我只不過喺自修室溫書，點知比我遇番佢。: <五十三>最平淡的聖誕

<七十九>
「喂？阿豪？」小霖收到阿豪電話。
 
我地同小涼而加喺商場間粥麵鋪食緊嘢。由於小涼都係唔太舒服，所以我地有共識，聖誕節都係留喺自修室溫書，費事出到去人又多，車又多，行都行得唔舒服。小霖亦都一齊溫。
 
「今晚出唔出黎...？」佢望一望我地，我地作狀係咁點頭。
 
「唔好啦..我都係想溫下書..倒數先啦。嗯，好啦，拜拜。」之後佢就收咗線。
 
「點解唔應承佢啊？」小涼問。


 
「因為..尋日都冇乜點溫書啦，再溫下好過啦，橫點出面咁多人。」佢望一望我，示意我唔好爆響口，之後答。
 
「咁又係啊，出面啲空氣咁差，都唔太舒服。」
 
我地翻去溫書，今日溫BAFS，因為我地三個都有讀，而唯獨呢科我係比佢地好，所以我突然變咗小老師咁。
 
「阿楓，點解呢題個gross profit少咗嘅？」小涼問。
 
「因為..你計少咗咗purchases，個銷貨成本應該會變多咗...」我一路解釋，一路都自己喺到吸收緊。


 
「Yes！又做好一條！」我講。其實做acct數如果做得啱嘅話會好有滿足感，加上又易執分，所以我幾鐘意讀呢科。
 
「係咪咁勁啊？」小霖問。
 
「洗乜講！」
 
突然有人搭一搭我膊頭，我本能反應下即刻捉住佢隻手再反手屈住佢。
 
「喂..喂..喂，放手，係我！！」原來係阿豪。


 
「屌你咩，明知我最憎人搭住我。」抵佢死啦。
 
「你過黎做咩？」我問。
 
「我..過黎溫書囉，唔得咩？」扮啦你，司馬昭之心，路人皆知！
 
其實我隱約見到小霖有啲唔太耐煩嘅表情，但係好快就扮到冇嘢。
 
唔知點解，自從阿豪黎咗之後，啲氣氛就變到怪怪地咁。
 
小霖又再將自己封閉起黎，但係懵懂嘅阿豪又冇察覺呢點，久唔久就撩下小霖講嘢。
 
我同小涼都唔太理佢地，我地有我地溫，你當係自得其樂也。
 


「小霖，你睇下呢條片，好好笑架！」阿豪講。
 
「不如專心溫書啦你！」小霖講。
 
「唔係呢，你睇下先啦，真係好好笑架...」
 
「夠啦！」小霖突然大嗌一聲，我地都呆咗咁望住佢。
 
「唔..唔好意思，我番去先。」講完之後，小霖就執嘢走咗。
 
佢走咗之後，我都忍唔住話下阿豪。
 
「你睇唔到佢已經有啲唔耐煩啦咩，係咪衰呢你！」
 
「我諗住今日聖誕節..輕鬆少少都唔怕啦..」


 
「咁你都識睇下人地眉頭眼額啊？佢黑曬面啦頭先。」
 
「唔好理佢住啦..溫下書先啦好冇？」小涼一路掃我背脊一邊講。
 
去到夜晚，阿豪就走咗，小霖唔喺到都搞到佢冇咩癮咁。
 
我開一開ig睇，見到阿言、阿靜都分別喺到放緊閃。
 
「你睇下佢地，幾sweet！估唔到我地第一個聖誕節會咁過啊可。」我講。
 
「嗯，雖然平平淡淡，但係我都幾開心。」
 
今個聖誕，我地冇去食大餐，冇去睇燈飾，佢冇要求我送任何嘢俾佢，我都冇收到佢任何禮物，平淡都有我地平淡嘅快樂。
 


「下年再陪你周圍去咁玩下啦！」我講。
 
「好啦..但係你洗唔洗去睇下小霖啊？佢一個人應該好悶..」
 
「咁你呢？唔一齊？」
 
「我唔啦，佢應該有好多嘢想同你講，我費事喺到啦。」佢應該係指阿豪嘅嘢，佢又真係好醒，睇得出有嘢，只係唔知我已經知道曬咩事。
 
「咁好啦..我送你番去先啦咁。」
 
送咗小涼之後，我就打俾小霖，叫佢落黎公園。
 
「咁夜仲叫我落黎？」佢問。
 
「睇下你有冇嘢啊嘛。」我一邊打韆鞦，一邊講。


 
「仲記唔記得個繩網啊？」佢問。
 
「嗯..記得！」我停咗落黎，然後又去爬個繩網。
 
「細個差錯腳跌咗落黎，但係反而搞到你驚到喊，我就喊都冇喊過。」我講。
 
「咁我未見過咁多血啊嘛，點知你會唔會死。」說罷佢都跟住爬埋上黎。
 
「我咁好動，邊有咁易死啊。」
 
「咁你即係有冇嘢姐？」我地坐咗喺繩頂傾計。
 
「我都唔知點解會發咁大脾氣架，可能我係借啲意俾自己走開啦。」
 
「見住佢想盡辦法咁哄我開心，果一刻我真係好想同佢講清楚，但係我又承擔唔起個後果，我突然間好自責咁，所以就忍唔住失咗控。」
 
「你又唔洗自責嘅，人與人夾唔夾唔係單方面問題，你冇做錯。」
 
「我真係忍受唔到自己再咁樣拖住佢啊，咁樣會搞到我好憎自己。」
 
「忍多幾個月啦，好快過架炸。」
 
「啦，一係咁，每當你又諗起呢樣嘢，你就大唱紅日啦！我以前都係咁黎令自己忘記啲煩惱。」我當然只係吹。
 
「得唔得架！」
 
「你唔信啊？試下啦！命運就算顛沛流離...」我開始好大聲咁唱。
 
「喂！傻架咩，夜啦！」佢雖然喝住我，但係都算見佢笑番。
 
「啦，笑番咪好囉，聖誕節應該開開心心加麻。」
 
「唉，早知果陣跌鬼死你算。」
 
「係啊..可！」我扮推一推佢，佢差啲失平衡。
 
「妖。死啦你！」
 
呢個世界好奇怪，你越去逃避一啲嘢，佢就會自己搵上門，好似係暗示你唔好再去逃避佢。