我只不過喺自修室溫書，點知比我遇番佢。: <四十七>派對
一個禮拜入面，我最鐘意禮拜六，咁我就可以溫足全日書。而家嘅我已經溫得有啲痴線，因為我慢慢愛上咗溫書，愛上咗留喺自修室。
「你又唔食嘢啊溫到？」小涼問我。今日我朝早9點就落咗去溫。
「哈哈，溫到唔記得咗添。」
「好彩我幫你買定三明治，快啲食啦，嘻。」真係貼心啊。
「小涼大人最好啊！」
「慢慢啦，小心濁親啊。」
「唔會..啦..咳咳咳咳。」
「係咪呢，話咗你架啦，成日都咁急。」點解次次濁親都佢見到..
「想快啲溫啊嘛..」
「阿楓..」
「你會唔會覺得好辛苦啊..」
「唔會啊，點解咁問？」
「我怕你因為要做到啲嘢比我爹哋睇而..」
「就算唔係因為你都要考好個試啦，冇嘢嘅。」
「係就好啦..」
「好啦，繼續啦，今晚仲要去阿晴個party架。」
「係喎，嘻嘻，加油加油。」有你一句加油，幾辛苦都值得啦。
.
.
.
「叮噹」、「叮噹」...
「阿楓、小涼，你地黎啦？」阿靜開門接我地。
「嘩，女主人咁款啦喎。」小涼講。
「咦，唔好笑我啦..入黎啦。」
我地去咗阿月屋企幫阿晴開生日party，貪果到夠大同多嘢玩。
「晴姐生日快樂！」
「多謝多謝！盡情玩！」阿晴答。
「喂喂喂，咁遲架！罰一杯先啦！」阿言講。
「遠架大佬！」
「阿豪同小霖都到啦！」
「好好好，咁我自隊囉，點啊玩緊咩？」
「十三張啊。」
「掂，我拿手。」我講。
「係咪啊？試下！」阿言講。今日佢好似特別意氣風發咁。
.
.
.
「小心啊你地！三條頭、花二度、四條尾門。」我講，坐埋去之後，我輸到底褲都冇咁制，難得揸到鋪靚嘅。
「食啦你，六pair半報到。」阿月講...what the fuck?!?!
「妖，出千咩！唔玩啦！」
「你一啲賭術細胞都遺傳唔到架！點做uncle個仔？」阿豪又喺到串我。
「啲女仔呢？去曬邊？」我問。
「整嘢食啊。」
「食得嘢啦！」佢地捧住一盤盤嘢食出黎，好似4個賢妻咁。
「嘩卡邦尼、黑椒雞肉飯、薯蓉，正呀！」吃貨阿豪見到就話。
「嘩..pizza hut買架炸？」我問。
「梗係唔係啦！我地煮架！」佢地異口同聲咁講。
之後我地就開始食，估唔到又真係幾好食，小涼嘅手勢我就試過，估唔到其餘幾個女仔都煮得兩手。
食完之後我地就一齊玩咗啲團體game，我地首先唱咗陣K，阿月屋企連K房都有，究竟係有錢到點..
「我最多 把軀殼 暫時就當不屬我..」阿星又開始高歌，簡直係災難。
「唱完啦，到邊個？」
個螢幕彈咗今生不再出黎，我同小涼對望，然後好有默契咁一齊拎起支咪。
「同渡過這盛世 隨手都採到星火的美麗
但我怎知道這份執迷 抱入來世 仍在你軀體
就趁那歌聲悠揚 玻璃倒影映了今生不再的幻象
天空正掛著今世最亮的月亮 蜚短流長未來將怎麼設想
恨這晚歌聲悠揚 當中多少秒鐘可跟最愛來分享
種種恩恩愛愛 可伸展多少世代仍在唱..」
「嘩..佢地唱得好好聽啊！」阿靜講。
我地好尷尬咁笑咗笑，不過總算完成咗我地合唱嘅機會，特別係呢首對我地黎咁有意義嘅歌。
「月月我地又揀番隻唱 ！！」
「好啦好啦..你揀啦唉。」
唱咗一輪之後，我地就開始玩真心話大冒險.......
我地拎咗個啤酒樽黎轉，阿月係主人家，所以佢轉先。
「唔好係我..唔好係我..」阿星緊張到合埋咗眼祈禱。
當佢打開眼果陣，全世界對住佢問：「Truth or dare？」
「嘩屌，有冇咁準啊？打死都揀Dare！」
我諗佢永遠都唔會知道係我地搞嘅鬼，所以做任何事都要謹慎，唔好俾人乘虛而入啊！
「第一鋪就熱下身先啦，去廚房拎支辣椒醬食兩羹啦！」阿月講。
「玩啊？」佢講。
食完之後…
「嘩…屌..呢個辣呢個辣..嘩..屌..嗄..嗄..嗄..」佢辣到成隻狗咁。
「好，下鋪！受死啦你班友！」阿星要報仇咁款。
.
.
.
