《我家姐竟然做咗我班主任？？？》: 【33】終
「漫澄！」講得出喱一句都已經股起咗我好大嘅勇氣。
但弊就弊在，我頓時個腦一片空白，轉唔到咁……
居然諗唔到任何嘢接落去，只能夠係度支吾以對。
「um……其實…er……」
漫澄一轉身，用佢天然呆嘅面孔望住我，期待我接住落嚟講啲咩。
佢雙眼水注注，瞪大隻眼，眨起佢迷人嘅眼睛。
似乎係同緊我講，「快啦！肯講未呀！我等你呀！」
「其……實……」
屌！橫掂都諗唔到講乜好囉，索性博一博啦！
其實有時博一博未必係壞事，話唔定會有意外嘅轉機，然後就有驚喜！
大不了咪衰咗，但依家唔講，我會後悔。
「其實我鐘意你！」我講完之後好似病咗咁，呼吸好唔暢順。
漫澄即刻笑，係呀，係聽完之後即刻笑！
佢嘅嘴角微微向上撓，喱一個笑容，帶點微甜。
「你終於講出口啦……我頭先好驚你唔講……」
漫澄佢由一個冷酷嘅女仔，變到好細路女，成知樣變曬。
一開始係有啲唔習慣，但慢慢相處落去，就習慣啦。
有好多人都係咁，初初相識嘅時候係無咩嘢講，熟咗之後就咩都講得。
你諗返起啱啱相識嘅日子，你會笑，仲會想笑鳩佢，『你睇下你之前，只係一個唔肯唔嘢嘅毒撚。』
漫澄將我捉住佢嘅手腕順勢咁拖住我。
佢隻手好細隻，一手就捉得曬，心裡面真係好興奮。
當時嘅我，天真咁諗：「我想拖住佢拖一世。」
坦白講，我依家真係唔知講啲咩好，一時之間嘅轉變同埋享受緊當下嘅感覺，令我個腦轉唔郁……
原來真係會飄飄然呀？成個人無乜力咁，好似係度浮緊咁。
不過我唯一知道係度做緊咩嘅就係——
笑。
我係度傻笑，對住漫澄傻笑。
我可以想像到自己個樣有幾傻。
而漫澄都俾咗足夠嘅回應我，對住我甜甜地笑，彷如夢幻般的童話世界。
此刻，我切切實實地感覺到，初戀嘅美好。
－
我返到去見到家姐，心情特別好。
家姐見到就問我，「細佬，做乜你成日都係度傻笑？」
有時睇到啲電影呀電視劇，都唔會明點解男主角拍咗拖之後仲好似傻咗咁？成日無啦啦係度笑。
每每睇到喱啲橋段，都會覺得好造作，一啲都唔型。
時至今日，我先知道，無論你去到邊，都回味緊嗰一幕，然後暗自偷笑，心中不停咁暗爽。
雖然會不自然傻笑，但同時你又想俾人知你心入面有幾爽，你好想同人分享喱種喜悅。
「哈哈，唔話你知！等你心思思！」
我都唔明點解自己會講出口，但講得好順。換轉係平時嘅我，一定唔會講喱啲說話。
試問咁反常嘅我，又點會逃得過家姐嘅眉目？
佢拖咗我入房，關埋門，劈頭第一句就問我，係咪拍拖。
我無出聲，但笑得好奸。
「溝到啦？」家姐有點驚喜地道。
「係呀！」我壓抑住咁耐嘅興奮終於可以爆發到出嚟！
「叻仔喎！」家姐對我笑一笑，恭喜我。
我真係覺得我家姐好似天使咁，有佢做我家姐，我覺得好好彩同埋好幸福。
「多謝你呀家姐…… 」
「無你幫我手，我諗我一定拍唔成拖。」
我真心多謝家姐，喱句嘢唔假，由出世到依家，雖然成日鬥嘴，但佢依然係我身邊。
到我大個咗，好多嘢都變曬，人與人嘅關係原來好似紙咁薄。
一個好朋友就係由好多張薄嘅紙堆積成書。
而最好嘅感情，就係嗌交都嗌唔走嘅感情。
「嘖！」家姐笑住咁車我一聲，「你知唔知就算無我幫你，你都可以追到漫澄？」
「下？」我一早收起咗我個笑容，換成一臉認真樣。
「其實呢，一個女仔對你有好感，你唔洗點追都會一齊到，甚至佢會想盡辦法同你一齊。」
「就好比一個男仔鐘意一個女仔，會覺得個女仔做咩嘢都係對你好意思咁，係咪？」
我思索咗一陣，又好似幾有道理喎…因為我駁唔到。
「你又知唔知漫澄嘅表白信寫咗啲咩？」
家姐佢語出驚人，係喎，佢都有睇到架喎！
果然有家姐做班主任係一件好事，哈哈！
「佢講咗啲咩！？」我好奇心大發。
「嘻嘻唔話你知，等你心思思！」
「啱啱咁樣同我講嘢呀嗱？」
家姐秀麗嘅臉孔，配上狡猾嘅笑容，樣子十分清甜可愛。
講真佢真係幾靚，可以用國色天香嚟到形容。
「喂呀，家姐！我知錯啦……」我只好死死地氣咁——扮死狗。
「係我衰，我賤格，我淫賤，我犯賤……」
「得得得，拍咗你啦！」家姐滿帶笑臉，然後好溫柔咁摸我個頭。
然後講道：「吠兩聲嚟聽下。」
我咬佢！！！！！！！！！！！！！！！！！
「狗急跳牆見過未？」我笑言。
間房充滿笑聲，有家姐，我係開心嘅。
笑聲過去，家姐話，漫澄封表白信係寫佢鐘意一個男仔，而個男仔，就係佢隔離。
我明曬，原來漫澄都係鐘意架之前！
當堂心入面好爽，完全喜形於色。
「你睇下你，笑個樣，賤撚到呢……又淫喎。」
「不過，你依家稍稍體驗到愛情嘅魔力，應該明點解愛情會令人失去理智啦？」
家姐強調後面嘅「理智」。
我知，家姐之所以會話做人SP，都係因為愛情嘅魔力。
我有啲明白，如果依家我同漫澄分手，我諗我都會一樣失去理智，失魂落魄。
愛過，就唔會想承受失去嘅痛苦，因為真係好痛好痛好痛。
初戀嘅影響力係大到，就算你老咗，你都會記憶猶新。
無論係短暫，蜻蜓點水式，定抑或愛情馬拉松，當人問起：「你初戀係點架？」
你都一定答得出。
「明啲啦，不過家姐呀……」
「嗯？」
「我都希望你可以搵到個好碼頭，陪你行過喱一世，風雨同路。」
「我都希望得呀，你估咁易咩？」
「一生人遇到嘅人無數，又有幾多個留得住呀？」
你臉上嘅笑容僵持咗一陣，我睇得出，其實你一路以嚟都係想要簡簡單單嘅愛情，可惜降臨係你身上嘅，都係噩運。
你表情話俾我知，你心底裡係仲期望緊愛情，無論跌咗幾多次都好。
細佬我真係做唔到啲咩，幫唔到啲咩。
但我會祝福你，搵到個真係錫你嘅人。
你值得擁有喱個幸福。