我只不過喺自修室溫書，點知比我遇番佢。: <五十>聖誕聯歡會

「各位，過埋今日就正式放聖誕假，今日盡情咁玩啦！」阿王講。
 
終於等到今日嘅聖誕聯歡會，係我地中六學生最期待嘅日子，因為完咗Party之後，學校會有個慰勞宴俾老師，啲老師趕曬啲低Form走之後就會去食飯，換言之，學校將會有個真空期俾我地Form6。
 
「毛筆..一支」而家我地就喺到玩緊辣辣壽司。你地成日話獎門人個節目好無聊。但無可否認，諗親團體game都係會玩番獎門人。
 
「天空…」呵呵！阿言對唔上個配詞，所以要罰。
 
「罰咩好呢….嘻嘻。」最多鬼主意嘅阿星講。
 


「去隔離班向阿晴示愛！」
 
「Wowwwww！」我地就最鐘意睇呢啲架啦。
 
只見阿言有啲難為情，不過天不怕地不怕嘅佢好爽快咁接受懲罰。
 
佢走到去隔離班，我地成班都跟住佢趁虛！
 
「唔好意思！」佢敲一敲隔離班個門。
 


阿晴一見到佢入黎都嚇咗一嚇。
 
「鍾海晴我愛你！」阿言大嗌，就好似果日籃球比賽咁大嗌。
 
「耶！！」我地拍曬手叫囂。
 
阿晴好尷尬咁笑，不過成場氣氛都好熾熱。
 
之後我地都玩咗好多唔同嘅遊戲，紀錄唔同嘅歡笑同回憶。呢個係我地最年少輕狂嘅日子，最無怨無悔嘅日子。



「好啦，聖誕後見啦 ！」阿王講，之後佢就走咗。
 
而家先係真正嘅開始啊！
 
「兄弟們，盡情搗亂啦！」阿月發號施令，成班都癲曬咁樣。
 
我地去盡所有平時冇得入嘅禁區、高樓影相留念，有啲又要試下去鋤樽，總之就要做盡學校平時唔俾做嘅嘢。
 
「入黎啦，唔怕架！」我喺門口接小涼，佢學校早兩日已經放假，所以佢得閒過黎。
 
「得唔得架..唔得我喺星矢吧等你啦。」
 
「得啦，無王管架啦而加！」我拉佢入黎咁滯。
 
「好啦好啦..」


 
我帶佢上咗班房，成班人又喺到起哄。
 
「小涼！」阿晴同阿靜，仲有小霖一見到佢就嗌住佢。
 
「你點解過咗黎嘅？」阿靜問。
 
「個死人頭話帶我睇黎下喎，我見冇咩嘢做咪黎參觀下。」
 
「唔好講咁多啦，我地去影相啦！」阿晴拉走咗佢。
 
蛤？！我帶佢黎係想兩個拍下拖，你咁樣叫我情何以堪。
 
算，既然有人做佢導遊，我就同班兄弟繼續搗亂，橫掂我地啲女朋友喺一齊，佢地都冇嘢做。
 


「喂，蕭皓月！」等佢回過頭黎，我就一個粉刷掟埋去，佢完美咁食曬啲粉。
 
「嘩哈哈哈！」奸計得逞，我就爆笑。
 
「費子楓！」佢追住我要報牛。
 
就這樣追追趕趕，跑出了青春的節奏。
 
咁樣寫一寫，都覺得成篇文高級咗好多。
 
「一、二、三！」小霖揸住手機喺到數。唔知幾耐之後啲女仔就番咗黎。佢地同我地幾個男仔都一齊聚埋一齊自拍咗幾張相。我地成雙成對咁，個感覺都幾實在。中學時拍拖都唔算得咩，有幾對情侶聚埋一齊個感覺仲正。
 
「你就好啦，有咁多人陪你一齊玩。」呢一刻我同小涼坐咗喺天台傾計。
 
「你學校冇咩？」我問佢。


 
「我果間女校黎加麻，邊有男女孩咁好..況且多女仔就多是非架啦。」
 
「咁又係..咁今日咪俾你黎體驗下囉。」
 
「又就黎日落啦..原來你呢到睇日落咁正。」
 
「我都從來唔知..」我都未上過黎睇過。
 
「我地影張相啊！」今次到我講。
 
我地以夕陽做背景，影低咗幾張相，有餘暉嘅映照，都好似影得我地特別靚。
 
番到去我地又落番自修室溫書，玩完就當然要付出番時間啦，我好樂意咁做，因為有小涼嘅陪伴。
 


「你唔攰架？玩咗成日都仲有力溫書。」佢都好驚訝我嘅意志力。
 
「唔攰啊，有你喺到啊嘛。」
 
「攰就算啦，唔好死撐喎。」
 
「真係唔攰呢！」
 
最後我都係不敵睡神嘅召喚，瞓著咗。
 
「醒啦！喂，走啦！」好熟悉嘅畫面...
 
果日又係小涼喧樣嗌我起身，諗番起都好笑。
 
「做咩呆咗咁？」佢問。
 
「冇啊，我又諗番起當日你又係咁樣嗌我之麻。」
 
「係啊傻佬！成日都瞓教。」
 
「走啦！」我拖住佢，一齊走出去自修室，我地結緣嘅地方。