「高登情緣」「港產片Feel」有一種愛叫做純愛。: 第四章

倉務啲同事都叫我技安。我肥肥哋，我髮型最大嘅特色就係短無可短，同埋我真係好鐘意唱歌，但我歌喉一出，啲人多數都笑到肚痛。到底係乜野魔力會導致成咁，我係唔會承認自己唱得好難聽，因為好多人都會點歌叫我唱。
 
「技安，唱首越難越愛嚟聽下啦！」
 
「我墮入情網，你卻在往外看，始終不釋放……」
 
「哈哈哈哈！」
 
然後大家起哄啦，歡呼啦，成個休息室充滿快樂嘅空氣。我唔但只唱歌會令人爆笑，我講嘢都會令人爆笑，同事見到我都好開心，男嘅會搭我膊頭，女嘅甚至會撬住我手臂，我就係呢間公司嘅開心果，冇人見到我係唔想撩我吹水嘅。
 




呢個亦係我會做咁耐倉務員嘅第二個原因，因為開心，又搵到錢，搬嘢都大把人幫我手，普通人會覺得返倉務好難挨，但我好肯定我返得好開心，同我一齊返工吹水嘅朋友都好開心，所以唔會度秒如年，而係快樂不知時辰過。
 
每朝早五點幾放工，離開公司搭的士返青衣地鐵站，天都未光，我亦唔算好眼訓，望住周圍嘅景色，真係幾好feel，尤其喺搭巴士經過青馬大橋，我覺得好靚。我屋企人話做倉務冇前途，但前途係乜野嚟咖？食唔食得咖？我月入萬三蚊，計埋有時返早更再多三千蚊，最緊要係開心錢嚟，同事仔好錫我，成日請我食嘢飲嘢，咁嘅工夫復何求呀？做人要知足常樂，冇前途點都好過有前途但唔開心啦。
 
我唔駛呃人又唔駛俾人陰，呢個世界爾虞我詐太多，返倉務難得可以感受下冇紛爭，Peace & Love，讀得書少嘅人可能仲少煩惱，因為唔需要去計較太多無謂嘢。搵到嘅夠用咪ok，人哋住豪宅揸林寶堅尼我冇必要去羨慕，我住公屋一樣可以好知足。
 
廢青？我唔認為我係，至少我喺屋企係一個孝順仔，出到去亦能夠帶到歡樂俾識嘅人。
 
但係，我腳踏實地，樂觀做人，唔代表呢個世界會停止送啲烏雲俾我。我爹地媽咪雖然都錫我，但佢哋本身都有陋習，爹地鐘意賭，媽咪鐘意酒，所以就算我脫離咗婆婆嘅魔掌，我都仍然要生活喺家嘈屋閉當中。十年前爹地已經破過一次產，我哋已經搬過一次，今次惹埋新嘅第二班大耳窿，恐怕又要申請破多一次產。
 




所以我第一次睇杜琪峰同韋家輝嘅作品【愛的世界】，代入感太強，喊到嗰心都漿住漿住咁恍惚跳唔郁咁。同樣係講大耳窿，同樣地有個慈父但因為借咗一筆大耳窿搞到成頭家立立亂。
 
果然，當我喺房間訓覺嘅時候，爹地媽咪返咗嚟，公屋係咁，關住房門一樣聽到曬廳出面嘅說話。房門外又世界大戰，爹地媽咪又喺度嘈。
 
「賭賭賭，你就嚟賭到攬住我哋一齊跳樓咖啦，家陣仲要惹埋大耳窿，今次死梗啦。」
 
「借住五千蚊嚟，今晚跑馬呀，我刨定一條三串一，中梗！到時候一鋪搞掂。」
 
「你咁有把握你唔駛輸到借大耳窿啦。」
 




Knock Knock Knock，老豆果然借錢不遂，就搵我補飛，我拿拿臨起身將銀包嘅2000蚊拎出嚟。開門。
 
「家安，我想……」
 
「得咖啦，我同你唔駛講嘢，一世人兩仔爺有你有我，呢度2000蚊，3串1都夠找數咖啦。俾心機，大不了搬屋。」
 
「我真係冇你哋兩仔爺咁好氣，我返工呀我冇眼睇呀。」老母正想走，我攔住佢
 
「媽咪，爹地都唔係第一次申請破產咖啦，一家人，有乜難題咪一齊解決，最緊要大家喺埋一齊，食粥又好，訓橋底都好，一樣開心。」
 
「係呀，申請破產，啲大耳窿唔會刮到你呀，一早講過借銀行都冇咁大件事，邊有人會走去借大耳窿咖？」媽咪火燒心嬲爆爆江完，好大力咁拉上鐵閘走人。
 
世界大戰，停戰！老豆拎住舊錢撇咗。而我繼續把握時機訓。
 
腦海中浮現林佳君同我講嘅說話：




 
「肥仔，點解啲烏雲成日都跟住你嘅？咁啦，如果有日我哋見面，你送我返屋企，喺樓下我就錫你一啖，改運就靠呢一吻啦。」
 
可惜冇啦，冇得改運啦，可能因為睇得多【吸血貴利王】等港產片，加上我生性驚青，我驚君君寄信嚟俾大耳窿刮到，咁就會累到君君。所以三年感情，我作咗個大話，忍痛同君君分手。