《我家姐竟然做咗我班主任？？？》: 【16】

我當然唔似小說入面嘅情節咁樣，從此愛上咗睇小說，將來大個咗要做小說家，就係因為女神嘅一句說話。

現實中係有好多現實考量，小說係miss曬喱啲考量，將所有事情都合理化。

咁當然咁，係有咁嘅可能，但係低囉，同埋喱啲唔係正常人做嘅。

所以漫澄俾我嗰本書，我睇咗一頁，就無睇落去。

因為吸引唔到我，同埋我份人真係靜唔到落嚟去睇書，如果得嘅話，我讀書就好高分啦，仲洗鬼靠家姐咩。





不過我返到去我諗咗一個好好嘅方法，我覺得呀......好似漫澄喱種文青嘅女仔，會受！

就係寫情信！

我諗過架啦，喱種情節成日出現係小說呀，電視劇入面，我估係好多少女入面嘅憧憬，又可以發揮下我嘅文筆。

絕！

老實講，我係有啲沾沾自喜，咁樣嘅諗頭都俾我諗到。





我返到屋企就係度閉關寫情信，因為要醞釀情緒，我揀咗套青春愛情片嚟睇，順便可以效彷一下。

那些年，我們一起追的女孩。

細細個真係好傻好低B，以為模彷電影或者電視入面嘅情節，就會好型，好浪漫。

但其實做起上嚟，效果可以係差天共地，對比起電影，現實生活少咁一樣嘢——音樂。

你唔會表白嘅時候，忽然間有人幫你播「告白氣球」然後下面仲可以配埋歌詞。





喱樣嘢，我都係後來先至明白。

「咚、咚、咚！」陣陣敲門聲傳入嚟。

「邊個呀？」我係房到問，難得有feel嘅我，都瞬間消失咗。

「係我呀。」家姐？佢今日返嚟？

然後家姐就開咗門入嚟，未經我準許。

「喂！我都未俾你入嚟。」我枱面上嘅嘢都未嚟得切收埋佢就俾家姐見到曬。

「怕咩呀？大家兩姊弟有咩唔知得？」

「你要打飛機都可以同家姐講架。」佢好開懷咁取笑咁，我哋又再返返去以前咁。