《我家姐竟然做咗我班主任？？？》: 【13】

我無俾David佢有休息嘅機會，佢退後咗幾步，我即刻沖上去打多佢幾掌。

佢都算反應快，有做防禦，我已經無得打咁輕鬆啦，但我都用盡全力，一諗起家姐就力量係咁湧出嚟。

David俾我打到無力招架，已經好幾處爆曬肛。

「喂！企係度做咩呀！幫手啦！」佢好大聲呼叫爛口輝。

我連正眼都無望過爛口輝，我懶得理佢幾時嚟幫手，我只係想怒打David。





我一拳一拳咁往佢個頭起勢咁打，每一下都用盡曬力，雖然自己都好痛，但一見到佢咁黑人憎嘅樣，就覺得喱啲痛算得係咩？

過咗無耐，爛口輝已經過咗嚟，兩個人合力成功阻止咗我，但佢哋無因此收手就咁走，反而兩個打我一個。

我預咗。

但起碼都可以打到David爆曬肛，大家都係兩敗俱傷。

我最尾都拖住傷痕累累嘅身軀返屋企，但我唔敢返屋企，我驚老豆老母見到會......鬧鳩我。





於是我徘徊係屋企留下，唔敢返上去。我細細個做錯嘢都係會咁，唔敢去面對。

次次都係家姐幫我，今次都唔例外，我心入面係期盼住家姐都會幫我。

我一路等，等到天黑，覺得咁樣唔係辦法，於是決定返上去嘅時候，俾我係樓下見到同我一樣，諗住返屋企嘅家姐。

「細佬？做咩係度嘅？」家姐一放咗工，就唔叫我做英雄。

一時之間，我都反應唔過嚟。





「無...嚟抖下氣姐。」我求其作個藉口。

可能係燈光問題，家姐仲未察覺到我嘅傷口。

「嚟啦，咁我一齊上去啦。」家姐上前想拉住我隻手，我下意識咁避開。

「做...咩？...哇？你搞咩嚟呀？」

家姐終於發現。

佢即刻拉我去一二邊，搵個無咩人嘅地方，然後好嚴肅咁問我咩事。

佢老師嘅威嚴又再出現，完全同佢係公園係二個人嚟。

「無......落樓梯仆街姐。」我講咗個連自己都唔會信嘅大話，但總好過唔講呀？





「唔洗你講呀，家姐都知道咩事啦，你當我傻呀？！」

「如果我蠢到咁都俾你呃到呀，就做唔到你班主任啦。」

家姐講嘅任何一句，我都駁唔到。

「嚟啦，去我屋企啦，你依家傷成咁，返到去老豆老母又嘈到拆天架啦。」

「下？咁你今日㗇做咩？」

「諗住俾家用架，依家睇嚟就要遲下先啦！」

係我徬徨無助嘅時候，又係家姐出嚟幫我，我諗屋企人就係咁，互相幫忙。





係自己無助嘅時候，屋企人就係你嘅依靠，我如是，家姐如是。