我只不過喺自修室溫書，點知比我遇番佢。: <六十七>我係林小涼
嗨，我叫林小涼啊，你唔介意嘅就聽下我嘅故事。
從前我係一個好細膽嘅細路，俾人蝦都唔敢出聲，驚唔夠人惡。
但係你唔搔擾人，唔代表人地唔會搞你。
由好耐以前嘅某一日，我落咗去兒童遊樂室，遇到幾個小霸王。
我同佢嘅故事就咁開始咗….
「咦，冇人陪你玩啊？我陪你啊！」
果日喺遊戲室，有個死肥仔帶住幾個細細粒圍住我。
我覺得佢地好討厭，所以我就唔制，點知佢地捉實我！
「你地係到做咩呀！放開佢呀！」有個男仔行咗過黎，喝停佢地。
「關你咩事呀，走開啦。」死肥仔首領對住個男仔大嗌仲打咗個男仔一拳。
點知個男仔好似上咗電咁打番拳落個死肥仔到，驚到個死肥仔跑走咗，佢啲黨羽都落荒而逃。
「你冇事呀麻？你傷咗啦。」我好擔心咁問。
「小事啦，好快就冇事。」佢仲笑住講。
小男孩個媽媽呢個時候就黎到接小男孩走。
「你聽日係咪會再翻黎呢到玩架？」我問。
「會，一定會！我應承你啦。」小男孩答翻我。
之後媽咪都番黎接我，我一見到佢就到喊出黎。
「咁雜架原來？咁聽日唔好黎啦。」媽咪講。
「唔好啊唔好啊，聽日我要落啊！」我唔想失約..
點知到咗之後果日，我等極都等唔到個男仔..再一日都等唔到..等多咗日，仍然唔見。
估唔到我一心唔想失約..換黎嘅只係俾人失約。
之後我就冇再去遊戲室。
我冇嬲個男仔，可能佢係有咩事先黎唔到，況且可能我地只係萍水相逢。
但係我就學識保護自己，唔夠人惡就扮到惡，等想蝦我嘅人都俾我嚇窒。
十幾年之後..竟然俾我同樣地喺會所..撞番佢。
見到佢果刻..其實我都唔太肯定係咪佢，但係望多幾眼就有種好熟悉嘅感覺，致使我肯定就係佢，佢就係果個男仔。
或者係緣份嘅驅使，我地有好多接觸嘅機會，令我發現倒呢個男仔好多優點。
仲令我..有啲鐘意咗佢。
雖然佢成日玩我、笑我，成日叫我巴渣妹，但係佢為人好真誠，對兄弟好有義氣，仲會成日氹我開心。
佢甚至因為唔想傷害我而向我隱瞞佢同佢兄弟之間有爭執嘅原因。
或者係我前一段感情帶俾我有所傷害，加上爸爸嘅阻撓，而令我未可以好盡情去愛佢，但係慢慢我真係感受到佢對我嘅付出同心血，所以先令到我可以好放心咁去信任佢，去愛佢。
縱使有時佢都會激嬲我，但係我好少真係嬲佢，我只係想令佢反省下自己唔啱嘅地方。
佢有好多優點，唯一就係做人冇乜方向感同好少去諗後果。
我好擔心佢之後嘅前途，所以就算有啲橫蠻，都係想令佢長大。
我知道我愛佢，所以都嬲佢唔落，情侶間當然會有拗撬架啦，每一次拗撬都唔係一個人造成，而係雙方都有問題。
好似上次溫書咁，我知我對佢鞭策好似太over，我知我嘅問題係邊，但係佢都漠視咗我對佢嘅緊張，咁樣先令我最嬲。
不過雙方都知自己問題後，釐清番之後都係穩固我地關係嘅一步。
但係今次….令我有啲唔知道我地仲可唔可以行落去…
果日喺阿月屋企見到果幅相，我真係好嬲好嬲，我覺得阿楓好似出賣咗我咁，甚至好似以前個衰人咁，佢以前對我講過嘅嘢好似唔算數咁？
