死後，我成為了地府的牛頭馬面: 7.11

「伯爺公，我地等陣......再見。」伯爺婆隨之暈厥在桌上。

再見，他們還會再次見面？

還是再見，他們再也不會見？

吳強異常著急，不停叫喚著伯爺婆與德仔，可是他們沒有反應。

屋內只剩下吳強的呼天搶地的回音。





「兩位大哥，求你地大發慈悲救下佢地......」吳強哭道。

我與馬面默不作聲。

「求下你地做下好心，可憐下佢地啦......」吳強跪在地上，抱著馬面的大腿。

「恕我地無能為力。」馬面說道。

「你地係神仙黎，點會無能為力......我求下兩位大哥做下好心......佢地唔應該咁快死架。」吳強向著我們不停叩頭，淚水亦沾濕了地板。





凡間的事，上天早有安排，我們不得干預，否則只會遇上麻煩。

「應唔應該死，唔係由凡人判斷，凡間有人享陽壽達一百年，亦有人胎死腹中，生命從來唔單止係數字，而係因果。」馬面耐心解釋，可是吳強根本不想理會。

「呢一劫係佢地生命既終結定或是生命既挑戰，上天早有安排，我地難以改變。」馬面再次毫無留情拒絕了吳強。