我只不過喺自修室溫書，點知比我遇番佢。: <六十五>一觸即發

「喂，阿楓，過唔過黎睇番啲相啊？」阿月打黎問。

「都好啊，我帶埋小涼黎，佢有手信要俾你地。」

「嗯好啊，我屋企等啦，阿靜都有手信。」

之後我就聯絡小涼，再約埋小霖一齊去。

小霖…我其實去完旅行之後就冇見過佢，淨係有whatsapp下咁。



我唔想再對佢任何超越知己之情嘅感覺。

但係要避都避唔到成世。

「嘩小霖好耐冇見！」小涼一見到小霖就講。

「係啊 ！」小霖都好似好興奮，但係一望到我就好似有啲唔知點嘅眼神。

佢個袋扣住個..天使鎖匙扣？！同佢送俾我果個咁類似嘅？



我靜靜雞whatsapp佢：「個鎖匙扣同我果個..」

「係一對架！」佢直認不諱。

OMG..

到咗阿月屋企，就見到阿靜喺到分手信。

「咦，阿楓？你地黎啦！」阿靜見到我地就好雀躍。



「啊….係啊，好耐冇見！」

「你地啲禮物喺到啊！」

我地過去睇，份份禮物都價值不菲啊！果然係有錢人。

我得到係良田嘅絕版Figure啊！香港炒到幾千蚊個。

「嘩..好貴喎..」我收到之後講。

「你鐘意就得啦！」佢講。

「嘩..佢份禮物好貴重啊，我送個御守俾你好似好小家咁。」小涼講。

「物輕情意重嘛，邊有得比。」



「嘻嘻，係喎。」

之後小涼都派埋佢啲手信俾佢地，雖然冇阿靜果啲咁貴，但係全部都好有心思。

我地食咗啲嘢之後，就開始睇番旅行啲相。

雖然而加又有google drive又剩，但係一個人睇啲相邊夠聚埋一齊睇咁正。

「你地睇下呢張，阿豪幾男神FEEL！」

我地果日喺藍曬圖幫佢影咗輯寫真，全部都好有感覺。

「仲有呢張呢張，阿言同阿晴幾襯啊！」阿星講。



「你第一日先知咩！」阿言同阿晴講。

我諗而家打風都吹唔散佢地。

「呢張都靚啊！」子妮講。

係我影佢同阿星嘅，唔怪得佢笑得咁甜蜜。

「車，唔知醜！」我講。

然而，當轆到下一幅，就令全部人都唔知點反應....

「小涼！」佢奪門而出，仲帶住兩淌眼淚。

佢睇到嘅..亦都係我地所以人都睇到嘅相...



就係阿月影我同小霖痴埋一齊瞓嘅相。

我追出去，一直追到樓下先追到佢。

「小涼啊！你聽我解釋啦。」

「仲有乜解釋啊？你唔係想講張相係假架？」佢好激動咁問，仲伴隨好多好多眼淚。

「唔..唔係假...」

「咁即係真架啦！」

「唔係你諗咁架，果陣其實..」



「你明知小霖仲鐘意你仲同佢瞓埋一齊..仲...」

「仲用住一對嘅鎖匙扣！」佢都見到...

「我唔知佢買咗個一樣款架！」

「唔好講啦..冷靜下啦我地..」之後佢就走咗，留低咗茫然嘅我。

之後我就上番去，佢地都追問我小涼點。

「最衰都係你！都叫咗你del架啦，你仲要留住！」我一黎就省尻阿月，當係發泄下都好。

「對..對唔住..嘛，趕住出門口所以唔記得咗..」佢都難辭其咎。

「阿楓..對唔住啊..」小霖講。

「唔..唔關你事..」

「你同我搞番掂去啊蕭皓月！」呢句唔係我講，我冇咁不負責任。係阿靜同佢講嘅。

「我同佢解釋番啦最多…」佢講。

「唔洗，要解釋我自己解釋番。」今次就真係我講。

我係咁打電話俾小涼，但係都冇人聽電話，後來仲好似熄埋機。

到番去果陣，阿豪仲有地方去，換言之得番我同小霖…

「真係好對唔住…我唔知自己嘅任性會搞出咁多嘢。」

「真係唔關你事呢…」

呢個時候我都唔想怪任何人，怪就只可以怪自己優柔寡斷。

「咁你諗住點做啊？」

「等佢冷靜下先算啦。」

「洗唔洗我…」佢又係想替我去解釋。

「唔洗，我搞得掂。」我好堅決咁講。

「阿楓…我就黎…」佢好似有嘢想講，但係呢個時候個電話又唔生性咁響起，我以為係小涼，所以連來電顯示都冇睇就好急咁聽咗。

點知又係啲垃圾調查，屌！

「係呢你想講咩？」收咗線我問佢。

「冇嘢啦，遲啲先算啦。」

「噢。」

番到屋企之後，我仍然不斷嘗試打俾小涼，一時就通咗，但係打多兩次又係熄咗機。

我已經連whatsapp都炸埋佢機，但都係冇覆。

我由最初嘅心急如焚，經過好多好多嘅等待，漸漸變得個人灰曬。

就連grad din我都係悶悶不樂咁去。

「仲未氹番小涼啊？」阿豪問。

「我都唔知，我試盡所有方法佢都係唔接觸我，我什至喺佢屋企樓下等佢，佢都係唔理。」

「你會唔會試下用個陌生電話打俾佢？」

「嗯…阿堅！！可唔可以借個電話黎？」

「哦…好啊！」

我用阿堅嘅電話打俾佢，佢果然肯聽！

「小…小涼！俾20秒我，唔好收線啊！」