我只不過喺自修室溫書，點知比我遇番佢。: <四十九>病人
「阿言呢邊！」阿言好巧妙咁傳咗個波過黎俾我，我一個crossover，越過阿豪，上籃，又搞掂一球，哈哈。
呃，唔記得咗講，我地放學手痕，所以喺操場打咗陣波。自從Form 6之後就好少打，一黎讓咗俾啲低form，二黎有時又要補課。
「好啦，同學夠鐘啦！」當值老師開始趕我地離場。
「嘩,好耐冇咁爽！」阿豪講。
「考完之後有排你打啦！」阿星講。
考完試..？都冇咩人知考完試之後會點。計劃永遠同實際行動唔同。
「唉，攰啊走啦！」我話。
「你唔洗抹下汗啊？」阿言問我。
「唔撚洗啦，好快乾。」
喺巴士上面，我可能攰得制，所以好快瞓著咗。
「細佬，細佬！到站啦！」司機大佬嗌醒我。
「嗯？哦，唔該曬。」好彩總站落都行到番屋企。
十二月果然係陰風陣陣，一個大風吹過黎，搞到我都打咗個乞嗤。
番到屋企之後，我坐咗喺客廳睇電視，睇睇下瞓著咗。
「索..索..阿楓…嚇死我啦..」我模模糊糊間聽到呢種聲音，係發夢？我唔太知。
到我訓醒之後，我望一望周圍，點解會喺房嘅？
再睇下個鐘，4點半…下？我時光倒流啊？唔係喎，個天好黑喎。
唔理啦，瞓多陣就起身食飯。
當我再有番意識果陣，覺得周圍好光，我諗住起身睇下，發覺周身都勁痛，但係個額頭好似涼浸浸咁。
之後發覺有塊退熱貼喺到，下？我發燒？
「你醒啦..？」阿媽行入黎。
「你尋晚發高燒啊，雖然見你會郁下郁下，但係就叫極都唔醒咁。」
「咁突然？我記得我明明睇緊電視，之後就…」係喎，我都冇曬印象。
「食少少粥再食粒藥，然後再瞓多陣啦，我幫你請咗假架啦。」之後佢就出去舀粥。
「呃，你覆番個訊息比小涼啦，人地尋晚打曬鑼咁搵你。」oh shit！
我即刻拎起個電話睇，好多個未接來電同whatsapp。全部都係小涼嘅，最後一個就係小霖嘅。
可能因為之後小霖打過黎屋企掛。
「對唔住啊小涼大人，原來我發燒都唔知，琴晚瞓死咗咁制。」
好快就收到佢個回覆：「冇事啊嘛你？擔心死我啦！」
「好彩小霖有你屋企電話先聯絡到你炸！」
佢應該上堂偷用電話。
「頭好痛啊，諗住一陣再瞓多陣。我知今次我係冇交待咗啲嘅..」
「我知你冇心嘅，Auntie都話你一番黎就瞓著咗，之後就開始發燒..」
「咁你多啲休息啦，我要上堂啦。」
之後阿媽就舀咗一碗粥黎。
「咁好食嘅啲粥？你煲架？」我問阿媽，平時佢靜係會煲白粥，今次竟然係瑤柱瘦肉粥。
「衰仔啊，即係話阿媽平時煲嘅唔好食啦。」
「咁又唔係…」
「啲粥係小涼拎上黎架。個傻女一聽到你瞓極都唔醒就喊曬口咁衝咗上黎，睇咗你好耐先走啊。」
「之後今朝番學之前就拎咗呢煲嘢上黎，真係好足料，佢應該天都未光就起身煲啦。」個傻妹真係..
當你知道個世界除咗你老豆老母之外仲有人會咁關心你，果種感覺真係…我都唔知點表達，總之就好撚感動。
「都唔知你個衰仔做咗咩好事，竟然有人咁樣對你。你執到啦。」佢無啦啦打我膊頭喺到嘲諷我。
「嘩..痛啊，尋日呢個位食波餅。」尋日唔小心俾阿豪一個波打中，只係當時唔想停，所以冇同人講。
「原來你個衰仔尋日打完波啊？唔怪得啦，肯定冇抹走啲汗就上巴士！」
「唉，得啦，下次唔會。」
食完之後，我就whatsapp多個訊息俾佢：「巴渣妹，多謝你煲啲粥，好好食！不過下次唔好再咁傻啦。」
食完藥之後，隔咗一陣可能藥效發作，又覺得好暈，又覺得熱，所以除咗件T裇，著番件背心就再瞓下。
「….黎咗啊？過黎坐啦。」
喺半夢半醒之間，我好似隱約聽到有人喺到講嘢，濛濛瀧瀧當中感受到一種感覺，一種..好熟悉又好舒服嘅感覺。
「抹咗汗就唔好再走黎走去啦。」
.
