我只不過喺自修室溫書，點知比我遇番佢。: <六十四>真人不露相
「巴渣妹，我地去踩單車好唔好？」我問佢。
「好啊好啊，好耐冇踩！做乜咁有興致啊？」
「我悶啊！」
「好啦好啦，GOGOGO！」有得玩佢就好雀躍！
坐言起行，係我地嘅習慣，轉眼間，我地已經入到元朗。
「嘩，好耐冇入黎新界！」一到埗，小涼就講。
「我都係啊。」
「梗係啦，你個大懶蟲，街都唔多點出。」
「唔好講啦，租車啦！」
我地租咗車之後就向住南生圍方向踩，果條路我踩過好多次，都已經好熟。
今日天朗氣清，又有啲涼風，一邊踩，一邊啲風發埋黎，真係好正。
「喂，唔好撞我啦，死人頭！」佢喺我前面踩，我故意整蠱佢，有意無意咁撞下佢。
「好啦好啦，我喺你隔離踩啦。」
我地並肩咁一齊踩，喺我夢寐以求嘅畫面，成件事不知幾浪漫。
「呢到就係南生圍啊..好靚啊！」我地踩咗唔知幾耐之後終於到。
「係啊！個地好起伏，小心啲行。」
黎到南生圍，就當然要去條橋果到影相，呢個係個不明文規定，唔影真係對唔住自己咁辛苦黎。
「一、二、三，笑！」我地坐咗喺橋邊自拍，我搭住佢，頭貼頭咁影。
「等我又po下ig先！」我講，講完就即刻放。
唔洗兩分鐘，已經有幾個like咗，阿月仲留言：「賤人，自私去！」
「哈哈，個阿月啊，早知嗌埋佢同阿靜啦。」我講。
「咁我地兩個拍下拖唔好咩？」
「好~梗係好，有你喺到就乜都好架啦！」
「超，都唔知係唔係！」
我地喺周圍都影咗好多相，我好似做咗佢攝影師咁，幫佢影咗好多女神相。
只佢一齊，嘻嘻哈哈，無無聊聊咁都可以hea一日，我都好開心。
「就黎夠鐘還車啦！走啦！」佢講。
然後我地就沿路折返，突然收到阿爸來電..
「喂？仔啊，你係咪喺新界？」
「係啊，你點知？」
「你阿媽講架嘛，我都喺附近做完嘢，過黎車你地啊。」
「好啊，我地食少少嘢先，你到咗打黎啦。」
之後我地就食下啲街邊嘢，因為小涼冇乜機會食而又好想食。
「你試下啲魚蛋，好彈牙啊！」佢隊埋黎。
當我將串魚蛋喺支籤到卸出黎果陣，隻手向後抆咗抆，一時大力得制，整親隔離條友。
「唔好意思。」我即刻耍個冧，費時節外生枝，但當我望到條茂利..唔係，係一班茂利果陣，我就知是禍躲不過。
「唔乜嘢好意思啊？大曬啊？」見到佢地有啲個身咁多個公仔，你估同張家輝一樣有童真有愛心啊？
加上啲已經脫曬節嘅金毛，我肯定佢地一定係出黎walk嘅。
「咁你想點啊？」
「想打你囉！」之後條MK首領..當住係先啦，就揮拳埋黎。
作為打開波嘅我，身手都有番咁上下敏捷嘅。
我一邊推開小涼，另一隻手就伸前擋住首領果一拳，然後再好快咁向住首領個肚回番拳。
今次小涼喺到，我唔可以再好似上次星矢吧果陣咁廢！
「等陣..條女好似幾索喎，你條女啊？」首領行過去小涼到，當我想去阻止果陣，其餘啲嘍囉擋住咗條去路。
「妹妹，呢啲廢柴你跟住佢做乜？跟我啦，我擔保每餐餵到你飽！」
「你收皮啦排骨！」估唔到小涼驚都唔驚。
「咁串柒柒？」首領捉住小涼隻手。
「等我好好炮製你！」
「炮製我啊不如 ！」
「邊撚個？」個首領望去聲音源頭。
「咩料啊阿伯？做架兩啊？」點解啲MK仔永遠啲對白都咁罕？
「憑你幾條友就想郁佢地削咗啲喎。」
「睇小我？」首領衝過去老嘢到，又向佢揮拳，MK仔淨係識揮拳..我諗。
我即刻去睇下小涼點，佢驚到即刻攬住我。
「老豆小心！」我大嗌..係啊，所謂老嘢就係我老豆！
「收皮啦！」老嘢..老豆隻腳一伸就踢低咗個MK仔。
「你地跟邊個架？」老豆一睇都知佢地係古惑仔。
我都唔明呢個年頭點解仲會有人行古惑，但係偏偏有班傻仔仲以為自己可以做陳浩南。
「你盤我啊？」妖，我忍夠你啦，係咪真係冇第二句？
「你講唔講啊？」老豆踎低咗摑首領一巴。
「阿楓啊..uncle佢..好惡。」小涼見到就講。
「唔洗怕，佢以前係出黎行，不過洗咗手好耐。」
「洗手..？」
「即係脫離咗好耐..哈哈。」金盤洗手都唔明..睇黎佢真係好單純。
「我叫傻B！跟長義火爆賓嘅，火山哥係我阿公！淆呢死老襯！」哈哈哈，傻B，乜尻嘢名黎？痴線！
「Call你大佬出黎嗲嗲去啦咁！」老豆講。
「喂老豆，唔洗搞咁大啊？」
「邊個蝦我個仔我就要佢跟到足架啦。」今日佢..好有霸氣喎屌。
「洗唔洗同你走先？呢啲場合唔係好啱你。」我同小涼講。
「唔好唔好，Uncle好型啊，我想留低睇戲。」
不消一會兒，有個好撚型嘅老西友，jel曬頭咁行過黎，好有殺氣，慌死人地唔知佢已經係大底咁。
所謂大底即係啲比較上位嘅大佬級。
「點啊傻B，邊個蝦你，話俾大佬知。」收皮啦，懶係有道義，我都有睇古惑仔，你地邊會講義氣。
「喲，賓仔，身乾頸靚啦！」老豆講。
「賓乜Q仔….啊..汶洛哥！」果個咩火爆賓好不屑咁擰過黎問，見到我老豆嚇到尻都縮。
今晚真係..大開眼界啊！
「阿大..條死老嘢…」
「乜撚嘢死老嘢啊！洛哥你都唔識？你阿公兄弟黎架！」火爆賓一嘢摑埋去，仲好Q大力。
「好啦好啦，今日叫你黎係想你教下啲細嘅，唔好成日蝦蝦霸霸先得架。」
「係嘅洛哥，冇傷親你個仔啊嘛？」
我即刻擰曬頭，費時辣熨啲猛人。
「好啦，我走啦，得閒搵你同火山飲茶。」
由頭到尾，老豆徹頭徹尾都擺起個大佬款，同平時果種小男人風格完全唔同，我都嚇親。
「UNCLE好勁啊！」我地走咗之後，小涼好雀躍咁講。
「哈哈，佢地呢啲小人物黎架姐，得個殼，唔洗太怕嘅。」
「係啦,叻啦。」我講。
我地行番架車到之後，咁啱有人抄緊牌。
「啊!阿SIR！走架啦走架啦！」佢又即刻變番果個笠曬水嘅費汶洛。
我同小涼都冇佢咁好氣。