「高登情緣」「港產片Feel」有一種愛叫做純愛。: 第五章

承蒙上天好生之德，我終於唔駛發惡夢，發返個同林佳君嘅夢，雖然嗰夢嘅片段好破碎，但只要俾我覺得係林佳君出現我都已經好滿足。當我起身嘅時候，太陽已經落山，我即刻起身煮嘢食，電話look下高登，然後就到樓下搭巴士返公司。
 
其實我都係一個雙面人，我一個人嘅時候我好容易喊，但返到公司就可以變成第二個人，或者我早已經習慣靠氹人開心拎獲取開心，我見到人哋開心我就跟住一齊開心，係掛我諗係咁，但只限熟人，見到生普人我會莫名其妙緊張，尤其係見到女仔，就會縮埋一舊咁款，可能係天生毒男掛。
 
我搭車返到公司，一班同事爭住撩我傾計，點歌俾我唱，好啦，我咁鐘意唱歌，梗係高歌一曲滿足下歌迷啦。
 
「情憑誰來定錯對 我始終不想去追
寂寞路上遇痴心 相戀也有過痛苦一堆……」
 
我好深情咁唱譚詠麟嘅金曲，但同事們卻笑成一片，可見我嘅歌聲已經去到毀滅金曲嘅境界，我發覺我喺公司從來未能完整唱曬一首歌，因為同事們嘅起哄聲同群笑聲往往掩蓋咗我嘅歌聲，之後大家就會好開心咁離開休息室一齊落場做嘢。




 
我唔認為我係被奚落同被恥笑，因為作為一個開心果，就係要為大家帶嚟歡樂，如果唱歌係我嘅興趣，咁我見到啲人俾我氹得好開心就係我嘅樂趣。所以我當咗自己係喜劇演員，用我嘅肢體語言同鬼馬表情，配搭自己獨特嘅搞笑對白，令到周遭嘅人笑。
 
倉務嘅工作，無非係出賣勞力將啲貨物搬嚟搬去，開頭我都唔習慣，但我一邊唱歌一邊做，就覺得冇咁辛苦，而我美妙嘅歌聲就咁樣被大家發掘，而隨著同大家熟絡咗，越嚟越多人鐘意我。當我帶住敷衍同厭惡嘅態度去返工，永遠覺得時間點解過得咁慢嘅？但係如果換個心態，做好本份，同大家有講有笑，其實倉務嘅工作唔算好辛苦啫。
 
有啲似【監獄風雲】【黑獄斷腸歌一二集】咁，如果遇到一班friend嘅朋友仔，一齊嘻嘻哈哈落手落腳，日子都過得算快嘅。好好彩，我真係遇到一班好嘅同事。
 
凌晨一點幾係放飯時候，我一如既往匿入更衣室訓覺，我喺電話入面播放住林佳君嘅錄音，尤其係佢唱嘅IQ博士好鬼得意：
 
「靈感IQ稱得上 十分之高超 創作力量同幻想 會嚇你一跳 小雲和小吉好重要……」




 
我最鐘意Loop呢首，用音樂播放器不停循環播放，每一晚都係咁陪我渡過長凳上嘅睡眠時間，喺更衣室嘅長凳挨咗一小時，我亦擺低電話落返場。
 
「安仔，係咪拍拖呢？」從後有個南亞仔搭住我膊頭。
 
「冇呀，你幾時介紹你啲同鄉女仔俾我識先？」
 
「頭先你喺更衣室係咁播段錄音，女仔聲嚟，你笑得好甜wor。」
 
死人南亞仔，偷聽我錄音？但我臨危不亂，腦筋急轉彎。




 
「冇，我老母問我今日想飲乜湯咋，我同我老母WhatsApp緊咋。」
 
「凌晨一點幾同老母傾煲湯？」
 
「梗係啦，凌晨一點幾唔傾煲湯，傾咩？我哋廣東人最鐘意飲湯咖嘛。你都傻豬嚟嘅，同你哋迷戀咖喱一樣咋。乜你哋唔同屋企人傾煲咖喱咖咩？師兄，你真係要多啲同屋企人傾計呀！」
 
呢班識講廣東話嘅南亞仔好鐘意同我傾計，雖然我唔知佢哋嘅名，但佢哋都識叫我做安仔，仲成日請我食咖喱，其實我都唔知佢啲係咪全部都來自巴基斯坦，但我好肯定好多都係喺香港土生土長，因為佢哋識講流利廣東話。
 
有啲貨重得濟，佢哋知道我冇乜力水，佢哋見到都會拔刀相助，好有雷氣，自動自覺幫拖，好Nice好好人。
 
我理得佢南亞人定非洲人定土著人，大家開心返工，no more歧視同住地球村，大家應該守望相助。無論黑皮膚黃皮膚白皮膚，人嘅階級或者有貴賤之分，但人格係冇貴賤之分，呢句說話我聽葉問（丹爺）講過，我好認同呀。
 
嘻嘻哈哈又一day，平時收工都係拎電話look下高登睇下呢個世界發生咩事。梗係啦，足不出戶能知天下事就係上高登咖啦。
 




每朝放工嘅時候都係凌晨五點幾，冇車返出去地鐵站，於是要call的士或者攔少量經過嘅的士，返到屋企拖住疲倦嘅身體即刻躝上床訓覺。
 
訓咗一陣，就聽到出面啲人瘋狂拍打鐵閘，我嚇到即刻彈起。又嚟啦班大耳窿，好Q煩呀，同埋我真係驚。但冇辦法，我都係按照爹地嘅指示出去應酬下班大耳窿，我深呼吸，然後打開木門。
 
又係前幾日個班大耳窿，又係金毛做頭馬。
 
「呀陳生佢呢籌緊期咖啦，你喺度拍都冇用，佢唔會返嚟，各位大佬，你兇我冇用咖，我養子嚟咋唔係佢親生，我孤兒仔先夠膽返屋企住。」
 
「咪L匿啦，叫你老豆出嚟！」金毛煙屎牙哥喝道！
 
「咁佢去咗邊？我老細搵佢佢冇覆機。」金毛肥仔喝道x2！
 
「你信我啦，佢已經搞緊退休，遲啲就有錢，反正你喺繼續拍都冇用，我訓覺先。」
 
關門之後，個班大耳窿終於走咗，我亦終於有得安安樂樂訓覺。其實邊有得還呀，擺明搬遷走佬兼走數，唉，我老豆心情唔好走去打麻雀都可以借到幾十萬，擺明俾人棟啦。所以喺香港地做借錢佬真係爽過打劫銀行。




 
收數佬走後，我即刻打爹地嘅儲值卡電話報告情況：
 
「爹哋，佢地又嚟啦，我哋幾時搬呀？」
 
「申請咗啦，我公務員嚟咖，好快咖，一係你去朋友度住住先啦。」
 
「哦，OK唔駛擔心我，天氣凍，你著多件衫啦。」
 
「你都係呀。咁你小心啲。」
 
呢頭收線，嗰頭WhatsApp響起提示聲音，我一望，咦琴日嗰絲打wor：
 
「早晨呀巴打，我WeChat過咗300蚊俾你啦。」
 




我一check，咦，真係wor，早知一次過叫佢籌1000蚊啦，一次過賣三張vcd俾佢啦。