[人性] [感情事]我不會講你知，其實是第幾次: 拙合

我地分成兩組，自然係我同Stella一組；樂仔同Candy一組。 

樂仔動作非常純熟，佢輕輕一放，一開波就打左個全中。 
Candy興奮到係到大叫。 

接住落黎就係到我。 
我偶爾都會同樂仔打下波，所以都算太差。 
但一個唔留神打左個大分瓶。 

"SHIT！"我發洩。補打既個下，我只係打中其中一枝。 


之後既形勢就一面倒。 

樂仔頭三圈已經打左個Turkey.... 
最後佢同Candy就大獲全勝。 
呢個時候我見到Candy眼中已經對樂仔充滿傾慕。 
果然運動叻既男仔係有著數D。 

"哎呀你咁屎架！" Stella竟然對我抱怨。 

"樂仔勁嘛！同埋俾個機會佢地唔好咩？" 我細細聲同Stella 講。 


佢好似恍然大悟咁。唔係咁遲鈍呀嗎？而家先明白樂仔想追Candy？ 

玩完我地就去左食Lunch。 
樂仔一直都滔滔不絕，而Candy只係好耐心咁聽佢講野。 

"Stella，不如我地自己走先，俾個機會佢地？" 

"好呀好呀！不如我地自己都去玩？" 

"嗯，好呀。我帶你去個地方？" 



"咩地方呀？" 

"轉頭你就知！" 

於是，我就同樂仔講，我地兩個想自己去行下，叫佢同Candy自己攪掂。 
佢露出一副感激不盡既樣，我見到都打冷震。 

至於我帶Stella去邊？ 
一個我想去好耐既地方。 
唔係瓦努亞圖呀！