[真人真事][校園][純愛]《最陌生的人，就是曾經最熟悉的人》: 第五十五章

生日嘅事就告一段落,
之後都冇乜特別野好提
每日都係自己陪住自己
上堂聽書嗰陣,
有時會不其然望住一個背影
一個令我一生都難忘嘅背影,
個距離好遠,
雖然遠極都只係幾個位嘅距離,
但係呢幾個位唔易追
不過算啦,




望望下我都習慣左,
有時佢個背影仲熟悉佢個正面
我真係好耐冇正面咁樣望過佢,
更加唔好講眼神交流.

話說喺十一月,
我地學校舉行一個班際足球比賽
本身我地班識踢波嘅人唔算好多
我已經係其中一個叫做識踢嘅人
另外,




Candice鍾意嘅呀狗都係其中一個成員
原本我地就唔諗住踢嘅
因為贏面唔大,
都係三三四四咁樣
但係成班同學話今年好可能係最後一年
如果我地下年唔可以原班升上嚟的話,
所以就不如玩下啦
咁我就冇所謂嘅
不過最好有牌啦
畢竟讀左中學咁耐,




一塊獎牌都冇真係有啲羞家
踢波嘅情節唔多講喇,
費事悶親大家
總之我地屎忽撞棍殺到入四強
不過打四強嗰陣,
就遇到全校最勁嗰隊
唔使問梗係輸啦
我地都預左係咁,
所以都冇話特別開心
係希望打季軍戰嗰陣可以贏
亦都係我最後爭取獎牌嘅希望
因為我下年已經唔會喺度
咁一路踢落嚟嗰陣,
其實我就好似當年中三咁樣
呀琳企喺邊度,




我個主力活動範圍就係嗰度
不過好可惜,
我次次乘機望佢嗰陣,
佢個目光,
總係唔係望住我
一係就望住其他人,
一係就掛住同隔離嗰個傾計,
不過算啦,
我都預左係咁
係真係發生嗰陣有少少介意啫.

咁去到打季軍戰
可能係最後一場啦,
我地成班人一早話
全部一齊支持落場踢波嗰五個




話全部人唔好出去食飯
一齊喺學校食,
留低喺度睇波
班際比賽就係咁樣,
成班人會好團結幫你打氣
唔知「成班人」包唔包括呀琳喺度呢
希望佢會幫我地打氣啦
其實最主要都係想佢幫我打氣啫
我唔會否認呢點
好似嗰啲動畫咁樣,
求其嗌句加油都好丫
咁樣已經好夠
咁我地換好晒衫就出場,
對面隊都唔係話特別勁,
大家半斤八兩




邊隊好彩啲就邊隊贏
點知我地一開波就輸一球
好彩之後呀狗幫我地追返一粒
1-1完結上半場,
喺度認叻先
呀狗入嗰球係我一個扭兩個再傳俾佢
我都覺得自己有功勞架
好彩,
我地班啲人都唔係盲
都有讚我好波
不過,
我最想俾佢讚嗰個就冇出聲
去到下半場,
有一球我要同對面啲人爭頂
點知我爭頂嗰陣,




我唔夠對面嗰條友大份
成個人俾佢撞到失平衡跌低
喺我就跌嗰下,
我仍然係望住呀琳,
但佢由始至終都冇望過我
到我跌低,
全部人起哄嗰陣,
佢都仲係冇望過我
唔通我已經連受傷唔值得你一望
普通人受傷,
你出於八卦心態又好,
擔心又好,
乜都好啦,
你都會望下佢啦下話
更何況我地係同一間學校
同一班,
你唔係話好想睇我踢波嘅咩,
我依家喺個場度喇,
我已經就埋你,
特登去你附近嗰度踢
你只需要抬起你個頭,
直望就可以,
連擰左擰右都唔需要,
但係點解,
你都唔望我一眼呀
我唔係要你安慰我,
亦唔係要你買定支水等我,
更加唔係要你無啦啦行出嚟問我有冇受傷
呢啲對我嚟講係妄想
所以我唔會要求,
但我只係想你望我一眼啫,
係咪真係咁難
之後我跌左落地下,
皮痛,肉痛,
但點樣痛都唔夠個心痛
最後我地嗰場波仲輸鬼埋
連銅牌都冇得攞,
中學生涯最後一場比賽就咁完結
點都有啲唔甘心
唯有怨自己技術未夠好
踢完之後上返班房,
可能我地輸左,
所以成班個氣氛都好凝重
之後我聽到呀琳安慰呀狗,
呀琳:「唔好咁啦,
你都好犀利喇
入左一球,
唔好咁唔開心啦
依家你地都有第四 .」
呀狗:「不過都係冇牌丫 」
點解你唔行多兩步去安慰我呀
其實我都係輸左架
呀狗係犀利,入左波,
但係佢入嗰球係我俾佢架,
佢犀利,
咁唔通我唔犀利呀,
點解個個都讚我扭到好,
但係你就可以一言不發
我最唔甘心唔係輸波,
係輸埋你嘅安慰呀,
其實我都需要支持架,
唔係得呀狗,
你同我講一句安慰說話真係咁難
我地之間真係再冇野講?