「高登情緣」「港產片Feel」有一種愛叫做純愛。: 第二章

由細到大屋企都冇電腦，所以屋企嘅收音機 磁帶機&磁帶（聽許冠傑等人嘅歌）DVD機同少量VCD/DVD成為我好重要嘅精神寄託。「搏命單刀奪命槍」呢齣戲我諗唔多人知，但我睇過好多次；「霹靂先鋒」係周星馳拎金馬獎男配角嘅電影，我又係睇過好多次，唔知點解會有人露點，根本露點嗰場戲係可有可無。「花樣年華」我明明唔鐘意睇，但都睇咗好多次，如果唔係因為無聊，我真係唔會不停Loop「花樣年華」。睇報紙影評都係講新戲，極少有人講舊戲，但我因為屋企嘅三張VCD，奠定我一生只愛舊的港產片嘅基礎。「搏命單刀奪命槍」冇高清冇靚仔靚女，武俠片，根本就係同千禧年代係兩個時代，但我好鐘意睇，我發覺舊的港產片先係最正。
 
於是開始去影碟舖搵VCD，冇影評冇人帶路，為咗睇多啲港產片，我明明好驚血腥恐怖戲嘅封面，我都頂硬上，為嘅只不過係搵帶多幾張VCD返屋企。我真係唔想再挨「花樣年華」，王家衛大導演嘅戲我真係睇唔明。
 
但我又冇乜錢，所以有時候睇啱幾張VCD都只能夠買一張。咁多年嚟我都唔算特別多VCD咋。
 
所以高登咁多post我都冇試過PM人，唯獨係PM林佳君，就係因為佢開post講「港產片」，我走去PM佢，咁就撻著咗。
 
我係一個極平庸嘅男仔，唔靚仔，又肥，視力唔多好戴眼鏡，學歷更加唔駛多講，一字記之曰：低。咁多年嚟都係做倉務員，餐搵餐食餐餐清，每個月準時俾家用係我工作嘅動力，有多餘錢就會買下港產片VCD。DVD就唔好啦，貴！
 




就係因為上得多高登發覺，咦，啲人好風趣幽默，仲好博學多才。我上得多高登，慢慢培養到自己都係有返咁上下幽默感，仲透過高登post增長見聞。而我因為認識林佳君，鐘意同佢傾計，所以成日去圖書館借用電腦，電腦要Book，我就係趁排隊嘅時間瘋狂拎啲書嚟idiot，睇下睇下，發覺對打字係有好大幫助，原本冇乜文化嘅我，就係因為鐘意林佳君，誤打誤撞睇多咗好多書。書真係一樣好好嘅嘢，唔好講本書帶到乜野強大知識俾你，單單係睇書可以令人嘅心安靜落嚟，已經係難能可貴。
 
我叫陳家安，名字透露出我屋企人幾想我哋嘅家係安寧。可惜事與願違，我親生老豆斬死我親生老母，我留下童年陰影，揮之不去。跟咗養父養母，係，冇錯，係短暫幸福過，但養父爛賭，養母爛口，佢哋成日都會嘈交。養父爭啲大耳窿，我已經見識過好多次，屋企都搬過幾次。借完錢申請破產就唔駛還？梗係唔得啦，俾啲大耳窿刮到死梗。
 
我睇過「吸血貴利王」，我以為真係會放火燒屋，我好愛林佳君，我唔想連累佢，因為我同佢有書信來往，我已經燒曬啲信封，我驚，我擔憂，屋企立立亂，最終我選擇作個大話同林佳君分手，我話我仲好掛住我嘅EX，於是林佳君嬲咗我，冇搵我。
 
五年感情因為一個呢個原因結束，係咪低能？係掛，我唔知呀。我只知道我返完通宵返到屋企，屋企又係癡住好多張紙，印住爹地嘅樣，仲有墻壁用紅油字寫住 「陳建新  欠債還錢」！
 
我用手拎走啲紙，隔離鄰居見到我，拉開鐵閘鬧我：
 




「好心你哋啦，咪累街坊啦，搬啦。」
 
「我喺度住咗幾十年都未見過有大耳窿上門，你哋真係巴閉lor！」
 
冷言冷語，何嘗唔係比大耳窿更加恐怖？冇人會關心下我食咗早餐未，冇人會關心下我其實我都只係二十三歲但出嚟做咗五年嘢。我要忍，因為係我哋累到佢哋被滋擾，但我除咗講唔好意思，我仲可以點做？
 
返到屋企早餐都未食，好眼訓，正當想躝上床休息，電話傳嚟一個WhatsApp，電話Number係外國嘅。
 
「Hi，巴打」
 




「Hi」
 
「我係絲打嚟，見你開post放港產片VCD，我想要古惑仔3，都市情緣同廟街故事。」
 
原來係睇到我擺上高登放VCD嘅post而搵我嘅絲打，我窮到要將我視為珍藏嘅VCD拎去放。
 
「咦，識揀wor。古惑仔300蚊，都市情緣300蚊 廟街故事300蚊……齊頭1000蚊啦。」冇計我好等錢駛，於是坐地起價。
 
「下，3個300蚊，齊頭竟然變成1000嘅，哈哈！」
 
「古惑仔3絕版呀嘛，收多你100蚊啱咖啦。」
 
「OK，我要曬，但我唔知幾時返香港，我喺澳洲生活咖，留俾我OK？」
 
「下，我等錢駛wor，同埋點等你，幾時返？」我覆。




 
「未定。」
 
「咁你不如先俾錢，到時我留俾你lor。我真係等錢駛」
 
「下，我WeChat得兩百零蚊咋。」
 
「Paypal呢？」
 
「冇呀。」
 
我懶得打字，同埋上開高登習慣派下膠，於是錄音俾佢：
 
「我哋International咖嘛，你PayPal都冇，點去澳洲呀？係咪食錯咖喱搭錯飛機去咗菲律賓？但菲律賓都有PayPal wor絲打。」
 




我估唔到，呢位絲打WhatsApp Icon望落似Gem，把聲竟然咁似薛凱琪！
 
「哈哈，巴打你好搞笑。」