《我家姐竟然做咗我班主任？？？》: 【32】

到咗放學，本來我係隔離班都一直有個fd陪我放學，可惜佢話今日要陪女，於是我只好自己返屋企。

家姐都唔會咁早放架啦，而我，當然想漫澄可以陪我放學。

好自然，漫澄就會成為我視野嘅焦點。放學嘅第一時間會四處張望，留意佢係邊。

係放學嘅長長人龍入面，要搵一個人談何容易？

我順住人流離去，都係搵唔到佢，係有啲失落，但又會諗，就算我搵到佢，我有無膽量上前搵佢？





答案係無......

我默默地戴上耳機，慢慢行過去巴士站嗰邊。

當自己一人嘅時候，聽歌成為我嘅習慣，咁樣就會有自己嘅世界。

當我揀緊歌嘅時候，有人係我後面拍我膊頭。

我順住拍我嘅方向一望，無人...？





跟住我感覺到有人拍我反方向，依個時候我方知俾人愚弄。

漫澄......？

此刻佢嘅出現，大大咁令我覺得，佢係對我有意思。

因為喱啲舉動，漫澄不曾對其他男仔有過，以我對佢嘅留意，觀察嚟講。

「終於搵到你啦！」佢嘅氣息有點微微嘅急促。





由於我仲未點歌，所以喱一句我係好清楚咁聽入耳，我有點不明所以咁望住佢。

漫澄佢一手除低咗我個耳機，然後係我耳邊講，「我話我終於搵到你啦！」

佢哄埋嚟嗰一刻，我心跳加速得好緊要，一嚟係俾佢嚇親啦，二嚟係佢身邊有一陣啖啖嘅清香。

聞到喱陣香氣嘅男人，都會立刻得到一個咀咒，就係愛上漫澄。

「下？」

我仍舊不解。

因為喱一個「下？」，漫澄本來掛係臉上嘅笑容，瞬間僵硬咗，繼而消失不見。

依家漫澄企係我前面，平時儀表整齊嘅漫澄，如今頭髮卻凌亂不堪。





可見佢係好焦急咁跑過嚟，我見到，其實幾感動，證明我係佢心中嘅地位，係幾重要下。

「又係你叫我搵你嘅......」漫澄細細聲咁講，其語氣毫無不滿，毫無責備，只覺有幾分撒嬌嘅感覺。

「下？」我又再一次做出喱個反應，我思前想後，都唔知點解，「我幾時有叫過你搵我呀？！」

喱幾日嘅印象中，我不曾開口叫過漫澄搵我呀？

我忽然間靈機一閃，唔通......？

我約莫猜測到咩事，雖然唔肯定，但應該得返喱個可能。

我心情變得十分激動不己，血液係我身體入面沸騰緊，甚至連雞皮都起埋。





我期待咗咁耐嘅事情終於發生，直覺甚至話俾我知，唔會錯架啦！一定係咁！

「算！」漫澄聽後，轉笑為怒，欲轉身離去.....

我清楚咁睇到，漫澄失望嘅表情...

「漫澄！」我叫咗佢一聲，然後下意識捉住佢想揮袖而去嘅手。

（下一次更新將會出埋結局）