[人性] [感情事]我不會講你知，其實是第幾次: 病房

醫院既病房內，Stella訓左係床上，冇乜大礙。 

Candy話出去買少少野俾Stella梳洗， 
而家得番樂仔同Stella兩個。 

"其實，你同Hugo攪咩呀？ 
嗌交都係好小事姐，唔洗攪到自殺架嘛！" 

"我真係冇自殺，我飲得太多，有少少企唔穩就跌左落水喇。 
我同佢....算啦，我已經對呢個人好失望。 


我都決定同佢分開，唔想再見到佢。" 

"唔好咁啦！你兩個都係我地好朋友， 
我見證住你地一齊咁幸福， 
我真係唔想睇住你地咁樣收場。" 

"哀莫大於心死，我仲好愛佢。 
但係我知道佢唔會為我改變乜野， 
佢既然認為其他野比我重要， 
又完全唔顧我感受， 


我又何必留係一個唔愛我既人身邊？" 

Stella清醒左好多，始乎佢真係傷心好深。 
樂仔覺得，一個百般遷就男朋友既女仔， 
講得出一番咁既說話，大概佢已經覺悟左。 
佢暗嘆可惜，唔知Stella以後會點呢... 

呢個時候，病房門外，有個男仔拎住d利賓納行左入黎。 
佢見到Stella之後，就放低d利賓納。 
佢打斷左樂仔同Stella既對話。 



"你冇事丫嗎？"男仔語帶關心。 

"Darren你黎左？我咪叫左你唔洗專登過黎囉。 
我冇事呀放心。" 

呢個叫Darren既男仔，有少少熟口面。 
佢身形比較瘦削，戴住副眼鏡， 
望落去都係一個斯文既男仔。 
佢有少少似TBB個坤哥。 

"傻啦，朋友出左事點可以唔黎睇下你？ 
咦，呢位係？" 

"我係Stella既朋友，我叫呀樂。" 



"樂哥你好，唔阻你地傾計呀可？" 

樂仔暗鬧左一句頂你個肺知道仲唔死開？ 
或者樂仔心入面明白，呢個男仔同Stella未必單純係朋友。 
所以佢對Darren有少少厭惡。 

"唔阻呀，我女朋友都過緊黎， 
我陪Stella傾下計之嘛。" 

呢個時候，樂仔電話響起。