我只不過喺自修室溫書，點知比我遇番佢。: <四十六>小時候

第二日，我約咗小霖喺巴士站等，總不能要佢書包都冇就番學掛。
 
「唔該曬，要你特登拎個書包黎。」佢講。
 
「我唔該你就真啦。」
 
「你已經講咗兩次啦阿伯。」
 
「講一千次都唔夠做啦。」
 


「咁你諗住點報答我先？」
 
「我幫番你同阿豪啦一係！」
 
「我都話..順其自然囉。」佢有啲悵然咁講。
 
「車到啦，上車啦！」
 
我地又再次上番上層，坐番同一個坐位，只係人大咗，感受亦都已經唔同。
.


.
.
「呃..過多幾日就十二月啦，點解咁快架！」一番到去就聽到阿星喺到抱怨。
 
「咁咪好囉，咁就好快到聖誕同倒數！」阿靜講。
 
「月月到時我地一齊去拍拖拖好冇啊？」
 
「下..好..」
 


「做咩啊？你唔想啊？」
 
「STOP！」阿星喝停佢地。
 
「單身狗在此，要放閃唔該去第二到。」
 
「車，你快啲搞點你女神咪有得好似我地咁囉！」阿靜講。
 
「唉，此恨綿綿無..」屌，好扮唔扮扮豬八戒。
 
「不如倒數我地一齊去啊！」阿豪講。
 
「好啊！多啲人熱鬧啲！」阿晴講。
 
「你地啲情侶派對唔洗預我啦！我有節目。」除咗阿星之外大多都同意。


.
.
今日第一堂就係ECON堂，又係日復日咁操卷。
 
我發覺ECON啲past paper仲易過學校啲卷，特別係CE，前半果啲根本唔洗點讀都識做。
 
我比較擔心只係改制之後啲程度會好參差，會因此而失手，仲要加咗個elective，連操都冇得操。
 
「OK,夠鐘，停筆。」
 
做完之後個感覺都幾良好，好似都唔太難，至少section A肯定可以拎唔少分。
 
放學之後我就即刻去咗自修室溫書，而家對我黎講已經唔係每分每秒都好重要，呢個試唔再係我一個人嘅事，我無論如何都要砌低佢。
 
「嘩，你連校服都冇換就落咗黎啊？」係小霖，佢換咗便服先落黎。


 
「係啊，費時嘥曬啲時間啦。」
 
「小涼呢？」
 
「佢今晚出去食飯，應該唔黎。」
 
「咁溫緊咩啊你？」
 
「Accounting囉。」
 
「啱啦，一齊啦，我有嘢唔識可以問下你。」
 
「汪大小姐都會有嘢唔識？」
 


「你當我wiki咩，咁你教唔教？」
 
「教教教，難得有咁嘅機會嘛。」
 
於是我就將佢唔識嘅盡所能都教一次，教人真係個好好嘅體驗，可以考驗自己識唔識之餘，教完一次印象都深啲。加上佢問題真係好高質，都唔係咁易答。
 
「掂喎費子楓，果然脫胎換骨。」
 
「咩脫胎換骨啊？不嬲呢科都唔太差好冇？」
 
「好好好，我餓啦，一齊去食嘢？」
 
「都好！」
 
我地去咗地鐵站上蓋嘅河粉鋪食，呢間嘢我地以前成日食，貪佢平又大碗。


 
「嗯~~啲豬骨湯真係好香！」小霖講。
 
「我都好耐冇黎食，隻味道好久違。」
 
「我唔客氣啦！」佢講，講完之後就「雪雪」聲咁食。
 
「咁多年你都係咁嘅，食得咁鬼粗魯。」我笑佢。
 
「好食啊嘛！同埋喺你面前怕咩！」
 
「等我話俾阿豪知，等佢唔要你！」
 
「哈..哈。食啦你。」講起阿豪佢就唔太自然咁。
 
「咦，你地係咪楓仔同小霖啊？」個老闆娘問，我就認得佢，估唔到佢仲認得我地。
 
「係啊！老闆娘，仲認得我地嘅？」我講。
 
「點會唔認得啊，你地阿媽以前成日帶你地黎食，成日都嘈冤巴閉！」我地諗番起以前點搗亂都相視而笑。
 
「估唔到咁快咁大個，係呢，你地拍緊拖呢！？」
 
「冇啊冇啊，只係溫溫下書突然想再黎食下嘢，個白痴仔有女朋友架啦。」小霖答。
 
「噢，估唔到楓仔你咁都有人要，下次帶黎俾姨姨睇！」
 
「好啊，下次啦，有機會帶佢黎俾你識！」
 
「估唔到佢仲記得我地啊可？」我地走咗之後，小霖問。
 
「係囉，都真係好耐歷史。」
 
「記唔記得果次你打爛咗人地成支魚露，搞到人地地方痴笠笠咁。」佢問。
 
「咩啊，係你fing我隻手我先撞到枝嘢炸，又入我數！」
 
「係咩？哈哈，唔記得lu。」
 
「不過而家諗番起都幾好笑嘅。」我有感而發。
 
「係囉..以前啲嘢雖然無聊又白痴，但係記憶就好深刻，反而而加好多方法去留住啲回憶，偏偏喺腦海入面又唔深刻。」佢仲有感過我。
 
「或者係人愈大，值得記住嘅嘢越黎越少。」
 
「如果可以番去以前就好..」佢講，不過我同意。
 
「到啦，繼續入去溫書啦 ！」
 
「好！一齊努力。」
 
或者細個果陣真係好啲，可惜果陣冇好好珍惜。