「高登情緣」「港產片Feel」有一種愛叫做純愛。: 第三章

 
「之但係我等錢駛wor……」我覆。
 
「我真係好鐘意都市情緣，你留俾我啦，其他兩隻我可以唔要住。」
 
「其實Youtube都有得睇，點解咁執著要有個碟啫？」我諗住求其打發佢，睇下佢係咪真係咁堅持要。
 
「其實係因為我同EX都好鐘意呢套戲……我同EX嘅相處都有啲似套戲嘅劇情咁，佢地係用Call機留言同傾電話，我哋係MSN同Skype傾計。佢當時仲特登買部Notebook online Skype，一邊返工一邊同我Skype，大家望住大家做各自嘅嘢……我覺得，我同我嘅EX都會好似套戲咁，有緣分再碰頭。到時可以喺返埋一齊。咁啱又俾我發現你放碟，於是我即刻WhatsApp你。」絲打認真地一字一句解釋，令我有少少意外。
 
「睇過，記得，何必要隻碟？」




 
「上次返香港搵唔到都市情緣呢隻碟，其實我喺澳洲都成日睇港產片，我有部DVD機，日日都會煲舊劇。好似睇小說咁，上講故台睇完係鐘意，就想買書再睇同收藏。如果有一日遇返EX，我會親手送隻碟俾佢。」
 
本來想八卦問多句，點解仲掛住Ex嘅，但我已經好眼訓，加上人哋嘅家事都唔關我事。
 
「OK，但唔知你幾時返黎香港啵……」
 
「Hold俾我，一係我WeChat過住2百蚊俾你先，我之後收到利是再俾你。」
 
「OK。」




 
「我ID：KongManKiu91」
 
高登仔點會用WeChat呀？但係我份人不嬲好易話為，俾人chur多幾下我就唔識reject，口快快講咗OK添。我記得之前聽人講過WeChat嘅錢可以綁定銀行卡，咁，都OK嘅。於是我download咗WeChat，add咗佢id，add完即刻訓覺。
 
我訓覺經常都會發夢，通常係三大類，第一類係童年陰影我老豆劈我老母，場景變劇情不變，最後都係見到佢地互劈；第二類係黃秋生做變態佬然後搞呢單嘢同林佳君有關，事緣佢咪好鐘意黃秋生，我哋不嬲鐘意玩書信來往，佢有日就寄咗個包裹俾我，我一打開，頂，係八仙飯店VCD……我仲要頂硬上睇曬，為嘅只係同林佳君討論劇情嗰陣唔好口窒窒，但八仙飯店真係太核突……除咗監倉嗰段黑色幽默幾好睇，其餘時間都係陰森到爆，結尾個十幾分鐘簡直係……救命呀；第三類，就係夢見我嘅婆婆，我婆婆有精神病，而且呢個婆婆唔係我親生婆婆，係我養母嘅媽咪，佢以前湊我成日虐待我，十足好似電影【弱殺】入面嘅吳毅將咁，雙面人，人前對我呵護備至，背後對我百般虐待。
 
不過縱使如此，我性格又唔係嗰啲灰到爆嘅人，我鐘意係人前扮小丑，令身邊嘅人開心。當一個人嘅時候，我會比較容易喊，同埋我怕黑，一個人喺屋企要開燈先訓到覺。所以為咗唔好再驚夜晚，我特登搵份通宵倉務員嚟做。我係一個返通宵更嘅倉務員，有時為咗賺多啲錢會直踩日夜兩更，而每當放飯時候我就匿入更衣室訓覺。曾經有專家教路，食煙會精神啲同埋冇咁易餓，咦，的確好符合我嘅經濟理念——總之慳得就慳，盡量帶飯。不過最後我都冇選擇食煙，因為一包煙都好貴，容乜易上咗癮一日隊幾包，仲慘過唔食煙，一個唔好彩肺部黑卵曬，咁我咪大獲？我唔煙唔酒唔嫖唔賭，而且我好俾心機咁返工，銀行戶口有五位數字剩，每個月份糧大部分上繳屋企做家用。做咗倉務員五年，我冇諗過全公司都識我而且好鐘意我。如果受歡迎係一種成就，我都算幾有成就。連公司啲南亞朋友都好鐘意撩我傾計，有啲廣東話都唔識講嘅南亞朋友見親我都會say hi兼搭我膊頭，開頭我都以為佢地係好基情所以我都驚驚哋，後尾發覺原來唔係搞gay，而係我好受歡迎。