我只不過喺自修室溫書，點知比我遇番佢。: <六十六>總要在雨天

只見佢冇講嘢，但亦都冇收線。
 
「我..我有好多嘢同你講啊！聽日2點…你屋企樓下等啊！」
 
佢依舊冇出聲。
 
「我…講完啦。」
 
「嘟..嘟..嘟..」佢收咗線，唔知佢會唔會黎呢..
 


一生人一次嘅Grad Din ，做過啲咩呢？我唔太記得，淨係記得係咁飲住酒，雖然又未至於醉，但係估唔到就咁渾渾噩噩咁過咗。
 
而第二日，我一點鐘就去咗佢樓下等，免得佢特登出咗去而我又唔知。
 
可是我等啊等，到咗2點半都唔見佢出黎。
 
唔知點解個天突然落起大雨，頭先明明仲好好天，所以我冇帶遮。
 
但係我唔可以就咁放棄，所以我一直等，等到佢落黎為止。
 


「林小涼！你落黎啦！」我向上大嗌。
 
兩分鐘之後，我終於見到佢嘅身影..
 
望住佢嘅眼神..係從未試過咁冷漠，表情亦然。
 
「你走啦….」就連語氣..都係如此生疏。
 
「你聽我講咗先啦！」我一邊俾雨水潑打，一邊講。
 


「我已經聽咗你講好多次啦！每一次你都話做事會諗後果，我信你架！然後又係呃我！」
 
「我唔係要你完全臣服於我，但係唔通連兩個人好好共處都咁難咩？」
 
「唔通你做事之前諗下我感受真係咁難咩？」
 
講完佢就跑番入去。
 
我仍然企咗喺到，我想淋醒自己。
 
我一直覺得只要小涼唔知，亦念在同小霖咁多年嘅友情，滿足下佢小小嘅願望係冇問題。
 
點知百密總會一疏，只要自己做咗啲唔啱嘅事，就點包都包唔住，只會欲蓋彌彰。
 
阿月做嘅事雖然係唔小心，但其實係個天冥冥中俾我嘅懲罰。


 
就算佢冇影到張相，冇喺果日俾小涼見到，但我都唔應該做啲對唔住佢嘅事！
 
「啊！！」我仰天長嘯，嘯聲仿佛帶動天雷，老天亦為我嘅嚎叫作出回應。
 
「嘩..衰仔..做乜搞到濕曬啊！」一番到屋企阿媽就問。
 
「係囉！行行下冇啦啦落大雨喎！」我裝作沒事，免得佢擔心，我已經唔可以再令任何人為咗我而有負面感受。
 
「快啲沖個涼啦，唔係凍死你啊！」
 
「係..」
 
我又再俾水潑打全身，不過今次係沖涼嘅熱水，但係我仍然借助呢個時間再發省自己…
 


接下來嘅一個星期，我過嘅生活四個字講得曬..行屍走肉。
 
咩人都唔見，咩街都唔出，除咗喺屋企，就去咗小涼屋企等佢，等佢落咗啖氣，等佢肯聽我解釋。
 
直至放榜果日，係啊，終於放榜，煎熬咁耐嘅DSE終於正式告一段落。
 
一早就到咁多記者捕喺到，唔通阿言真係..
 
我地約埋番去拎cert，大家果陣個心情都非常緊張。
 
然而拎到狀元果個唔係阿言，竟然係阿靜！估唔到佢真係咁勁，唔怪得果陣真係肯收佢。
 
作為佢好朋友，都戥佢好開心。
 
我好從容就開咗張成績表，都有28分，算係不過不失啊。


 
佢地..我指我熟果幾個，佢地都考得唔錯，阿言阿月都有30分以上。
 
小霖亦有30分，夠升大學有餘。
 
「我地好大機會會同U喎，不過無論同唔同都要成日聚！」阿星講，佢有25分，又係穩陣嘅。
 
「好！」
 
或者我地都已經算安全，所以先可以咁寬容，但係..總會有人歡喜有人愁。
 
唔知小涼考成點呢...