[真人真事][校園][純愛]《最陌生的人，就是曾經最熟悉的人》: 第五十七章

咁我地就先食野先
好彩嗰班揸fit人今次醒目啫
食物份量好充足
我地成廿八人
容乜易食下一舊,食下有一舊
到時都死啦
一定唔飽
錢就俾左,
肚就唔飽
各位巴打絲打一定有試過咁樣




去完啲大型嘅聯歡會,
返到屋企樓下嗰陣一定會買宵夜醫下個肚
因為頭先你食唔飽
好彩我中學生涯最後一個聖誕聯歡會唔係咁啫
喺呢方面嚟講,
總算有返個美好回憶

食飽之後
就玩啲小遊戲啦
咁樣玩小遊戲之前呢,




就要大家圍成一個圓圈
然之後坐低,
班房裏面有足夠空間俾我地咁樣做
我地有廿八人,
自然有廿八個位坐
呢句說話好似有啲廢
唔係好似,
係直情係廢話
咁我地就有廿八支籤
籤上面寫住左廿八個冧把,




1-28咁樣,
一陣我地會用嚟抽籤
咁點解要抽籤呢
因為我地玩嗰陣要坐喺圍好左嘅嗰個圓圈
我地就唔想永遠都係熟嘅人坐埋一齊
所以就要抽籤,
抽中幾多號就坐喺相應位置
當然啦,
號碼同位置係連住嘅
即係1號隔離就係2號
5號隔離就係4號同6號咁樣
當然啦,
如果我地一定要同熟嘅人一齊坐
都唔係唔得
只要你靜靜雞同人換




而其他人又唔發覺嘅話,
咁你就可以同熟嘅人一齊坐
我就唔搞咁多喇
總之抽到幾多號就坐嗰個位,
費事同人換啦
之後我一抽,
見到係19號
咁自自然然就坐喺相應嘅位置
我坐落去嗰陣仲諗緊,
隔離嗰兩個位會唔會其中一個係呀琳呢
2/27概率,
睇下有冇咁好彩
之後我見到呀琳真係行左過嚟
但係冇坐落嚟,
反而佢細細聲咁同一個男仔講野




我聽到佢地講乜野,
因為其實佢地係喺我後面講
近到咁都聽唔到就死左佢算啦
呀琳:「你幾多號呀 」
嗰個男仔:「23囉
做咩呀 」
呀琳:「可唔可以同我調呀
我嗰個位好凍
唔該你丫 」
嗰個男仔:「好啦 」
之後嗰個男仔坐喺我左手邊
嗰個男仔:「原來係你呀樂仔 」
我:「係呀 」
跟住我就喺度苦笑
咁我知道呀琳點解要調位啦




原本我左手邊嘅位係呀琳坐,
我好清楚呀琳係講緊大話
佢根本就唔怕凍
況且嗰個位亦都唔算好凍,
你諗下,
我咁q怕凍
坐喺我個位都唔覺得凍
佢原本都係坐我隔離啫,
咁又會凍得去邊度呢
加上佢根本就唔怕凍
呢樣野全班除左Candice外,
冇人熟得過我
我上年假假地都係成日同呀琳出去,
佢怕唔怕凍我會唔知
當然你可以話,




可能佢今年突然怕凍左,
但我唔相信囉
可能佢以為我,
已經唔記得左佢係唔怕凍
所以先講咁嘅藉口,
但其實唔係,
我仲係好記得你講嘅每一字,每一句
我從來都冇忘記過,
只係你唔知啫
之後玩乜個印象已經唔深,
因為我都冇乜心機,
經過今日我先發現,
原來有緣分都冇用
2/27概率,
都俾我撞得中
佢原本真係坐我隔離,
咁樣又點啫
原來撞中左之後,
都可以用人為因素去改變,
明明撞中左都變撞唔中
緣分嘅力量真係太渺小,
渺小到可以用人為因素去ko,
有緣分都冇用
等我之前仲喺度ff,
佢坐我隔離會點呢
咁咪好尷尬囉
但原來只係我諗多左,
人地根本就從來冇諗過坐我隔離,
你擔心緊嘅嘢
喺人地眼中係不值一提,
佢連我尷尬嘅權利都拎走埋,
我依家,
連坐喺佢隔離嘅資格都冇喇
時間過得真係好快,
快到我啲權利,
都跟唔上個速度,
全部漏低晒喺以前.