我只不過喺自修室溫書，點知比我遇番佢。: <五十四>除夕

 
聖誕完咗之後幾日就到除夕，年年我地都成班兄弟過，邊估到今年會各自都有個伴同我一地一齊過？
 
我地一行八人，九點半就去咗尖東平台果到霸位，我地坐咗喺到一邊食爭鮮，一邊喺到吹水。
 
「阿星真係唔黎架？」我問。
 
「點知佢姐？神神秘秘咁，唔理佢啦。」阿豪答。
 
「仲有成三個鐘，搵啲嘢玩下啦！」佢講。


 
「早有準備啦！我地玩國王遊戲啦！！」阿月拎副啤牌出黎。
 
國王遊戲即係每人派一隻牌，抽到K果個可以命令其他人做任何事。前提係除咗國王之外，其他人都唔可以show自己隻牌出黎。
 
「我抽到K  ！」阿靜大嗌。
 
「我要..3號同6號跳忘情森巴舞！」
 
「oh shit！」我同阿言講，我同佢抽中3仔同6仔。


 
「一起森巴舞 潑走不滿..」就係咁，我地就喺眾目睽睽之下跟住youtube個MV喺到跳，說真的..都真係幾醜。
 
「哈哈哈！」佢地都喺到笑我地。
 
下一輪，我地又重新抽過。今次係阿豪抽中K。
 
「我要...4號摑2號3巴！」
 
「唔乸係啊？又係我！？」我講，有冇咁黑仔啊？


 
「下次睇牌唔好揭咁高啦，嘻嘻嘻。」頂，原來俾佢睇到我隻牌..
 
「邊個2號..」我問。
 
小涼緩緩舉起手..
 
「睇住啊，小涼大人！」
 
「嘻嘻，睇下點！」
 
「呃！呃！呃！」
 
「你呃咩姐？我都未打。」係喎..我呃啲咩？
 


我雙眼緊閉，等待住殘酷嘅懲罰。
 
「啪啪啪啪啪！」下？打完啦？
 
「傻佬，邊捨得打你啊！」
 
「唉呀，好曬啊！」佢地大嗌。
 
哈哈，你地羨慕唔黎架啦！
 
都唔知點解玩埋啲無聊遊戲都可以hea幾個鐘。後來先知原來唔係因為個遊戲好玩，而係睇下同邊個玩。
 
「仲有5分鐘炸！」阿晴講。
 
我地行前少少，個位睇煙花fit曬，不枉我地用幾個鐘去排。


 
「好緊張添！」阿豪講，嗯？！
 
我同小涼一直拖實對方隻手，唔敢放開，費事會被人群隔開。
 
「我都係第一次出黎倒數炸..」佢講。
 
「真係架？」
 
「係啊，以前爹哋話太多人會危險，但係而家有你喺到..唔會危險啦，嘻嘻。」
 
「有咩事我就先架啦，唔理你架啦！」我開玩笑講。
 
「你試下！」佢另一隻手谷實個拳頭隊上黎。
 


「你咁強，你保護我炸掛，哈哈！」
 
「你..」佢未講完，啲人就開始倒數，所以我地咩都唔理就跟住一齊數。
 
「5..4..3..2..1..！Happy New Year！」
 
「新年快樂巴渣妹！！」我大嗌！
 
「新年快樂死人頭！！」佢和應。
 
「洗唔洗咁激啊你兩個..」阿靜都忍唔住挪揄我地兩個。
 
「嘻嘻！」
 
「小霖，我..」阿豪嗌住小霖。


 
「喂你地去唔去埋食糖水？」小霖突然問我地。
 
「好啊好啊！而加落深水埗食！」阿晴講。
 
之後我地就隨住人潮不斷咁行，慢慢行落地鐵站，小霖仲借啲意同埋小涼一齊行。
 
「喂，阿楓，頭先阿豪好似想表白咁。」阿月講。
 
「下，係咩？」我詐傻。
 
「幫唔幫佢製造下機會好？」
 
「嗯..順其自然啦，機會都係自己爭取好啲，哈哈..」你唔好逼我埋牆啦月哥..
 
「咁又係..」感謝你月哥！
 
我地排除萬難終於落到去地鐵站，又經過一輪擠逼先上到車。
 
「欸，小心！」阿豪見到小霖就跌，即刻出手扶住佢。
 
「唔..唔..該。」
 
然後成程車我地全部人都有講有笑，除咗阿豪，佢一直處於一種蠢蠢欲動嘅狀態，望到我都急埋一份，雖然我就真係唔多想佢真係表白。
 
「楊枝甘露啊唔該！」論甜品，我只會食呢隻，永遠唔變！
 
「阿豪你呢？阿豪、阿豪！」我叫佢，佢好似失曬魂咁。
 
「做咩啊你？眼瞓啊？」阿言問佢。
 
「下..係啊，尋晚夜瞓咗，哈哈。」其實佢嘅目光一直冇離開小霖，相反地，小霖眼神一直迴避阿豪，不斷同我地傾計。
 
我都真係有啲戥我呢個兄弟肉赤，但係唔通我捉佢出去，同佢講我乜Q都知道曬，叫佢放棄小霖咩？
 
我覺得如果我遲一年出世，我考DSE作文一定5**，因為題目就係..必要的沉默。
 
最後唔知點解，由我地食完糖水到散band果一刻，阿豪始終冇再同小霖表白，佢只係最後自己一個默默咁搭到去調景嶺。
 
【多久了 我都沒變
愛妳這回事 整整六年
妳最好 做好準備
我沒有打算 停止一切

想說我沒有志願
也沒有事情好消遣
有一個人能去愛 多珍貴

沒關係妳也不用給我機會
反正我還有一生可以浪費
我就是剩這麼一點點倔 稱得上 我的優點

沒關係妳也不用對我慚愧
也許我根本喜歡被妳浪費
隨便妳今天拼命愛上誰 我都會 坦然面對
即使要我跟妳再耗個十年 無所謂】