我只不過喺自修室溫書，點知比我遇番佢。: <五十一>悵惘
聖誕假開始，我就可以出盡全力去溫書。如果冇咩必要，我都唔會點出街。
我地嘅四人小組仍然運作緊，雖然唔係日日都齊人，但係好彩有佢地先令我有動力每日都去自修室溫書。
溫咗咁耐，我都覺得自己好幾科都有啲進步。我以前成日覺得操番以前啲卷好無謂，佢又唔會照出番。
但係原來做番啲舊卷先可以知道自己有咩範疇唔識或者唔熟，每一份卷都有佢嘅價值喺到。
好似而加咁..
「我地今次試下做數學long question，又係睇下邊個啱得多啲啊！」阿豪講。我諗佢原本黎都只係志在陪下小霖，但係隨住考試日子愈來愈近，佢都開始努力。
「好！我實唔會輸比你條死肥仔！」
於是呢兩個鐘頭裏面，我地就不斷做做做，務求可以做啱曬所有識嘅題目。
「我地交換對啊。」小霖有咁嘅建議。
「都好啊！」阿豪附和，佢講咩你都好架啦。
至於佢兩個..小霖都會理下佢嘅，不過都保持番適當嘅距離。佢又唔算收阿豪做兵，但係又一直拖住佢地嘅關係，不過佢話都算係為咗阿豪，所以我都冇太大嘅干預。
「嘩，小霖你好勁啊！Part B咁難你都啱咁多。」小涼講。
「操多啲，明佢嘅theory就得架啦。」佢一路對一路講。
「小涼你都唔差啊，part B你都啱好多。」阿豪對完之後講。
「哼，我睇下你個肥仔有冇大意嘢錯，一有我就交叉你。」我好細心咁check阿豪份嘢，費事改錯豪送啲分俾佢。
「你改極都係低分過我架啦。」佢好自豪咁講。
當我改好之後，小霖仲改緊我果份，我地都等咗一陣佢先改好。
我地拎番自己份卷之後公佈番自己個分。
今次最高分係小涼，99分入面拎咗85分，佢話衰咗喺後面果part。
小霖都係低佢幾分，有82分，佢喺前面表現差咗啲。
我有70分，其實都仲有啲失望。
最可惡嘅係..阿豪高我5分，75分。
「可惡啊，差少少！」我好唔忿氣，唔係因為低分過阿豪，而係努力咗咁耐都係得70分。
「嘩，寫得咁清楚啊。」我同小霖講。
「咁你錯就要你明番架啦！」咁又係..
「等我慢慢消化下先..」
「再唔明先問我啦。」
我地各自睇番自己錯咗啲咩，我發覺小霖真係改得好仔細，將我錯嘅嘢寫番曬Steps，仲寫好曬步驟咁。
無可否認喺我征戰數學嘅過程中，佢真係我一盞苦海明燈。可惜我自己又唔爭氣..
「好肚餓啊..」阿豪講。
「不如去食嘢啦！」小涼提議。
「咁去食乜啊？」阿豪又問。
「魚蛋河啦。」//「我想食魚蛋河。」我同小霖幾乎同一時間講出黎。
「噗哧！」我地都相視而笑。
「噢..咁就魚蛋河啦。」阿豪講。
去到河粉檔，老闆娘見到我地就同我地打招呼。
「阿楓、小霖，又黎食啊你地？」
「係啊，好食啊嘛。」小霖講。
「咦，呢個一定係阿楓嘅女朋友呢，幾靚女喎，阿楓你真係有眼光。」
「係啊，佢叫小涼啊。」我介紹，小涼對住老闆娘笑一笑。
「咁呢位一定係小霖男朋友啦。」佢望住阿豪。
「唔係啊，同學黎炸。」小霖即刻澄清。
「噢係啊？咁你地食咩啊？」
「雙併魚蛋魚皮多蔥多蒜！」小霖講。
「哈哈..2個。」我補充。
「我要個牛腩河多腩汁。」阿豪講。
「我要個魚皮餃河，唔該姨姨。」小涼講。
「好好好，即到！」
「你地成日黎食架？」阿豪問。
「以前囉，而家少啲。」我答。
「黎黎黎，四枝可樂私人醒嘅！」老闆娘拎住幾枝可樂黎，話係送嘅。
「老闆娘啊，3枝得啦，阿楓啱啱好番唔飲得凍嘢。」小涼講。
「下..咁我飲咩啊..」
「飲水囉。」
「係係係，小涼大人。」
「呢到啲魚皮真係要試下，又香又脆，阿楓以前成日食到成褲碎。」小霖講。
「邊有啊，係你食到成裙碎炸，有次仲整到鼻入面都有！」
「你一陣問下老闆娘啦，仲有上次魚露件事都未搞清楚！」
「問囉，怕你啊！」
「問我咩啊？」老闆娘拎住兩兜麵黎。
「小霖係都要同我拗，明明上次係佢fing到我隻手我先整跌支魚露。」
「哈哈哈，果件事啊？果陣你地都仲咁細個，邊記得咁清楚。」
「係阿楓你啊，唔知咩事fing開小霖隻手，點之fing跌埋枝魚露啊！」
「啦，都話架啦！」
「哈哈，係咩？」
「哈哈哈，廢子楓好鬼死百厭。」阿豪講。
我地同老闆娘傾番好多細個果陣啲嘢，阿豪一路聽一路喺到笑我。
食完之後我地就番番自修室溫書。
「走啦好冇啊，11點啦就黎。」溫到咁上下小涼就話好攰，所以我就送佢番去。
「你自己番去得唔得啊？」我問小霖，果陣阿豪都走咗。
「得啦，你地走先啦。」
沿路番去，佢都好似悶悶不樂咁。
「呃，估唔到我細個真係咁百厭。」我地行緊果陣，突然諗番起細個，所以講。
「係囉，哈哈。」
「果到啲魚蛋粉真係好好食！」
「原來你鐘意食蔥同蒜架？」佢問。
「係啊，香啊嘛。落落啲河粉到一流啊。」
「哦..」
「做咩啊？你真係好攰咁？」我問佢。
「下..係啊，溫咗成日又啲頭暈暈咁。」佢有啲失魂咁好似。
「下？冇事啊嘛，果到啲冷氣太大啊？」我問佢。
「唔知呢，可能啦！」
「番去食粒藥，早啲瞓啦。」
「嗯..」
我番到去同老豆阿媽講番頭先啲嘢，佢地都笑到見牙唔見眼。
「呃..我都好耐冇去過，搵日去食下先！」佢講。
臨瞓之前諗住打俾小涼睇下佢有冇嘢，點知冇人聽，可能已經瞓咗。
唔知佢做咩呢，好似怪怪地咁。