「阿靜！轉中你！Truth or dare！」
「嗯..Truth囉！」
「講一個阿月嘅缺點出黎！嘻嘻。」
「嘩大佬洗唔洗咁小器？」阿月鬧佢。
「吓..等我諗諗先…啊！佢好鐘意周圍放屁架！」
「哈哈哈哈哈哈！」全場人都忍唔住大笑起黎。
「原來你有啲咁嘅僻好，哈哈哈！」阿星笑到最大聲。
「咩姐，你地唔放屁嘅，下個啦！」阿月仲好理所當然咁。
.
.
.
轉到阿月。
「呵呵..月月，Truth or dare 啊？」
「哼，係咪玩尻我，Dare！」
「嗯…大嗌廿聲『月月好愛藍靜』啦！」好惡頂啊..不過仲唔有仇報仇？頭先炒得我咁甘。
「你都有今日啦蕭皓月！」阿言都笑佢。
「吓..喺呢到..好醜喎..」
「快啲快啲！」我地起哄。
「呀…月月好愛藍靜 月月好愛藍靜 月月好愛藍靜 月月好愛藍靜..」佢嗌到好力竭聲嘶。谷到面都紅曬。
「嗯..人地怕醜架..不過我都係,哈哈。」藍小姐，你呢啲叫唔知醜吧。
「轉到下個就邊個死！」阿月變得好熱血。
「垃圾楓！到你！Truth or dare？」
「Truth囉..」我唔係好夠膽俾佢Dare。
「你左邊屎忽係咪有個星星圖案嘅胎記！？」
「嘩屌，你點知架？」
「哈哈哈哈，個胎記生喺個屎忽到！」阿星又笑，個個呆咗咁望住佢。
「胎記生喺個屎忽到..有咩咁好笑？」我問佢。
「下..係喎，胎記生喺個屎忽到有咩咁好笑？」佢又問番自己。
到我轉果陣，好一個天意弄人，俾我轉中阿豪，咁就幫你一把啦…
「嗯..阿豪Truth or Dare？」
「Truth 啦。」
「啊..如果用一個詞語形容自己你會用咩詞語？」
「屌，你問咩啊！」阿星好燥。
我唔敢問啲太過份嘅嘢，見過鬼都怕黑，所以就咁問，又可以令小霖了解佢多啲。
「嗯..專一囉，我好專一架我！」
「睇得出~~」個個都講。
阿豪再轉，今次轉到去小涼。
「下..err.. Truth啦！」佢講。
「你..初戀係點嘅？」Shit..問中死穴。
我見小涼個樣有啲為難咁，作為男朋友嘅我當然就出黎擋駕。
「佢初戀咪我囉妖，下個啦下個啦。」我講。
「唔該曬你啊！」佢好細聲同我講。
「唔洗唔該，我應份架嘛。」
「懶醒，哈哈。」
「傾咩啊你地， 到你轉啦！」阿星講。
.....「下，又係我！Dare啦！」阿靜講。
「嗯...錫啖阿月啦。」
「下..唔係啊..」
「做咩姐，你地成日做架啦應該。」阿星講。
「其實..我地未錫過架..」佢竟然面紅。
「真係架？！咁要試下啦！！」我地起哄。
只見阿靜同阿月都雙眼緊閉咁，兩個都好緊張..
「啜」！一個蜻蜓點水式嘅親吻。
「Wowwwwww！」我地叫嚷！
佢地兩個都面紅到就黎燒熟咁，變得好尷尬。
「哈哈，到我轉啦可？」
.......今次轉到小霖。
「小霖Truth or Dare？」
「Truth啦..」佢講
「嗯..你而家有冇鐘意人！」
嘩屌....
崩口人忌崩口碗，雖然佢係新黎姐..
佢咁問一問令到全場都靜咗靜，唔係尷尬，而係屏息以待佢嘅答案..我承認我都係。
「哈..我而加冇鐘意人喎..呢個時候專心讀書嘛。」
阿豪閃過咗一絲失望，下一秒就勉強擠番個笑容出黎。
「不如玩下其他啦，玩咗咁耐都悶悶地。」小涼出黎打圓場。
「同意同意。」阿星講。
之後我地就玩咗陣非洲話事啤，好快大家就重新投入遊戲，好快就唔記得頭先嘅事。
.
.
.
「Happy birthday to you..」阿言捧住個蛋糕出黎，我地隨之唱起生日歌。
「好多謝你地..」阿晴好感動咁講，感動得就快喊。
「吹蠟燭啊！」阿言講。
「一齊啦！」
佢地鄔低吹果陣，阿晴冇吹到，反而向阿言錫咗一啖。
「多謝你幫我搞呢個party，同埋..多謝你一直喺我身邊。」
「傻瓜！」我諗我可以開始儲定人情。
「好浪漫啊..」小涼喺我身邊講。
「羨慕啊？」我問佢。
「唔羨慕，我都有你喺我身邊。」
「跟得我多都咁口花！」
「對第二個唔會咪得囉。」
番到屋企之後，我仲喺到回味緊頭先嘅派對，因為實在太好玩，個個都十分投入，但係好似一切都太自然，自然得太過份。