[人性] [感情事]我不會講你知，其實是第幾次: 又到聖誕

一起身，第一件事係睇下個電話。 
琴晚琪琪2點先覆番我，話岩岩先番到屋企。 
我心諗，做乜玩到咁夜呀... 

之後就起身梳洗番學。 
番到學校，見到樂仔，佢劈頭第一句就話我發姣。 

"發哂姣咁喎！春風滿面！"　樂仔係到淫笑。 

"痴線你就發姣。"我笑住咁講。 



的確，呢段日子以黎，由識到琪琪，再同佢相熟，到佢生日我可以同佢去街。 
一切都發展得好順利。 

唔知你有冇試過係街行行下，諗起你愛既人， 
或者同佢發生既趣事，都會忍唔住係街傻笑？ 
我發現，我呢排笑得好嚴重。 

我同琪琪係接住落黎既日子，都係不停傾計。 
佢已經由以前好靜既佢，變得多左野講，仲會主動搵下我。 


我都會去佢班房搵佢傾計。 

有時，佢都會同我呻下佢屋企有幾嚴。 

"Hugo！我呀媽又發癲喇！佢係咁鬧家姐，跟住又鬧埋我。 
唉，真係唔想留係屋企。" 

"你搬黎我到住囉！我讓間房俾你又點話。" 
我最中意言語上抽佢水。 



"你就想呀！發夢啦你！" 

"讓房俾你都唔得？咁一齊訓囉哈哈。" 

有時又會同佢討論下電視劇。 

"Hugo呀，你有冇睇電視呀？男女主角都好慘呀！ 
我喊到收唔到聲呀！" 

"傻妹黎既，乖啦唔好喊啦。做戲之嘛。" 

"個男主角真係好好呀！係個女主角身邊默默支持佢。" 

我渡過左同琪琪最快樂既時光。 
好快，就黎到聖誕節喇。