我只不過喺自修室溫書，點知比我遇番佢。: <五十二>不一樣的平安夜

「誰和我熱吻 年年沒佳音 極有可能 出年佳節還是要等」
 
上年仲聽住呢首頹歌打機嘅我，今年終於唔洗咁毒留喺屋企。自從天蕊之後，今年係我重新再過嘅一個平安夜。
 
一到傍晚，小涼就打黎，可能又叫我快啲。
 
「喂，唔洗催我啦，就到就到。」我講。
 
「喂....阿楓啊？我個肚好痛..」
 


「你冇事啊嘛？喂..喂？」
 
「唔..唔..唔知啊...我諗我出唔到去架啦..」
 
「喂..喂..阿楓？」我冇應佢，應該係話我唔得閒應佢。
 
我而加正全速跑去佢屋企，出唔出到去有幾閒，最緊要佢冇事。
 
「叮噹、叮噹」
 


「阿楓...」小涼開門之後，面色慘白，口唇都白曬。
 
「你點啊？冇事啊嘛？」
 
「我唔知啊..淨係覺得好肚痛..」
 
「洗唔洗同你去睇下醫生啊？」
 
「唔..唔洗...」
 


「我扶你入房先啦。」
 
「有冇食啲嘢啊你？你屋企人呢？」入到房之後我問佢。
 
「冇啊，佢地出咗去食大餐。」
 
「我去煮啲粥你食啦，你喺到抖陣。」
 
瑤柱瘦肉粥我就唔識整架啦，白粥我都識嘅，於是我盲煲咗啲白粥俾佢食。
 
「食得啦！」我入房叫佢，不過我見佢病到咁，所以我就拎埋入去餵佢。
 
「睇熱啊..」我講。
 
「估唔到你都識煲粥喎。」


 
「唔係你估，收唔收貨先？」
 
「收..好好食。」白粥你都話好食，你都幾易滿足。
 
我一啖一啖咁餵佢，好彩佢都食得曬，暫時冇再翻痛住。
 
「食埋幾粒藥抖陣啦。」我拎咗幾粒喇叭丸俾佢。
 
之後我再幫佢整好個枕頭同被鋪，俾佢再瞓下。
 
「對唔住啊..平安夜都搞到你咁掃興..」佢瞓喺到講。
 
「唔緊要啦，我志在同你一齊之麻，我地而加都係一齊，去邊有咩所謂？瞓啦。」我摸一摸佢個頭。
 


望住佢瞓教個樣，冇咗平時好強悍嘅感覺，佢底子裏都係個好需要人保護嘅女仔，只係平時裝框住自己。
 
可能佢平時要承受嘅嘢太多，又唔想旁人為佢擔心，所以先自己頂曬。直至自己病咗都仍然顧慮住我嘅感受。
 
我諗我都係個唔合格嘅男朋友，唔識同佢分擔佢嘅煩惱，佢嘅壓力。
 
我忍唔住，上前輕輕錫咗佢一啖，然後講咗句：「對唔住..」
 
之後我出咗去睇電視，好彩今日係平日，夜晚都係有啲大台劇睇下。
 
睇到咁上下時間，我聽到開燈嘅聲音，向後望一望，原來係小涼去廁所。
 
隔咗一陣，佢先出番黎。
 
「點啊，又肚痛啊？」我問佢。


 
「嗯..但係而家舒服好多啦..」講完之後，佢行過黎，用手潑兩潑，示意我俾啲位佢坐。
 
佢坐落黎之後就挨咗埋黎。
 
「睇緊咩啊？」
 
「百分百感覺2啊，喺你個電視櫃摷嘅。」
 
「我好鐘意睇呢套啊！又有Eason、Joey、陳曉東！」佢一提起啲佢鐘意嘅嘢就好興奮。
 
「Eason最後都係揀咗千嬅。人總係要兜兜轉轉先搵到佢最鐘意嘅人。」
 
「咁你呢？你轉完未？」佢突然問。
 


「未啊！」
 
「嗯？」佢望上黎。
 
「望親你都暈到氹氹轉啦。」
 
「又亂講嘢！」
 
「仲有20秒就25號啦..我地倒數啦。」佢講。
 
「10..9..8..7..6..5..4..3..2..1..Merry Christmas!!」冇好喧鬧嘅歡呼聲，只有一句默默嘅聖誕快樂，但係仲有意義！因為眼前果個係自己最愛嘅人。
 
呢個平安夜..同我想像嘅落差好大，但係我冇因為咁而唔開心，仲覺得好特別。原來唔洗特登去做啲咩去充實個節日，只要可以同自己鐘意嘅人一齊就已經好足夠。