[人性] [感情事]我不會講你知，其實是第幾次: 下白泥

元朗下白泥，香港其中一個睇日落最靚既地方。 
點解我要黎呢到？ 

其實是咁的，有一日。 

"Hugo！今日Philips帶左我去下白泥睇日出呀！ 
好靚好靚呀！你有冇去過呀？" 
之後琪琪仲要Send佢同Philips既合照俾我睇。 

"咁開心？緊係有去過啦。睇日出丫嘛。 


我之前不知同幾多女女去過啦。" 其實我未去過。 

"哼。係咪呀！你帶咁多女仔去都唔帶我去！" 

"而家你個Philips咪帶左你去囉！" 我有少少唔服氣。 

"點同呢！算啦，冇野喇衰人。" 

我諗得入神。 



"喂，Hugo！你諗緊咩呀？好靚呀呢到！我咁大個女都未黎過呢到架！" 

我被Stella拉番番黎現實。 

"冇呀。係呀呢到好出名架。 
仲有一陣就日落架喇。我地搵個地方坐低？" 

"嗯！" 
跟住佢就成個細路女咁，橋住我隻手搵個地方坐低左。 
哈，原來佢都有可愛既一面。 


原本諗住唔想浪費左個星期六，諗住求其搵個人陪我黎呢到。 
順便影張相同琪琪示威。 

睇住眼前呢個咸蛋黃，配以涼涼既微風，偶爾有幾隻雀飛過。 
如此良辰美景，就可惜...忽然，我諗起琪琪。 

"估唔到你都幾浪漫架喎。"Stella又劃破左我既思緒。 

佢唔出聲我都唔覺，原來佢已經捱左係我膊頭。 
淡淡的香水，混合左Stella既體香，令人好生陶醉。 

"不如我地影張相丫？"我問。