我只不過喺自修室溫書，點知比我遇番佢。: <六十三>小涼回歸

唉頂頂頂！唔可以亂諗，其實只係有啲唔慣姐，瞓醒就會冇事架啦。
 
「幫你吹埋啦，費時你一陣又吹唔乾。」
 
「不如我地一齊搵番啲細個嘅回憶啊。」
 
「我人生都係有住你架啦...」
 
「借5分鐘俾我..攬實我好冇啊..？俾5分鐘我分享你嘅愛得唔得啊..」
 

「得啦..我識做架啦..到咗香港我就會..變番朋友嘅身份，俾我纏埋你呢個幾鐘啦。」
 
我愈想瞓，小霖嘅聲音就不斷喺我耳邊圍繞住，就好似有蚊咁，搞咗好耐先瞓得著。
 
接下來呢幾日我都留咗喺屋企，就算係毒，就算係悶我都唔想出街，可能真係好攰。
 
至於小霖..我都冇特別再去諗。
 
直至有一日，我終於出街，再次踏足機場。
 


「喂，死人頭！！」經過差不多一小時嘅等待，終於等到佢出黎，我嘅靈丹妙藥。
 
「冇名你嗌咩，叫我死人頭叫得咁大聲。」我真係俾佢搞到哭笑不得。
 
「嘩..小涼，你男朋友啊？」眼前幾位應該係佢啲同學，我淨係認得其中一個，因為佢都落過黎自修室好幾次。
 
「係啊，佢叫死人頭啊！」
 
「唔..唔好聽佢亂講，哈哈，我叫阿楓，你地好。」
 


「好啦，遲啲見啦！」佢同佢班friend講。
 
上星期我地都係喺同一個地點講同一樣嘢，咁快已經一個禮拜..
 
「點啊！有冇掛住我？」佢問我。
 
「梗係有啦~掛到死！」
 
「嘻嘻，好唔好玩啊台灣？」
 
「都唔錯啊，至少唔太想番香港。你果邊呢？」
 
「都好玩啊！我地喺日本食咗好多嘢，全部都好好食。」
 
「哦~唔怪得肥曬啦哈哈！」


 
「認真咩..？」
 
「講笑炸，仲好fit。」
 
「啊！又玩我 ！」
 
好耐冇試過呢種打打鬧鬧嘅感覺，真係好懷念，亦都係小涼先俾到呢種感覺我。
 
上到車之後，我將個背囊放喺對腳前面。
 
「咦，個鎖匙扣咁靚嘅？果到買架？」佢輕輕拎一拎個惡魔鎖匙扣。
 
「下..係啊，見幾靚咪買番黎。」
 


「我有冇手信先？」佢問。
 
「梗係有啦！我驚我冇炸。」
 
「嘻嘻，點會少咗你果份呢！」
 
話說我喺台灣買咗支狀元筆俾佢，當係祈求下佢可以有好成績。
 
佢玩咗陣電話都攰，所以就恰著咗。
 
佢好習慣咁挨咗落黎瞓，我地都一齊咗唔短時間，呢啲動作已經變得自然，但可能對小霖黎講係需要好大嘅勇氣。
 
我不禁又諗起小霖瞓喺我膊頭嘅時刻….唉屌！點解我又會諗起佢？我要記得自己嘅身份，唔可以再去諗第二個女仔。
 
冇錯，特別已經有個咁好嘅喺我隔離。


 
「到啦，巴渣妹，落車啦。」我嗌醒佢。
 
「嗯…咁快..」見到佢唔想醒果個樣真係好可愛。
 
「行啦！」我拖住佢行落下層拎行李。
 
「聽晚上黎食飯啊？」我問佢。
 
「好啊！」佢好爽快就應承咗。
 
到咗第二日佢好早就黎咗，而且今日仲要係禮拜日。
 
「Auntie，好耐冇見！」佢一黎到就同我阿媽打招呼。
 


諗番起佢第二次上黎同我阿媽對恃嘅畫面就好笑。
 
「啊，小涼啊，日本好玩嘛？」
 
「好玩啊！我拎咗啲手信比你同uncle啊！」
 
「咁有心啊？」死老嘢講，佢今日都放假。
 
「我地諗住而家去飲茶啊，一齊啊？」
 
「好啊好啊 ！」
 
去到茶樓，小涼好主動咁幫手洗曬啲餐具同斟埋茶比兩老。
 
「小涼幾乖啊可，好過個衰仔蹺埋雙手咩都唔做。」阿媽同老豆講。
 
「好耐冇食你啲餸啦AUNTIE，今晚都想再跟你學下嘢。」小涼講，氹得阿媽開心到。
 
「哈哈，一陣跟我去買餸，我教你買！」
 
「好啊好啊！」
 
呢餐茶..總算飲得杯落，小涼喺到，好似有番好多生氣咁。
 
「阿楓，你估下我買咗咩俾你？」佢買完餸我地翻咗屋企之後，我地坐咗喺床傾計。
 
「點估啊，有冇tips？」
 
「嗯...你需要嘅。」
 
「嗯..？估唔到啊開估啦。」
 
「係個御守啊，我特登幫你求架！」佢拎出黎，係個讀書御守。
 
「希望有咗個御守你可以入大學啦！」
 
「你已經係我嘅御守啦！」我喺後面攬住佢講。
 
「你講啲口花花嘅說話又叻咗！係咪喺台灣成日撩女仔？」
 
「痴線，邊敢啊，你咁多線眼。」我指果班友。
 
「咁又係，諒你都唔敢！」
 
「係啦，咁你送咩俾我？」
 
我喺櫃桶拎出黎，收埋喺後邊。
 
「即係呢..話我地唔係一對都冇人信啊！」我拎咗支狀元筆出黎。
 
「我都買咗樣嘢去祝福你考到好成績啊！」
 
「我地真係心有靈犀，我好鐘意啊！」佢講。
 
「咁我地就一齊拖住手咁考入大學啦~」
 
「一定要！」
 
隨住小涼同我屋企人愈來愈投契，我同佢嘅關係愈來愈鞏固，危機就愈趨接近。