我只不過喺自修室溫書，點知比我遇番佢。: <四十八>迫不得
第二日，繼續我嘅溫書生活。
「小涼，教一教我呢題數！」溫數亦都成為我每日嘅指定動作，無論幾忙都會溫下數。
「睇下先....」
「哦！5P3 x 6P4 囉！」你係睇完架啦？我都未消化到佢問咩你就計到？
「好勁啊你！」但係又真係俾佢計啱。
「唉，人地女朋友啲數仲勁過男朋友..」阿豪又喺到講。今日又係4人小組形式溫，其實成日都係咁。
「收聲啦你，不恥下問你識條春咩，算啦，你面皮薄唔了解。」
「阿楓係數學弱咗啲姐，其他都係靠佢幫我炸。」
「聽到未啊！」
「聽到聽到，我唔夠你兩個拗，我繼續溫啊下。」
「小涼！我又唔識呢題！」究竟邊條hihi發明probi呢樣嘢。
「&&%$#&^%$@#...呢條複雜少少，我寫俾你睇下啦。」
「又啱，你真係好勁。」
「嘻嘻，濕濕碎啦！」
「小霖，你餓唔餓啊？」溫到咁上下阿豪問。
「唔太餓啊。」
「我同阿楓去買啲嘢食，買埋你果份？」喂，我幾時話去啊！
「嗯..好啊。買杯栗米唔該。」
阿豪一手扯起我，我用個好唔情願嘅眼神望住佢，佢竟然睥番我。就係咁我俾佢無情地帶走。
「喂，我唔餓啊，做乜姐？」出到去我就罵爆佢。
「仲問，你唔覺得小霖有啲唔妥咩？」
「邊有啊..」
「佢成日都冇講過嘢喎，嗌下佢先答一句。」
「人地想專心溫書姐，你估你咩。」雖然我咁講，但係俾佢講講下都覺得怪，就算平時寡言嘅佢都冇寡到咁。
「唔係呢，佢可能真係有啲嘢！」
「你想知你咪自己問佢。」
「唔太好嘅，好似好多事咁，不如你幫我問啊？」
「我溝埋佢好冇？我問就唔多事嘅。」
「2個魚柳包餐殺唔殺？」妖，明知我成世人最憎人用食物大尻我。
「殺殺殺，gogogo！」抵抗食物會遭天繾啊。
「唉，佢果日話佢冇鐘意人，睇黎我要再加油啊。」
「或..或者佢唔想喺咁多人面前講姐，唔洗諗得太灰嘅。」
番去之後，我留意到小霖，真係好似唔多妥，成日都神不守舍咁。
「阿楓，到你教我啦..」
「阿楓、阿楓！」我回過神，原來小涼嗌我。
死啦，佢會唔會罵我係咁望住小霖..
「下..下..做咩？」
「你又喺到發白日夢啊？」呼..好彩。
「係..係啊..溫得攰啊嘛。」
「咁俾條數你計下清醒下啦。」
我接過黎睇，係D econ數黎，我拿手好戲。
今次終於到我三兩下手勢就計好，仲唔威番次俾阿豪睇？
「啦,阿豪，阿楓真係有教我架，你唔準再笑佢啊！」小涼同阿豪講。
媽呀，我真係好感動，真係想頒個香港好女友獎俾佢。
「唔好意思，我地閂門啦！」會所職員講。
阿豪已經晨早走咗，小涼老豆都黎接佢走。
「Uncle！」面對佢老豆，我仍然唔敢鬆懈。
「嗯~阿楓你好。」佢竟然咁nice！
「走啦，聽日見啦。」小涼講。
因為我應承阿豪關心下小霖，所以就送咗小霖番去。
「點啊？好攰啊？」我問佢，用黎開個頭先。
「下..唔係啊。」佢答。
「但係你成日都神不守舍咁嘅？」
「有咩？」
「冇咩？」我反問。
「觀察力好咗喎。」
「咁咩事？」
「我發覺..我始終同阿豪一齊果陣始終冇果種感覺..」
「點會啊..我明明見你同佢都行得好埋架。」
「咁只係我嘗試去投入。」
「冇錯，同佢相處呢段日子，佢真係個好好嘅男仔，咩都好為我著想，咩都幫我諗定。」
「但係可能我比較獨立，唔係太鐘意俾人為自己安排曬一切。」
「咁你同佢講下咪得囉。」
「講唔講都唔重要啦，最重要係我始終對佢冇愛戀嘅感覺。」
我知道呢個時候再幫阿豪講任何好說話都冇用，於是問，
「咁你想點同佢講？」
「如果我係佢其中一個讀書動力，我會等考完dse先同佢講清楚，我唔想佢因為我有任何差池。」
唉，做咁多嘢到頭來都係徒勞無功，果然愛情係冇得逼嘅。
「果然愛情係冇得逼嘅。」屌,又口快快講咗心入面果句出黎。
「你明就好啦！幫我保守住呢樣嘢先啦。」Why always me!!
「好..咁祝你早日搵到你鐘意嘅對象啦。」
「一早搵到啦。」
吓..大佬呢個時候唔好玩啲咁嘅嘢啊
佢一步一步咁行埋黎，每行一步我就淆一淆..緊張到喉嚨都冇乜口水吞咁制。直至行到過黎我耳邊
.
.
.
「講笑炸傻佬！」呼，嚇得我啊。
「大佬啊，唔好搵啲咁嘅嘢黎玩啊，我心血少啊。」
「哈哈，證明你定力唔夠囉，等我話俾小涼聽先！」
「你要講嘅話首先殺咗我..」如果唔係我驚我死我仲慘。
「好啦..唔玩你啦，我上番去啦，早抖啦，聽日唔好遲到啊！」
「我好耐都冇遲啦！」
.
.
.
「咦，好耐冇見喎費同學！好掛住留堂室啊？」
我向住個垃圾訓導笑一笑就走咗。
頂！點解今朝個鬧鐘唔響架！
「呵呵，唔係有人話自己好耐冇遲到啦咩？」一番到去就受到小霖嘅恥笑。
「你烏鴉口囉，個鬧鐘又冇響！」
「怪我嚕。」
「不然呢？」
「好啦，番埋位啦各位！上次份小測卷出咗啦，出黎拎番啦！」阿王叫。
「費子楓！」嗌到我之後就出咗去。
「考得幾好，繼續努力。」
我番埋去睇一睇，46/60，又真係唔錯喎，有啲意外。今次竟然阿月揮得咗阿靜，同阿言一齊拎同分...仲要係滿分。
「好勁啊月月！拎埋滿分！」
「老虎發威啊！」之後佢喺到扮老虎叫。
估唔到一直重視形象嘅佢，同阿靜一齊之後改變咗咁多，變得唔再咁cool，肯放手自己身段，令人感覺close咗好多。
呢樣可算係阿靜嘅功勞。
「喂，阿楓！」阿豪小息果陣嗌我。
「係係係，點啊豪哥？」
「尋日叫你做嘅事做成點？」
「下..err…」
「err咩啊講啦。」
「佢冇嘢啊，原來佢前一晚失眠炸喎哈哈！」
「下，點解失眠啊？」wtf..我亂吹炸喎，你仲問乜尻？
「吓...可能果晚玩得太開心姐。」
「哦..咁都好啲。」
曾經我有諗過話俾佢聽事實，最後我冇咁做到。套一套戲嘅對白：「幻想係美麗，現實係殘酷。」
既然呢個幻想可以令佢有動力去考試，就等佢幻想多陣啦...