.
.
我突然成個人chok一chok，就扎醒咗，一打開眼就見到…
「咦，點解你上咗黎嘅？」
「睇下你好番啲未啊。」係小涼大人。
「嗯..仲係成個人好攰囉，可能退咗燒掛…」
正當我想撕咗個退熱貼果陣，先發覺原來已經換咗做熱毛巾。
「話時話你唔攰咩？今朝咁早起身。」我問佢。
「唔攰啊,見到你冇事就精神曬，哈哈。」
「傻妹，下次唔好咁傻啦，瞓多陣好過啦，阿媽都會煲下粥俾我。」
「為咗你呢啲唔算得係咩啦。」
「你知唔知啊，尋日諗住問你點解咁耐都未落自修室，又搵極都搵唔到你喎，所以就問下小霖囉，好彩佢有你屋企電話炸！我問佢攞咗之後即刻打上黎先知你病咗。」
「Auntie講到好恐怖，又話你冇曬知覺，間唔中先郁兩下，我望到你咁辛苦個樣都忍唔住喊。」
「我覺得自己好冇用，你病咗我又做唔到啲咩照顧你！可能淨係可以煲下粥咁。」
「傻妹，白痴妹。」我摸一摸佢個頭。
「我知你緊張我就夠啦。」
「白痴仔！死人頭！下次小心啲啦，你仲有個長仗要打架！」
「嗯！」
坐咗一陣佢就走咗，我都費時阻佢太多時間，佢都要溫書。
等到第二日覺得好番少少之後，我都開始溫下書，唔想因為病而有所懶怠。
小霖、阿言果班都好好，每日都輪流打黎或者whatsapp我問我好啲未，同埋講番比我知翻學做過乜，操過咩卷。
再隔多一兩日左右已經可以番番學，困咗喺屋企咁耐都有啲掛住班友。
「喲，廢紙楓番黎啦喎，仲未死咩？」阿豪一早就用呢句「歡迎」我。
「托你豪爺鴻福，未死得住。」頂你，好講唔講咒我死。
我番埋位，小霖就喺我後面問我：「好啲啦？」
「算好啲啦，起碼有番啲精神。」
「聽auntie講你係攝親先病喎，好心你熱就唔好入冷氣地方。」
「果陣邊有諗咁多，哈哈。」
「咁你身體弱仲著背心，冬天黎架。」
「仲有發燒用番熱毛巾啦，退熱貼好垃圾。」
「你又知我用退熱貼？」
「下..err…個個病都貪方便用退熱貼架啦！」
「咁又係..」
「喂！費子楓..」阿星突然標飆出黎。
「啪！」
「呃….」小霖冇啦啦大嗌。
成個班房頓時靜咗一靜…..
「喂，你冇嘢啊？」我問小霖。
「冇..冇嘢。」紅曬都話冇嘢..
「傻咗咩你，咁大力！」我鬧阿星。
「大佬我諗住嗌下你，點知佢冇啦啦伸隻手出黎..Sorry小霖！」
「我見佢膊頭有啲污糟嘢先諗住幫佢整走佢啊嘛。」
「嗯..有啲咩污糟？」我問佢。
「冇嘢啦冇嘢啦，整走咗啦。」
嗯..？好似怪怪地咁？
番到屋企之後，阿媽就問我：「衰仔冇嘢啊？有冇好啲？」
「好啲啦，除咗有啲攰就冇咩事。」
「呃..衰仔，你拎番條手繩俾小霖啊，佢上次漏低。」
「手繩？上次？幾時啊？」
「先兩日之麻！佢黎探你，你又喺到瞓，所以冇嘈醒你啊。」
下？原來佢真係黎過？
所以佢知道我著背心瞓覺？
知道我用退熱貼？
知道我膊頭整傷咗？
熱毛巾係佢幫我換？
.
.
.
「喂，你條手繩啊。」我同小霖講，我地喺自修室臨走之前俾番佢。
「啊！原來喺你到！等我仲係咁搵。」
「你..隻手冇嘢啊嘛？」佢帶番條手繩果陣，我又見到佢紅紅地嘅手。
「冇事啊。」
「你知我膊頭瘀咗先幫我擋嘅..」
「係嘅…費事你俾佢地整到個傷患啦。」
「你仲幫我換咗條熱毛巾同抹咗啲汗？」
「退熱貼真係好垃圾加麻，同埋翳住成身汗會好唔舒服。」
「唔..該曬。」又有種我唔係好識講嘅感覺。
「唔洗客氣啦，走啦！」
個人一靜落黎，就好容易又亂諗嘢，我突然腦海又閃過一個念頭，一個我唔希望佢會發生嘅念頭，我好努力遏止呢個想法，只係出於青梅竹馬嘅關心姐，一定係咁。