[真人真事][校園][純愛]《最陌生的人，就是曾經最熟悉的人》: 第五十六章

班際比賽結果遺憾收場
但係時間巨輪仍然會繼續轉動
至於我同呀琳嘅關係,
同之前一樣冇變過
有幾次上上下堂嗰陣,
老師叫我地企出去黑板匯報,
咁小弟喺學校個定位,
都係偏搞笑嗰類
所以每逢呢啲出黑板面對住全部同學匯報
我多數出去廢噏




搞下笑就算
反正又唔會點樣計分
咪當玩下囉
但係好可惜,
每次我出去搞笑嗰陣,
其實我眼尾總係喵住呀琳
當然唔可以全神貫注咁樣望啦,
咁樣會俾佢發現
但係我每次眼尾喵住佢嗰陣,
我都發現佢係冇笑




有時仲特登托起一邊頭,
望出去窗邊睇風景,
我呢個小丑
雖然我令到全班人都覺得好好笑,
仲帶動到氣氛添,
不過對我嚟講係冇用
因為我無論點樣落力搞笑都好,
始終都得唔到呀琳嘅笑容,
我最著重嘅客人,
偏偏就係最唔重視我




睇埋今次,
我幾可肯定,
只要我一日用住樂仔呢個身份,
佢都唔會再因為我而笑
曾經我覺得係世界上最靚嘅微笑,
依家已經越來越罕見,
對我嚟講,
陌生就唔陌生,
因為我仲好記得佢個笑容
係有幾咁出眾,
只係已經好少機會見到
如果係上年?
我好肯定呀琳一定會笑,
不過已經講得太多如果喇
況且條路係我自己揀,




自己攞嚟嘅,
怪得邊個丫.

去到十二月,
我地班嗰啲揸fit人
話今年不如搞番個聖誕聯歡會
我地上年冇搞到
班上面大部分嘅同學,
好想喺會考前,
有返個小型班會
所以就有咁嘅提議
結果當然好多人贊成啦
講開又講,
畢左業之後,
真係好少見返呢班同學




唔知佢地生活點呢
如果真係約出嚟,
又唔知可唔可以去返以前咁樣
可以毫無保留咁樣傾計
大家都知啦,
人大左,
城府自然深左
唔會再好似以前中學生咁樣,
乜都講一餐架啦
入返正題先,
我地諗住,
喺放聖誕假之前嗰一日,
當上完最後一堂之後,
就叫晒啲外賣返嚟食
pizza呀,炸雞呀等等




會經常喺派對出現嘅食物
其實嚟嚟去去都係嗰啲架啦
之後坐埋喺度一齊玩遊戲咁樣,
都係同一般嘅聖誕聯歡會冇乜分別
好彩,
我地成班人全體出席,
你知架啦,
去到呢啲大型嘅班會活動
有時硬係會有啲人唔嚟
又話忙呢樣忙嗰樣
總之藉口就一大堆
可能今次大家feel到,
以後都唔會再有機會好似今次咁齊整
畢竟未必所有人都可以原校升讀中六,
至少,




我就係其中一個啦
無啦啦好似講到好感慨添
其實中五都仲未完嘅,
下個月先last day,
不過講下講下都就快嚕
當日一切順利
我地上完最後一堂之後,
即刻有人落去攞啲食物上嚟
當然,
其實喺我眼中,
最重視嘅都仍然係嗰個人
見佢同其他人都有講有笑,
久違嘅笑容,
終於再一次展露出嚟
初初我會覺得,
個笑容唔係由我俾佢嘅,
心頭總係會有少少酸
但係時間耐左,
我都放低左啲無謂嘅執著,
因乜野而笑都好啦
只要可以再見到呢個笑容就已經得喇
因為時間都冇多,
仲有個零兩個月我就要走,
唔係我想放低執著,
而係時間逼我要放
唔到我唔放,
望住佢同其他人有講有笑,
我就喺度諗,
點解佢地會咁容易同呀琳有講有笑
全班都得,
冇分男女,
個個得,
淨係我唔得,
點解你地咁易做嘅事,
對我嚟講會咁難做呢
曾經我地係好接近,
但都已經係以前嘅事,
係過去式嚟.