「小涼啊！你聽我解釋啦。」佢追出黎。
「仲有乜解釋啊？你唔係想講張相係假架？」我都唔知可以點樣面對佢地，呢種傷害真係好痛好痛。
我控制唔倒自己，所以就不斷喊不斷喊。
「唔..唔係假...」
「咁即係真架啦！」
「唔係你諗咁架，果陣其實..」
其實佢同小霖嘅關係喺我腦海困擾咗好耐，我一直都覺得小霖對阿楓仲有感情，而阿楓又一直拖，我好明白係因為佢唔想失去小霖呢個朋友。我一直都相信佢地係冇嘢。
因為我知道阿楓點樣對我，點樣對小霖。
但係直至我望到果張相，我已經抑制唔倒自己嘅醋意同憤怒，果一刻淨係覺得佢地已經超越咗我睇「朋友」意思嘅底線。
「你明知小霖仲鐘意你仲同佢瞓埋一齊..仲...」
「仲用住一對嘅鎖匙扣！」
「我唔知佢買咗個一樣款架！」呢樣先係我最心寒嘅嘢，若果阿楓真係唔知嘅話，咁即係話小霖…
「唔好講啦..冷靜下啦我地..」我唔敢再諗落去，我淨係想逃離呢個人類荒謬。
我應唔應該了解清楚發生咩事先？
我應唔應該相信阿楓呢？
我唔知..我真係唔知..
我淨係覺得好攰..好攰..
我翻到屋企之後，最大嘅任務就係要扮冇事…唔可以俾佢地睇到任何異樣。
因為唔可以俾佢地知道我因為阿楓而唔開心。
我雖然好嬲佢，但係仍然唔捨得令佢形象受到損害..
阿楓一直打電話黎，但係果一刻我真係想自己冷靜一段時間..去思考下我地嘅關係，思考我地應該點樣繼續走落去。
加上我真係唔想面對佢住。
所以我冇聽佢電話，冇覆佢whatsapp，自我將同佢嘅連繫斷絕。
我一直以為唔理佢，唔聽佢電話，就會慢慢冇咁掛住佢。
直至到有日，突然有個陌生電話打黎，但係我見係6字頭，應該唔係咩推銷電話，所以我就聽咗。
「小…小涼！俾20秒我，唔好收線啊！」點知都係佢黎...
其實一聽到佢把聲我有啲想喊..原來我真係..好掛好掛住佢，我甚至已經分唔清我掛住佢多啲定係嬲佢多啲。
「我..我有好多嘢同你講啊！聽日2點…你屋企樓下等啊！」
我唔敢出聲，我驚俾佢聽到我嘅啜泣聲。
「我…講完啦。」
然後我就即刻收線，聽多一秒我都驚會崩潰。
到咗第二日我一直好掙扎落唔落去好，我好想見佢，但係一諗起佢同小霖我就..
可能佢嘅掙扎同躊躇嘅特質都傳染咗我。
一直喺廳到徘徊咗好耐，直至見到個天落曬大雨咁，加上聽到樓下嘅一句：「林小涼！你落黎啦！」
我即刻衝咗落去，就算件事未解決都唔想佢一直淋雨..我唔忍心。
喺搭緊LIFT落去果陣，我一直對住塊鏡練習..練習一個最目無表情嘅樣。
「你走啦….」我叫佢..見到佢咁我都好心疼。
「你聽我講咗先啦！」
「我已經聽咗你講好多次啦！每一次你都話做事會諗後果，我信你架！然後又係呃我！」我再一次激動起來。
「我唔係要你完全臣服於我，但係唔通連兩個人好好共處都咁難咩？」
我只係想佢可以做任何嘢之前都會諗一諗我炸...我只係想兩個人相處可以誠誠實實炸！
「唔通你做事之前諗下我感受真係咁難咩？」
之後我就跑咗番去，我怕再望多兩眼真係會心軟。