《我家姐竟然做咗我班主任？？？》: 【14】

我去到家姐個屋企，我淨係去過幾次，都係同家姐玩一陣就走咗。

留係家姐屋企，喱次都係第一次。

佢一入嚟就放低咗我個書包，忽然間我覺得超唔好意思，於是講咗句，「唔該。」

原來兩姊弟都會有唔好意思嘅時候，係我印象中都好似係第一次。

「兩姊弟客咩氣呀！真係呀......」家姐佢惡係惡，但其實份人好溫柔。





係人面前就扮曬一副堅強嘅樣，係背後，都只不過係一個脆弱嘅女人仔。

「你坐下先，我幫你消一消毒先。」跟住佢就走去拎嘢。

家姐佢好細心咁幫我消毒傷口，為咗唔令我咁痛，佢好溫柔，好輕手咁幫我消毒。

唔知係咪大個咗嘅原故，以前細細個體育堂整親呀，都係家姐幫我手消毒。

此情此景，並不陌生。





但係以前唔會覺得怕羞，反而明明唔痛，都會扮到好痛，然後鬼殺咁嘈。

依家就唔出聲，會覺得怕羞......我都唔知點解。

細看之下，原來家姐個樣同以前比都唔同咗好多，之前我小學，佢中學，個樣好清純，好甜。

依家比起前成熟咗，輪廓都深咗，靚唔靚就見人見至，但我比較鐘意以前嘅佢。

「點呀？痛唔痛呀？」家姐柔聲說，心中有啲甜絲絲嘅味道，令人聽落去好舒服。





「無呀。」我尷尷尬尬咁講。

係喱一個咁嘅空間，四處無人，環境幽靜，氣氛舒適怡人嘅地方。

如果家姐唔係我家姐，身份只係我班主任，又或者係我女朋友，我諗我真係唔知會做出咩事。

但當然唔會啦，我唔似得家姐唔知自己做緊咩，我知咩係應該做，咩唔應該做。

好快家姐就幫我消完毒，包紥完。

「唉......」家姐佢輕嘆一聲，然後哈哈大笑起嚟，「哈哈哈哈。」

搞到我一頭霧水。

「我哋真係兩姊弟，都係衝動派。」家姐佢笑完，就冷靜地講。





「我就係為咗愛情衝動姐，都唔知你又做咩咁衝動。」佢都係笑笑口咁講。

「我咪就係為咗你衝動囉！」我好大聲咁講，「你係我家姐嚟架！條仆街搞到你咁，又整到你喊，唔幫你出返口氣仲係你細佬嚟嘅咩？」

「唉......你真係呢......」我從家姐個表情得知，佢好開心。

「我知架啦細佬...」家姐拍一拍我膊頭。

「我有反省過，自己衝動嘅後果。如果我真係做咗David SP，我係學校嘅聲譽就會有影響，甚至會跟成世......」

我好欣慰家姐真係諗通咗。

「我都知你嗰一刻係會亂，然後做咗啲唔知乜嘢決定，但你過後冷靜下，稍為諗下後果，你就知件事係幾咁戇居。」





雖然我中四，但至少我都明白，當局者迷，旁觀者清。

「家姐知道，呀城佢一直都係我心入面，無離開，當見返好似佢咁樣嘅人，就會勾起當年嘅回憶同埋情緒。」

「雖然我知道事實，係呀城唔會再返嚟我身邊，亦唔會好似以前咁，但其實心入面都留有佢嘅位置，都仲對佢有一絲絲嘅希望。」

「你知唔知呀，同佢出街嘅種種細節，都同呀城一模一樣咁，當時俾我嘅感覺，就好似呀城返咗嚟咁。」

「就算我同好多男仔出過街，食過飯，拍過拖，但都俾唔到喱一種感覺我。」

「男仔可能對愛情好理性，只要俾到想要嘅嘢佢，就可以俾返你想要嘅嘢你；但女仔唔係，只要你俾到感覺佢，佢就會俾返你想要嘅嘢你。」

「我唔知你明唔明，但我依家已經下決咗決心，要同過去講聲88，我要繼續向前行啦。」