咁？只不過我有體溫。
點知個post變成熱門post，好多巴打恥笑我。
「唔係掛？有得食唔食？你係咪男人嚟咖？Sosad！」
「做兵唔緊要，但做兵唔攞著數，你簡直係兵界之恥369」
「可能樓主性無能呢。」
「唉樓主呢啲死毒L，條女擺明當你水泡你仲以為佢冧你呀 Sosad」
留言太多，睇到我好唔開心。當然我唔會同班巴打講，其實我係一個處男，我唔識個啲嘢咖！我相信如果我講埋，呢單嘢應該會繼續俾人大大力恥笑。
我又走去睇下個個呀Wing Facebook，只見佢琴日都有出post喺度講車，仲同女仔留言傾得好開心咁。
哦……唔怪之得啦，曼喬睇到肯定情感大爆炸，係大爆炸啦，仲唔喊到花容失色咩。曼喬掛住嘅人係呀wing，而我掛住嘅係林佳君。
「……二零一六年一月十日，晚上六時入席……」我特登換個大銀包就會為咗裝住呢封喜帖，日日拎出去望下，驚死唔記得咁。
如果老尷地出席EX嘅婚宴，仲封一萬蚊人情，會唔會俾人恥笑？我擺上高登講係咪會轟動全港？呵呵。當然，我唔會上網講嘅。把最後嘅疼愛擺落人情度，而我人生第一次著起西裝，就係為咗去送上祝福。
我係諗，林佳君會係乜嘢樣？佢成日話自己童顏兼有氣質，劉心悠？龔嘉欣？林嘉欣？泳兒？識佢咁耐，我真係冇辦法幻想佢係劉心悠，佢講嘢咁似慈雲山king姐。
見面後我嘅開場白同祝賀說話，應該係咁點好？
「Hi，君君，恭喜你呀！」
「君君，你今日好靚！恭喜曬。」
「君君，祝你哋白頭到老，幸福美滿。」
……
其實我好想同佢講一句不適合出現喺婚宴嘅說話：
「Sorry！我就係個個浪費你兩年寶貴青春嘅世界大毒L。」
呵呵，我諗呢句嘢擺喺心目中算啦，反而係想知佢會同我講啲乜？
「你都幾唔知醜咖wor，你夠膽嚟！」
「本小姐今日已為人妻，請你唔好再喺網上提及我啦！」
「點嘛？拖條女過嚟示威呀？睇死你都係搵ptgf咖啦。」
……
為咗做一萬蚊人情，我更加投入到走IPHONE嘅工作當中，每日同曼喬一邊行一邊傾港產片，日子過得幾寫意。
自從嗰晚曼喬攬住我訓之後，佢就晚晚都要我攬住嚟訓，然後喺度要我講故仔，好彩我係一個有故事嘅男仔，真係大把故同佢講。唔帶住感情去攬，係咪就唔會有嘢？浸過鹹水嘅女仔，係咪當攬攬只係一種平常嘅行為？好似啲鬼佬鬼婆見面會錫錫。攬嘅第五晚，我曾想過輕輕推開曼喬。但係，諗諗下，佢可能都係當我係呀W（我哋稱呀Wing嘅代號）咁嚟攬，我都可以當佢係林佳君嚟攬嘅，然後心入面在盡訴心中情。
我同曼喬熟咗，亦開始打打鬧鬧，我冇咗當初驚佢嘅感覺，大家就好似識咗好耐嘅好朋友咁。隨著我哋幾乎日日返工，銀包入面嘅錢越嚟越多，當我以為女仔都愛買名牌嘅時候，點知曼喬鐘情於淘寶，仲自封淘寶MK妹。
「我真係好pround of我曾經係一個MK妹，著踢拖著背心穿耳環四周圍玩！你睇下高登，以前就成日恥笑MK，但當MK開始絕跡，佢哋就開始懷念MK，MK妹瞬間上曬神檯。我天生就係代表MK，你睇下我個名，Man Kiu，曼喬，縮寫咪就係MK！嘻嘻。我好愛MK好愛香港。MK唔代表係學壞，只不過係一種生活習慣咋，就好似紋身咁，唔通紋身就代表係古惑仔咩？MK係一種精神，我哋唔會羨慕韓風，因為我哋有自己嘅MK文化。」前MK妹曼喬為MK呢個族群作出評論。
「駛乜買名牌啫，你睇下，淘寶一對耳環幾蚊雞，平靚正，我要掃貨呀！掃到盡頭埋單都係幾百蚊咋。有時候我情不自禁，好想高呼馬雲萬歲淘寶萬歲呀。」現淘寶專家曼喬為淘寶嘅好處作出評論。
不愛名牌，只愛淘寶嘅MK妹，幾有趣。我真係呢一世都冇諗過，毒撚可以同MK做到朋友，我以為毒撚同MK係代表敵對嘅階級添。我以前對MK好有偏見，我以為MK就係嗰啲爛仔，生活混亂嘅人。原來唔係呀，對人有偏見而唔去深入了解對方，係唔啱嘅，MK原來都有好多好好嘅男仔女仔。
曼喬，肯定係一個好女仔，呢啲係相處落先知，原來佢鬼馬得嚟又好純情。