[人性] [感情事]我不會講你知，其實是第幾次: 壓力

樂仔係呢間學校並冇好似以前咁大影響力。 
所以到最後，佢都係搵唔到火車姐姐。 
算係佢既中學生活既一個小小遺憾啦。 

番到屋企，為免我沖涼會洗甩左火車姐姐既MSN，於是我就加左佢先。 
咁岩佢真係ONLINE緊，於是我就SEND番張相俾佢。 

"今日我朋友冇同你影相佢好失望呀！" 我放左樂仔上台。 

"哈哈，做咩唔搵我影呀？" 



"........因為我唔記得問你邊班，佢鬧左我好鬼耐。" 

我同火車姐姐都算幾好傾，當然我亦冇多諗D咩啦。 
只係純粹識多個朋友咁啦。" 

接住落黎，係放假準備考A-LEVEL既呢段時間，基本上我每日都係足不出戶。 
見Stella既時間少左好多，基本上都係佢上黎我屋企執屋，又或者係食野個陣先至見到。 

可能因為溫書溫到個人頭昏腦脹既關係，我開始變得好暴躁。 


好小事都會發脾氣。 

"BB呀你間房好亂呀。我幫你將D NOTES放左係櫃入面，參考書就係..." Stella幫我執好左成間房。 

"得喇得喇。知架喇。"　唔知點解我睇極都覺得執得唔順眼。 

"BB呀，我整左少少野食呀。你食D啦你成日都冇食過野！" Stella煮左個面俾我食。 

"唔想食。"我擰頭。 



"唔好啦食少少啦，如果唔係會胃痛架。" Stella氹我。 

"都話唔食咯。"我大力拍左張台一下。 

"Stella，我D NOTES你放左係邊呀？" 我覺得好忟... 

"今朝幫你執完嘛，係櫃呀。" 

"你可唔可以唔好亂攪我D野呀！攪到亂哂我點搵呀！" 

"我見你間房好多垃圾我諗住幫你清理下，順手疊好D咋..." 

"你唔好咁多事得唔得呀？我唔執就係因為我咁樣先知D野放係邊！" 

"對唔住..." 



有人話，相見好，同住難。 
人大個左，面對住四方八面唔同既壓力。 
如果唔識好好控制，相處就會出現裂縫。 
最後，崩塌。