《我家姐竟然做咗我班主任？？？》: 【4】

「你...你得...架..姐典...解會知呀！」佢飲完啖水，含係個口度，好似含緊啲米青咁。

「咁你對漫澄有無感覺呀？」佢一副老鍊嘅樣。

「下？你講乜呀？」

「講乜？咪扮啦細佬！我一睇你個樣呀，就知你鐘意佢啦！」家姐佢一眼就睇得穿我。

我無所遁形，「咩喔......都算唔上鐘意。」





唔知點解，我唔係幾時講喱個話題。

「做咩呀？怕羞呀？」

佢做乜撚嘢咁直接？唔諗下佢細佬我嘅。

「無呀﹗邊有﹗」細個嘅時候，真係好撚戇鳩。

就算大個咗，都唔明自己點解嗰陣可以咁戇鳩。





「洗唔洗家姐幫你呀？」佢個樣顯示佢信心爆棚。

「幫咩呀？」我膽戰心競地問。

「幫你溝佢囉﹗我包你溝到佢﹗」

家姐佢拍曬心口，誓言會幫我溝到漫澄。

下？佢講堅定講笑呀？





但我從家姐嘅表情分析，佢唔似係講笑喎。

「你點幫呀？」老實講，我唔係幾信，但又好矛盾喎，因為我有啲期待，我真係可以溝到漫澄？

「遲下你咪知囉！你家姐我幾時老點過你呀？」佢信誓旦旦咁講，究竟佢係有咩方法呢？

「屌！你成日都老點我架啦！細細個就已經成日點我做嘢。」

家姐忽然間換個好認真嘅樣同我講，我嚇親。

「我有無咁衰格，搵自己細佬個幸福嚟玩？」佢好嚴肅咁講。

「得啦得啦，我知啦。」搞到我好鬼死尷尬。

「家姐我.......中學無拍過一場拖，搞到一世遺憾，到依家都仲會記得。」





「嗰一種遺憾真係伴隨住你一世，因為你再無機會返過去。人呀...只可以返去望一望咋，唔可以返去行。」

家姐終於有返啲老師嘅感覺...架子？唔知點形容啦。

「係真唔係呀？你中學無拍過拖？我唔信！」真係唔係幾信，佢啲男仔fd多到仆街，ig都係仔多過女。

「呃你做咩呀？我都想自己拍過拖，但可惜我無...」

佢眼神好複雜，此刻嘅我，無足夠嘅人生閱歷去理解，多年後我記起，喱個眼神，似係掛住某一樣嘢/某一個人。

佢忽然間講啲咁感性嘅嘢，我都唔知講啲咩，因為好似超越咗自己認知咁。

「家姐我都唔想你有咁嘅遺憾，所以我會盡量幫你。」





佢誠懇嘅態度終於令我相信佢，令我折服。

「信住先啦！哈哈！」好尷尬，即使係姊弟，都會有老尷嘅時候。

而化解尷尬最好嘅方法，就係講笑啦。

「有咩要家姐幫手嘅，就同家姐講啦。」講完之後，佢就入自己間房，無幾耐之後，佢換曬成個look。

著到好戰爭格，又低胸又絲襪咁，好誇張。

「哇，你著到咁，諗住去邊呀？」我好奇一問。

「多事啦你！」

其實唔難估，大約都係去LKF喱啲地方架啦。似係約咗班fd啦，因為佢仲坐落沙發度sd緊whatsapp 。





「小心啲呀，聽日仲要返學架！」我取笑佢。

「呀...依家我係你班主任，定係你係我班主任呀？洗你點返我轉頭？」

係家姐眼中，我就係長唔大嘅細佬，唉......

「擔心你咋！好心著雷劈。」

「得啦，我自己有分數，byebye啦，大dee。」

佢平時都叫我呀dee嘅，加上我姓戴，咪大dee囉。