《我家姐竟然做咗我班主任？？？》: 【15】

對於愛情喱樣嘢，我未曾經歷過，但聽家姐咁樣講，彷彿自己都學埋嘢咁。

「明就唔係幾明啦，愛情太深奧啦，你自己明就得啦。」我都放低咗個心頭大石。

家姐佢係銀包度拎咗張500蚊出嚟，「嗱，喱啲錢你拎去當醫藥費又好，當係我報答你又好啦，總之就袋好佢。」

「哇！多謝家姐。」

500蚊對我嚟講好多架啦，100蚊都夠我洗一個禮拜。





有家姐錫的確係唔錯嘅，哈哈哈。

屋企人始終都係你嘅依靠，就算平時幾衰都好，一有咩事，都會撐你。

至少家姐有事，我唔會唔理，相反，如果我有咩事，我相信我家姐都唔會唔理。

我同家姐都變返平時咁，有講有笑咁，件事我哋亦都無再提過。

家姐佢係咪放低咗心結，係咪成功走到出嚟，我唔知。





我哋都有唔同嘅人生，我但求家姐過得安好就夠。

嗰一晚，我同家姐傾咗好多嘢，好多細細個嘅事啦，將來嘅嘢，但家姐都無透露佢嘅過往。

跟住我哋返學都係前後腳，佢出門口先，然後到我。

返到學校有關家姐唔好嘅傳聞，同埋爛口輝同David咁啱兩個都無返，我包住傷口都返啦，兩條蛋散驚咗唔敢返學？

家姐一入班房，如往常般冷傲，但佢應該感覺到班上面嘅奇異眼光。





佢無理到，一臉輕鬆自如，睇得好開嘅樣子。

反倒漫澄見我傷成咁，好關心我，一返到嚟就係咁望我個傷口，我知佢想問我咩事，想關心我，但欲言又止咁。

「女班長，喱排男班長受傷，行動唔係咁方便，多多照顧下佢知道嗎？」家姐命令地道。

「知道。」漫澄乖到好似隻兔仔咁。

我見到家姐好似變返平時咁，我都放心啲，希望佢係愛情路上揾到個好男人啦。

但我自己嘅愛情路上，就需要自己爭取啦。

家姐佢對我笑咗笑，我就知佢又係係度「幫」我。

其實我都唔係傷得好嚴重姐，又未至於話到要照顧我咁誇張，但聽到都會覺得好開心嘅。





同時間，我感覺到一種唔友善嘅眼光望住我，我都唔知點解。

係小息嗰陣，我係自己張枱度瞓教，因為琴晚傾太夜，依家好眼瞓。

漫澄已經唔知去咗邊，我都無理到，反正我哋班上面嘅男仔同佢傾偈，佢都一樣愛理不理。

就算我坐係佢隔離，佢都係對我愛理不理咁，講十句先有反應。

係就嚟上堂嘅時候，漫澄返嚟，然後放咗本書係我張枱度，搞到我醒咗。

「嗯...？咩嚟架？」我睇一睇個書名——守護影子的天使。

「做咩俾本書我呀？」我好奇一問。





同時又覺得幾好笑，無啦啦俾本書人，係人都係覺得奇怪，同埋好笑，但係漫澄身上，係笑唔出，因為佢一臉唔似玩嘢、玩開笑咁，而係好認真。

應該係話佢無時無刻都認真。

「無......」佢同一般女仔西口西面唔一樣，一般女仔會好玩得，成日笑笑口，然後忽然間唔講嘢，唔笑，形成一種落差，叫做西面。

但漫澄係一直都黑口黑面，無咩笑容。

「只係見你依家受咗傷，俾你解下悶。」佢冰冷地道。

但冰冷嘅語言都掩飾唔到佢關心我嘅行為，至少我係咁理解。佢唔似啲會無啦啦俾書人嘅女仔，佢只係關心我？我唔知，我只係咁樣覺得。

「多謝曬喎。」我向佢報以一個感謝嘅微笑。