[人性] [感情事]我不會講你知，其實是第幾次: 火車姐姐既秘密 (2)
"Hugo，不如，我地唔去咯。"火車姐姐突然話唔去飲野。
"下？點解呀？今朝又係你叫我陪你既？
其實我都想問，有咩人係到架？" 點解女人都係咁善變？
"朋友囉。算啦唔去喇，
我地自己去飲杯野算啦。"
"你話事啦。" 其實我都係打算陪下佢，去唔去都冇所謂。
就係咁，我地兩個轉戰赫德道既酒吧。
個到有間Tequila Jacks既酒吧，一直係我最愛。
我地坐低左之後，除左嗌左兩杯Stella外，
火車姐姐都冇出過聲。
"做咩突然諗住唔去？"我問火車姐姐。
"冇呀冇心情之嘛。" 佢又講大話。
"你收收埋埋我好難陪你傾計架喎？"
"我...唉。一言難盡，我地飲杯啦。"
火車姐姐一杯接一杯，好明顯想灌醉自己。
"夠喇呀魚。唔好飲咁多。"我好少直接叫火車姐姐個名。
"你理得我姐！哈哈，你把我灌醉，你讓我流淚..."
已經醉左，仲要係到唱歌，我實在係哭笑不得。
"ok，咁你飲之前係唔係應該話我聽咩事呢？
你唔講我就唔俾你飲。"
火車姐姐眼仔碌碌，望住我，慢慢開口。
"你陪我去個地方丫？"