《我家姐竟然做咗我班主任？？？》: 【20】

一場姊弟嘅學校戰爭就咁正式開始。

其實喱場戰爭無維持好耐，因為好快就分出咗勝負，贏嗰一方一定唔係我。

「戴 班 長 ！」家姐故意拉長嚟講，旁人只會覺得我唔小心戳中家姐某個穴位，而唔會聯想到咩姊弟關係。

「我呢，就無寫過情書俾人啦，但收到嘅情書就唔少。」佢撥一撥自己嘅劉海，語帶輕挑，表情甚是囂張。

「WOW！」班上面嘅男仔同少數女仔係度叫囂，啲八婆都唔會放過喱個機會啦，「我要聽我要聽！」





一班花生友。

其實我都想聽，因為我都唔知，哈哈。

「所以呀！你哋寫嘅情書係咩level，我一睇就知架啦，咪諗住求其寫俾我呀！」佢輕輕帶走眾人嘅情緒。

但係總有啲醒目仔，你係呃唔到佢哋，佢哋有著非一舨嘅好奇心，對於求知嘅欲望係深不見底，有一份追求嘅執著。

「你都未講咩事！」





「係囉係囉，我哋寫之前都想參考下Miss嘅例子呀嘛，係咪先！」同學A附和。

「係呀係呀！」

面對學生嘅刁難，家姐都係微笑帶過，打份工姐，係要受氣架啦。

「等你哋寫好之後再講啦，好無？」溫柔嘅聲線一放出去，連女仔個心都可以軟化。

之後我哋唯有乖乖聽話，因為都令唔到啲咩料。





小息嘅時候見到我班啲人好認真咁寫，仲要偷偷摸摸咁，方死俾人見到。

但我係例外，因為我琴晚已經寫好啦，我諗住就咁交上去.......

咪住！

我交咗上去，咁我之後用咩嘢同漫澄表白呀？

呀......我問返家姐拎咪得囉？真係醒呀我。

我成日就係咁留意住漫澄寫啲乜，唔知點解我會聯想到星爺同朱茵係逃學威龍嗰一幕，係班上偷望嗰一幕呢，記得嗎？



係嗰一種清澀，傻裡傻氣嘅感覺。





漫澄都不例外，係度左掩右掩，唔俾我偷望。