《我家姐竟然做咗我班主任？？？》: 【19】

家姐佢自從David嗰單嘢之後，就變得好感性，忽然間明白好多嘢咁。

其實又真係經一事，蔡一智嘅。家姐佢都有係喱一件事入面學到嘢，證明佢係有用過腦，係有反省過。

佢仲話，聽日上堂會幫我喎。

跟住佢就走咗，臨走前叫我封情書自己搞掂......

第二日返學，家姐佢趁自己班會堂嘅時候同我哋全班講：





「係我哋未作文之前，我想測試一下大家嘅中文水平同埋文肇，所以我今日定一個題目，字數不限，想寫幾多就寫幾多，放學之前俾我就得啦。」

「咩呀咩呀，只要係Miss Tai講嘅，一定準時交！」呀九坐係後面鳩叫。

爛口輝唔係度，就係佢最嘈。

中學生涯入面，班上面總有一兩個搞事嘅人。

爛口輝佢已經幾日無返學，我都唔知佢搞乜，定係我出手太重？





唔會呀，我嗰陣見佢傷勢都唔重。

「咁就好啦。」家姐好淡定地回應。

「題目就係.......」

「表白！」

「相信大家到咗喱個年紀，總會遇到一兩個自己鐘意嘅人，或者俾人鐘意過。」





「Miss Tai我自己係喱個年紀都遇過啦，話無就係呃你嘅，所以！想寫俾邊個就寫啦，真情流露出嚟嘅文字，先係最感人。」

「咁Miss Tai係咪有寫過情書俾人呀？」喱條問題唔係其他人問，正正係在下。

我見家姐眼神呆一呆，想必佢估唔到會係細佬我跳出嚟刁難佢。

然後佢笑咗下，笑到成把刀咁，佢喱個笑容拋出嚟係足以殺死我。

我都唔知點解我會問，我只係純粹想問下，搞下個氣氛，點知會搞到家姐尷尬嘅姐........