《我家姐竟然做咗我班主任？？？》: 【18】

「咁你細佬係毒撚嚟架啦，我就唔信你初戀就好成熟啦。」我一手搶返封情書，但出奇地我又可以搶得好輕鬆。

家姐佢換咗另一個表情，坐起身同我講，「我呀......初戀嘅時候真係幾幼稚架，就連自己呀...都唔知算唔算係初戀。」

「家姐有好多嘢都無同你講過，始終我哋都相差咁多年，有好多嘢我經歷過，而你無。」

「當中嘅感受，你唔會明白，等你自己親身經歷過，先會知道當中有咩感覺，學到啲乜。」

我好認真咁聽緊家姐講，一字不漏咁聽入耳。





甚至比起家姐上堂嘅時候，更加認真。

因為家姐好少會同我講喱啲嘢，好難得架，平時佢都係同我打打鬧鬧，串嚟串去。

可以係間房到一齊傾下心事，其實係一件幾好嘅事，喱種機會唔多，這個場面將來都唔會好多。

所以機會一嚟，就好好珍惜。

「做咩無啦啦同我講喱啲嘢嘅？」我都收起咗過往玩玩下嘅表情。





「你都慢慢大啦，我都察覺唔到，原來你已經from4，已經去到考DSE嘅一條直路，有啲你都會慢慢接觸，經歷返家姐以前行過路。」

「我唔想你好似家姐咁，將一段感情收埋咁耐，折磨住自己。」

「家姐呀.......」我唔知發咩神經，覺得喱刻好溫暖，好慶辛自己有一個家姐。

「多 謝 你。」

「哈哈哈，你份人真係好傻，搞到我都驚你會俾人呃，俾人玩。」





家姐隻眼，閃過一剎那溫柔嘅目光。

「我都驚架，但我更加唔知點做好，由細到大，我都唔了解男女之間嘅嘢。」

「我身邊啲朋友都好早熟架，小學就已經好多都拍緊拖，但我都唔知咩係鐘意，只係想玩。」

人仔細細，咩都唔識，求求其其拖下手仔就當係拍拖。

「係咁架啦，細細個係Kai下Kai下，但嗰段時間係最開心，連笑都可以唔洗問點解，但你依家要笑，都需要各種理由。」

「人越大呀，就越難笑得出。」家姐笑住講，我睇得出，佢喱種笑，係苦笑。