我只不過喺自修室溫書，點知比我遇番佢。: <六十八>唔好走
阿楓視角
放完榜就番屋企同佢地講番個分，等佢地都安心啲，特別係阿媽，佢最擔心。
我坐喺房到，不停望住部電話：「問唔問下佢個分好呢…」
一日唔知佢個分，一日都會玀玀攣咁，我怕佢會觸礁….
但係最後我都係冇勇氣send個訊息過去，我仍然冇勇氣去搵佢。
呢個暑假，原本我已經有曬計劃點樣去同小涼度過，其實我都可以照去做我計劃嘅活動，但係身邊冇咗小涼..咩都冇意義。
其實我一直都仲好掛住佢，但係我對佢傷害實在太大，所以要佢原諒我，睬番我係好難嘅事。
漸漸地，我地就好似變咗連萍水相逢都講唔上嘅陌生人，佢就好似喺我生命消失咁。
唯一清楚嘅係，我每一日都仲會諗起佢，無論做緊咩，食緊咩，去緊邊。
好多地方都充滿住我地嘅回憶，令我一直忘記唔到佢。
忘記唔到佢令我怦然心動嘅笑容，忘記唔到我地一齊果陣嘅時光。
「仲未搵番小涼啊？」有一次成班人出街果陣阿晴問。
我擰頭。
「你為咗佢落曬形啦，一啲都唔似費子楓。」阿言講。
「件事都隔咗咁耐，佢都落咗啖氣啦。」佢繼續講。
「我覺得自己好對唔住佢，所以我唔敢…」
「其實佢仲好掛住你架！佢都為咗你成個人都灰曬。」阿靜講。
「你點知架？」我問。
「佢為咗唔俾佢老豆起疑，所以成日要扮有街出，但係唔通一個人出咩，所以咪搵我同阿晴陪佢。」
「佢仲係咁為你著想，嬲極都有限啦。」
「你..講真架？」
「呃你托咩！其實佢都知你對佢係點，但係唔知點樣面對你，始終你條仆街…」
佢好似唔敢再講落去。
「係..我真係個大仆街..」
「而且..佢就黎去外國啦…..」
下?!
「咩…咩去外國啊？咁突然？！」我大吃一驚..
「佢DSE炒咗科中文啊，所以要去外國讀書。」
唔係啊嘛..真係過唔到呢關？
「你快啲去搵番佢啦，我怕你後…」
阿晴未講完我已經跑走咗..即刻跑去搵佢。
我嘗試打俾佢，一直心急如焚。
再隔兩個禮拜打俾佢，唔知佢聽唔聽呢？
「喂..？」佢聽咗啊！終於聽咗啦！
「喂，林小涼！巴渣妹！你喺邊啊？」
「我..喺屋企囉..」
「我而加過黎搵你！你一定要落黎啊！」
「哦..」之後我就收咗線，然後就一直全速去佢到，我恨不得自己有瞬間轉移嘅能力。
隔咗一陣..其實我都唔知幾耐，因為我淨係諗住佢…總之終於去到佢屋企樓下。
佢落黎之後，望到佢個樵粹曬嘅樣，我直程係心如刀割。
我二話不說，即刻攬住咗佢。
「我好掛住你..」我講..我真係好掛住佢。
「我都係……」佢又好似開始啜泣。
「唔好走….」
「走？走去邊？」
「你唔係要去外國..？」
「去咩外國？？」
「阿靜話你DSE衰咗要去外國…」
.
.
.
「唉..唔係咁講我諗佢都唔會做嘢。」阿靜講。
「希望佢好好珍惜機會啦。」阿月講。
「你仲好講，唔係你？！」
「得啦得啦，我已經好內疚架啦。」
「係喎，小霖呢？冇叫佢出黎嘅？」
「唔知喎，打咗俾佢啊，佢話有嘢做喎。」
.
.
「我DSE衰咗？我有28分喎。」
「佢話你科中文炒咗..」
「我中文有4啊，冇炒啊。」
「即係你會留番喺香港..？」
「會啦梗係..你好想我走咩？」
「唔想唔想！你唔好再離開我，我頂唔順呢啲日子啊！」我再一次攬住佢，牢牢的。
佢唔洗走啊屌！！
「我冇話原諒你喎死人頭！」
「唔原諒你又落黎..」
「落黎睇你幾時死啊！」
就算係死..死之前可以見到你一面我都死得瞑目。
我知道佢肯落黎，即係已經算肯原諒我。
「其實係因為呢封野….」佢拎住一封信。
「所以因為睇完呢封信你就明白曬所有嘢？」我睇完之後問。
「嗯..我知道其實只係你心腸軟…」
「小涼..我希望以後我地都可以誠誠實實咁，所以我都唔想呃你..」
「其實番到黎之後..我係有少少對佢嘅錯覺..不過只係好短好短時間架炸..我講真架！」
「都好難怪嘅..有個咁好嘅女仔喺自己身邊咁多日..」係咪咁通情達理啊？
「不過唔代表我放過你啊！你始終對我唔住！」都估到冇咁簡單。
「係係係..對唔住小涼大人！」我自己扭住自己耳仔係咁講對唔住。
「我應承你，以後同任何女仔都保持一定嘅距離，做任何事都諗下我屋企人，要顧後果，做一個有擔帶嘅男人！」
「吓…淨係你屋企人？咁我呢？」
「你咪都係我屋企人~」
「噗哧」佢忍唔住笑出黎，但係好快又扮番嚴肅。
「我唔理啊！呢排你要守行為！」
「但係..守行為之前可唔可以俾我去..話曬..」
「我明你講乜，我陪你去啦，我都想同佢去講聲對唔住。」
冇錯，我地要去搵嘅人就係小霖。
「行啦。」我講，然後再拖住佢隻手。
我終於可以再次拖起小涼隻手，離開佢屋企樓下，繼續行我同佢嘅路。
呢個地方，見證住我地一齊、初次約會、鬧交、到重逢嘅時刻，每一次企喺呢到個感受都唔同。
我地一齊果陣，係我心情最複雜嘅時候。果一日我喺呢到傷害咗一個女仔，但同時得到一份愛情。
我唔了解呢種患得患失嘅感覺，究竟呢個遊戲邊個贏邊個輸？
我地初次約會果陣，我記得我企喺呢個位，望到小涼嘅樸素果陣嘅急速心跳，仲有佢為我準備嘅早餐..仲有我地第一次嘅接吻。
仲有上一次鬧交，我淋住雨咁，聽住佢鬧我嘅每一字每一句，比起雨水嘅潑打更加無情，比雨淋下最多病，但係比佢一針見血咁鬧係一種痛入心扉嘅感覺。
我第一次知道咩叫心酸。
直至今次嘅久別重逢，教識我嘅係珍惜，珍惜佢對我嘅愛，珍惜佢喺我身邊嘅時刻。
佢對我嘅付出唔係必然同應份，我再唔好好珍惜倒不如死咗去好過。
可是..我地去到小霖屋企果陣，不斷按門鐘都冇人應，睇到地上啲灰塵痕..佢或者已經唔喺度。
我即刻打電話俾佢，但係就一直都未能接通。
我再打俾阿言佢地，佢地都唔知小霖嘅事，亦都一直連絡唔到小霖。
「冇辦法啦..遲啲再連絡佢啦。」我講。
「好啦。」
到我番到去之後，我開信箱，同樣都發現咗封信…